ગિલે ઈતિહાસના પાનામાં નોંધાવ્યું નામ, કોલંબોમાં 7 રન બનાવતાની સાથે જ ‘મોટી સિદ્ધિ’ હાંસલ કરી

શ્રીલંકા સામે કોલંબોમાં રમાઈ રહેલી બીજી ટેસ્ટ મેચમાં ભારતીય કેપ્ટન શુભમન ગિલે મોટી સિદ્ધિ હાંસલ કરી લીધી છે. ગિલે ટેસ્ટ ક્રિકેટમાં 3,000 રન પૂરા કરી લીધા છે. શ્રીલંકા સામે 7 રન બનાવતાની સાથે જ ગિલે આ આંકડો સ્પર્શ્યો હતો. તે ટેસ્ટ ક્રિકેટમાં આવું કરનાર 28 મો ક્રિકેટર બની ગયો છે. ખાસ વાત એ છે કે, ગિલે પૂર્વ ભારતીય કેપ્ટન કપિલ દેવને પણ પાછળ છોડી દીધા છે.

50 રનની શાનદાર ઈનિંગ રમી

શ્રીલંકા સામેની બીજી ટેસ્ટમાં ભારતીય કેપ્ટન શુભમન ગિલે 108 બોલમાં 50 રનની શાનદાર ઈનિંગ રમી હતી. આ દરમિયાન તેના બેટમાંથી 6 ચોગ્ગા નીકળ્યા હતા. 66 રન પર બીજી વિકેટ પડ્યા બાદ બેટિંગ માટે આવેલા કેપ્ટન ગિલે ત્રીજી વિકેટ માટે 120 રનની શાનદાર ભાગીદારી કરી હતી.

સૌથી નાની ઉંમરે 3 હજાર ટેસ્ટ રન બનાવનાર ભારતીય બેટ્સમેન

શુભમન ગિલે 26 વર્ષ 349 દિવસની ઉંમરે ટેસ્ટ ક્રિકેટમાં 3000 રન પૂરા કર્યા. તે સૌથી નાની ઉંમરે આવું કરનાર ચોથો ભારતીય બની ગયો છે. આ રેકોર્ડ લિસ્ટમાં પહેલા નંબરે ક્રિકેટના ભગવાન સચિન તેંડુલકર છે. સચિને માત્ર 23 વર્ષ 228 દિવસની ઉંમરે ટેસ્ટ ક્રિકેટમાં 3000 રન પૂરા કર્યા હતા. આ રેકોર્ડ લિસ્ટમાં શુભમન ગિલે પૂર્વ દિગ્ગજ કપિલ દેવને પાછળ છોડી દીધા છે.

1. સચિન તેંડુલકર – 23 વર્ષ 228 દિવસ
2. વિરેન્દ્ર સેહવાગ – 26 વર્ષ 157 દિવસ
3. દિલીપ વેંગસરકર – 26 વર્ષ 263 દિવસ
4. શુભમન ગિલ – 26 વર્ષ 349 દિવસ
5. કપિલ દેવ – 26 વર્ષ 356 દિવસ

ભારતે ટોસ જીતીને બેટિંગનો નિર્ણય કર્યો

કોલંબોમાં રમાઈ રહેલી બીજી ટેસ્ટમાં ટીમ ઈન્ડિયાએ ટોસ જીતીને પહેલા બેટિંગ કરવાનો નિર્ણય કર્યો છે. અહેવાલ લખાયા સુધીમાં ભારતીય ટીમે ત્રણ વિકેટ ગુમાવીને 271 રન બનાવી લીધા છે. દેવદત્ત પડિક્કલ 185 બોલમાં 111 રન બનાવીને રમી રહ્યો છે અને તે 12 ચોગ્ગા પણ ફટકારી ચૂક્યો છે. તેની સાથે રવિન્દ્ર જાડેજા 45 બોલમાં 31 રન બનાવીને રમી રહ્યો છે. આ પહેલા શુભમન ગિલ 50, યશસ્વી જેસવાલ 45 અને કે.એલ. રાહુલ 18 રન બનાવીને આઉટ થયા હતા.

WTC ઇતિહાસમાં સૌથી મોટી પાર્ટનરશિપ કરવાનો રેકોર્ડ કોના નામે? આ જોડીની ઐતિહાસિક સિદ્ધિ તોડવી ‘અશક્ય સમાન’