AUS vs SL : લખનૌમાં ડેવિડ વોર્નરે ગ્રાઉન્ડ સ્ટાફની મદદ કરી દિલ જીતી લીધા, જુઓ Video
લખનૌના એકાના સ્ટેડિયમમાં વરસાદના વિઘ્ન વચ્ચે રમાયેલ ઓસ્ટ્રેલિયા અને શ્રીલંકા વચ્ચેના મુકાબલામાં ઓસ્ટ્રેલિયાએ શ્રીલંકાને 5 વિકેટે હરાવી વર્લ્ડ કપ 2023માં જીતનું ખાતું ખોલાવ્યું હતું. વરસાદના કારણે થોડી વાર મેચ રોકવામાં આવી હતી અને તે દરમિયાન ઓસ્ટ્રેલિયન ખેલાડી ડેવિડ વોર્નર તેના રમૂજી અંદાજમાં જોવા મળ્યો હતો, સાથે જ તે ગ્રાઉન્ડ સ્ટાફને મદદ કરતો પણ જોવા મળ્યો હતો.
વર્લ્ડ કપ 2023 (World Cup 2023) માં શ્રીલંકા અને ઓસ્ટ્રેલિયાની ટીમો લખનૌના એકાના સ્ટેડિયમમાં ટકરાઈ હતી. આ મેચ દરમિયાન વરસાદ પડતા ગ્રાઉન્ડ સ્ટાફ (Ground Staff) ને પિચ અને મેદાનને કવર કરવાની ફરજ પડી હતી, જે દરમિયાન ઓસ્ટ્રેલિયા (Australia) નો ઓપનર ડેવિડ વોર્નર તેમની મદદ માટે આવ્યો હતો. જેનો વિડીયો સોશિયલ મીડિયા પર વાયરલ થયો હતો.
વોર્નરે ગ્રાઉન્ડ સ્ટાફને કરી મદદ
શ્રીલંકાની ઈનિંગ દરમિયાન 32મી ઓવર બાદ વરસાદ શરૂ થયો હતો. જેથી અમ્પાયરોએ મેદાન પર કવર મંગાવ્યા હતા. આ દરમિયાન ગ્રાઉન્ડ સ્ટાફને કવર ખેંચવામાં મુશ્કેલી પડી રહી હતી ત્યારે ડેવિડ વોર્નર મદદ માટે આગળ આવ્યો અને કવરને પિચ પર લાવવામાં ગ્રાઉન્ડ સ્ટાફને મદદ કરી હતી. વોર્નરનો આ વીડિયો સોશિયલ મીડિયા પર વાયરલ થયો હતો.
મેચમાં જોરદાર કેચ પકડ્યો
ડેવિડ વોર્નરે શ્રીલંકા સામેની મેચમાં ફિલ્ડિંગમાં શાનદાર કેચ પણ લીધો હતો. પેટ કમિન્સનો બોલિંગમાં વોર્નરે શ્રીલંકાના નિસાન્કાનો મુશ્કેલ કેચ પકડ્યો હતો. ડીપ સ્ક્વેર લેગ પર ઉભા રહી વોર્નર તેની ડાબી તરફ દોડ્યો હતો અને શાનદાર ડાઈવિંગ કરી કેચ પકડ્યો હતો.
— Sanju Here | Alter EGO| (@me_sanjureddy) October 16, 2023
વોર્નર બેટિંગમાં નિષ્ફળ રહ્યો
જોકે આ મેચમાં ડેવિડ વોર્નર બેટથી કંઈ ખાસ કરી શક્યો નહોતો. ટીમને સારી શરૂઆતની જરૂર હતી પરંતુ વોર્નરના વહેલા આઉટ થવાના કારણે ટીમને સારી શરૂઆત મળી ન હતી. દિલશાન મધુશંકાએ વોર્નરને પેવેલિયનનો આઉટ કર્યો હતો. તેણે ચોથી ઓવરના પહેલા બોલ પર વોર્નરને LBW આઉટ કર્યો હતો.
આ પણ વાંચો : World Cup 2023 : ઓસ્ટ્રેલિયાએ શ્રીલંકાને હરાવી ખાતું ખોલાવ્યું, માર્શ-ઝમ્પાનું વિજયી પ્રદર્શન
શ્રીલંકા 209 રનમાં ઓલઆઉટ
આ મેચમાં શ્રીલંકાને પથુમ નિસાંકા અને કુસલ મેન્ડિસે સારી શરૂઆત અપાવી હતી અને બંનેએ 125 રનની ભાગીદારી કરી હતી, છતાં શ્રીલંકાની ટીમ મોટો સ્કોર કરી શકી ન હતી. આખી ટીમ 43.3 ઓવરમાં માત્ર 209 રનમાં ઓલઆઉટ થઈ ગઈ હતી.
ઓસ્ટ્રેલિયાએ શ્રીલંકાને 5 વિકેટે હરાવ્યું
લખનૌમાં ઓસ્ટ્રેલિયન ટીમે 210 રનનો લક્ષ્યાંક 35.2 ઓવરમાં જ પાંચ વિકેટ ગુમાવી હાંસલ કરી લીધો હતો અને આ જીત સાથે વર્લ્ડ કપમાં હારની હેટ્રીકથી ટીમ બચી ગઈ હતી. વર્લ્ડ કપ 2023માં ઓસ્ટ્રેલિયાની આ પહેલી જીત છે.