Virat Kohli: ફેન સેલ્ફી લેવા પાછળ દોડ્યો તો વિરાટ કોહલીએ આપ્યું ખાસ વચન, જુઓ Video

ભારતીય ટીમનો સ્ટાર બેટ્સમેન વિરાટ કોહલી (Virat Kohli) હાલ ક્રિકેટથી દૂર છે. વેસ્ટ ઈન્ડિઝથી પરત ફર્યા બાદ તે 30 ઓગસ્ટથી શરૂ થઈ રહેલા એશિયા કપ (Asia Cup 2023) માટે આરામ કરી રહ્યો છે. પરંતુ વિરાટ જ્યાં પણ હોય તેના ચાહકો દરેક જગ્યાએ હાજર હોય છે. કોહલીનો એક વીડિયો સોશિયલ મીડિયા પર વાયરલ થઈ રહ્યો છે. આ વીડિયોમાં કોહલી પાછળ ફેન્સનો ક્રેઝ સ્પષ્ટપણે દેખાઈ રહ્યો છે અને કોહલી પણ તેના ફેનને નિરાશ કરવાના મૂડમાં નથી અને તેથી તે તેના ફેનને વચન આપે છે.

કોહલીએ ફેનને આપ્યું વચન

વીડિયોમાં જોઈ શકાય છે કે કોહલી તેની કારમાં બેસીને જઈ રહ્યો છે ત્યારે તેનો એક પ્રશંસક તેની પાછળ દોડીને સેલ્ફી માંગે છે. કોહલી ઉતાવળમાં હોય છે, તેથી તે સેલ્ફી નથી આપતો પરંતુ કહે છે કે તે 23મીએ જશે ત્યારે સેલ્ફી આપીશ અને ત્યારપછી કોહલી તેની કારમાં જતો રહ્યો. કોહલીની વાત સાંભળ્યા બાદ તેનો ફેન પણ સહમત થાય છે.

વિન્ડીઝમાં ચાહકોને ખુશ કર્યા

કોહલી સામાન્ય રીતે તેના ચાહકોને નિરાશ કરતો નથી અને તેમને ઓટોગ્રાફ અને સેલ્ફી આપે છે. આ વેસ્ટ ઈન્ડિઝ પ્રવાસ દરમિયાન પણ જોવા મળ્યું હતું જ્યાં કોહલીએ તેના ચાહકો સાથે સેલ્ફી માટે પોઝ આપ્યો હતો અને ઓટોગ્રાફ પણ આપ્યા હતા. તે જ્યાં પણ ગયો, તેના ચાહકો તેને મળવા આવ્યા અને કોહલીએ તેમને નિરાશ કર્યા નહીં. એક નાની છોકરી પણ કોહલીની ફેન હતી જે તેને મળવા આવી હતી અને કોહલી માટે ખાસ ગિફ્ટ લઈને આવી હતી. આ યુવતીએ કોહલીને પોતાનું બ્રેસલેટ ગિફ્ટ કર્યું હતું.

બે વનડેમાં આરામ

કોહલી વેસ્ટ ઈન્ડિઝ પ્રવાસ પર માત્ર ટેસ્ટ મેચમાં જ બેટિંગ કરતો જોવા મળ્યો હતો. તેણે બીજી ટેસ્ટ મેચમાં શાનદાર સદી ફટકારી હતી. તેણે આ પ્રવાસમાં રમાયેલી બે ટેસ્ટમાં 98.50ની એવરેજથી 197 રન બનાવ્યા હતા. કોહલીએ પ્રથમ વનડે રમી હતી પરંતુ બેટિંગ કરી નહોતી. ત્યારબાદ તેને બે વનડેમાં આરામ આપવામાં આવ્યો હતો.

આ પણ વાંચો : Pakistan: એશિયા કપ-વર્લ્ડ કપ પહેલા પાકિસ્તાન ક્રિકેટ બોર્ડે ટીમમાં કર્યા મોટા ફેરફાર

સોશિયલ મીડિયાની કમાણી પર અંગે કર્યો ખુલાસો

કોહલી હાલમાં તેના ફેન્સના વીડિયોના કારણે ચર્ચામાં છે, પરંતુ શનિવારે તે અન્ય કારણથી ચર્ચામાં આવ્યો હતો. વાસ્તવમાં, હોપર હેડક્વાર્ટરના રિપોર્ટમાં કહેવામાં આવ્યું હતું કે કોહલી ઇન્સ્ટાગ્રામની એક પોસ્ટથી 11.48 કરોડ રૂપિયા કમાય છે. પરંતુ કોહલીએ શનિવારે ટ્વિટ કરીને કહ્યું કે મીડિયા રિપોર્ટ્સમાં તેની સોશિયલ મીડિયાની કમાણી અંગેના સમાચાર ખોટા છે.