એવું ભાગ્યે જ બને છે જ્યારે બંને ટીમના કેપ્ટન એક જ મેચમાં પોતાના નામે કોઈ મોટી સિદ્ધિ હાસિલ કરે છે. ભારત અને ઓસ્ટ્રેલિયા વચ્ચે યોજાનારી વર્લ્ડ ટેસ્ટ ચેમ્પિયનશિપની ફાઈનલમાં પણ કંઈક આવું જ જોવા મળશે. રોહિત શર્મા અને પેટ કમિન્સ મેદાનમાં ઉતરતાની સાથે જ તેમના નામે મોટી સિદ્ધિ નોંધાઈ જશે. બંને કેપ્ટન એક જ રેકોર્ડ બનાવતા જોવા મળશે.
વર્લ્ડ ટેસ્ટ ચેમ્પિયનશિપની ફાઈનલ મેચ ભારત અને ઓસ્ટ્રેલિયા વચ્ચે ઈંગ્લેન્ડના ઓવલ ખાતે 7 જૂનથી 11 જૂન દરમિયાન રમશે. આ મેચ માટે 12 જૂનને રિઝર્વ ડે તરીકે રાખવામાં આવ્યો છે. WTCની બીજી સિઝનમાં ભારત સતત બીજી વાર ફાઈનલમાં પ્રવેશ્યું છે જ્યારે ઓસ્ટ્રેલિયા પહેલીવાર ફાઈનલમાં રમશે.
ભારત અને ઓસ્ટ્રેલિયાના કપ્તાનો માટે WTC ફાઇનલ ખાસ રહેશે. રોહિત શર્મા અને પેટ કમિન્સ બંને ICCની આ મેગા ઈવેન્ટમાં પોતાની ટેસ્ટ કારકિર્દીની 50મી ટેસ્ટ મેચ રમશે. અત્યાર સુધી રમાયેલી 49 ટેસ્ટમાં પેટ કમિન્સે 217 વિકેટ લેવા ઉપરાંત 924 રન બનાવ્યા છે. જ્યારે રોહિત શર્માએ 49 ટેસ્ટમાં 3379 રન બનાવ્યા છે અને 2 વિકેટ લીધી છે. આ 49 ટેસ્ટમાં રોહિતના નામે 1 બેવડી સદી, 9 સદી અને 14 અડધી સદી સામેલ છે.
WTCની ફાઈનલ બંને કપ્તાનોની 50મી ટેસ્ટ છે. કમિન્સ પાસે રોહિત કરતાં ડબલ કરતાં વધુ મેચોમાં કેપ્ટનશિપનો અનુભવ છે. રોહિતે અત્યાર સુધી 6 ટેસ્ટમાં ભારતનું નેતૃત્વ કર્યું છે, જેમાં તેણે 4માં જીત, 1માં હાર અને 1 ડ્રો રમી છે. બીજી તરફ, પેટ કમિન્સે અત્યાર સુધીમાં 15 ટેસ્ટમાં ઓસ્ટ્રેલિયાની કેપ્ટનશિપ કરી છે, જેમાં તેણે 8માં જીત, 3માં હાર અને 4 ડ્રો રમી છે.
WTCની ફાઈનલ ઓવલના મેદાન પર છે. ઈંગ્લેન્ડના આ મેદાન પર ઓસ્ટ્રેલિયાના વર્તમાન પેસ આક્રમણમાં કમિન્સ સૌથી સફળ બોલર છે, તેણે આ મેદાન પર 6 વિકેટ ઝડપી છે. આ સાથે જ રોહિત શર્માએ પણ આ મેદાન પર વિદેશમાં પોતાની પ્રથમ સદી ફટકારી હતી. એટલે કે આ મેદાન પર બંને કેપ્ટનનો રેકોર્ડ સારો છે. હવે જોવાનું એ રહે છે કે 50મી ટેસ્ટ મેચમાં કોનું પ્રદર્શન સર્વશ્રેષ્ઠ રહે છે.