IPL 2026 : વિકેટકીપિંગના બાદશાહ Dhoniએ શીખવ્યો ગુરુ મંત્ર, કાર્તિક અને ઉર્વિલને મળી સુપર ટ્રેનિંગ!
IPL 2026 પહેલા MS Dhoni પોતાની ટીમ CSKના યુવા વિકેટકીપર કાર્તિક શર્મા અને ઉર્વિલ પટેલને ખાસ ટ્રેનિંગ આપતા જોવા મળ્યા. આ માસ્ટરક્લાસથી બંને ખેલાડીઓ પોતાનું સ્કિલ ડેવેલપ કરી રહ્યા છે.
IPL 2026ને ધ્યાનમાં રાખીને ચેન્નાઈ સુપર કિંગ્સની તૈયારીઓ જોરશોરથી ચાલી રહી છે. આ દરમિયાન ટીમના સૌથી અનુભવી ખેલાડી MS Dhoni ફરી એકવાર પોતાના જુના અંદાજમાં દેખાયા છે. તેઓ માત્ર ખેલાડી તરીકે નહીં, પરંતુ એક માર્ગદર્શક તરીકે પણ યુવા ખેલાડીઓને માર્ગદર્શન આપી રહ્યા છે.
વિકેટકીપિંગના ગુરુ તરીકે વિશ્વભરમાં ફેમસ છે થાલા
ધોની વિકેટકીપિંગમાં પોતાની અનોખી સમજ માટે વિશ્વભરમાં જાણીતા છે. હવે તેમણે આ અનુભવ યુવા ખેલાડીઓ સાથે શેર કરવાનો નિર્ણય લીધો છે. ચેન્નાઈ સુપર કિંગ્સ દ્વારા શેર કરાયેલા એક વિડિયોમાં ધોની પોતાની ટીમના વિકેટકીપરને ટ્રેનિંગ આપતા જોવા મળે છે.
MaSterclass of Wicket Keeping 101! ️#WhistlePodu #Yellove pic.twitter.com/zx3ZSEpBx2
— Chennai Super Kings (@ChennaiIPL) March 25, 2026
ધોનીએ તેમને ફક્ત કેચિંગ અથવા સ્ટમ્પિંગ જેવી ટેક્નિક્સ જ નહીં, પરંતુ મેચ દરમિયાન ઝડપથી નિર્ણય લેવાની ક્ષમતા અને મેદાનની પરિસ્થિતિને સમજવાની કળા પણ શીખવાડી. ક્રિકેટમાં વિકેટકીપરનો રોલ ખૂબ જ મહત્વપૂર્ણ હોય છે, અને ધોની આ બાબતમાં વિશ્વના શ્રેષ્ઠ ખેલાડીઓમાં ગણાય છે.
ધોનીના યુવા ખેલાડીઓ માટે માસ્ટર ક્લાસ
આ વિડિયોમાં ધોની ખાસ કરીને બે યુવા ખેલાડીઓ- કાર્તિક શર્મા અને ઉર્વિલ પટેલ સાથે વિકેટકીપિંગ પર ધ્યાન કેન્દ્રિત કરતા જોવા મળ્યા હતા. બંને ખેલાડીઓ ખૂબ જ ધ્યાનથી ધોનીની વાતો સાંભળે છે અને પ્રેક્ટિસ દરમિયાન તેને અમલમાં મૂકવાનો પ્રયત્ન કરે છે. ધોની તેમને સ્ટમ્પિંગ, કેચિંગ અને ગેમ રીડિંગ જેવા મહત્વપૂર્ણ પાસાઓ સમજાવતા દેખાય છે.
કાર્તિક અને ઉર્વિલ બંને આક્રમક શૈલીના વિકેટકીપર-બેટ્સમેન છે. તેઓ ઝડપી રન બનાવવાની ક્ષમતા ધરાવે છે અને મોટા શોટ્સ રમવામાં નિષ્ણાત છે. IPL 2026 દરમિયાન જો તેમને રમવાની તક મળશે, તો તેઓ ટીમ માટે મહત્વપૂર્ણ યોગદાન આપી શકે છે. પરંતુ હાલ તેઓ પોતાની બેટિંગ કરતાં વધુ વિકેટકીપિંગ સ્કિલ્સ સુધારવામાં ધ્યાન આપી રહ્યા છે.
મહત્વની વાત એ છે કે આ ટ્રેનિંગ માત્ર શરૂઆત છે. આવનારા દિવસોમાં વધુ ખેલાડીઓ ધોની પાસેથી શીખતા જોવા મળી શકે છે. IPLના દરેક સીઝનમાં આવી ઘટનાઓ જોવા મળે છે, જ્યાં યુવા ખેલાડીઓ અનુભવી ખેલાડીઓ પાસેથી શીખવાનો પ્રયાસ કરે છે.
વિકેટકીપર તરીકે ધોનીનો રેકોર્ડ પણ શાનદાર રહ્યો છે. તેમણે IPLમાં 200થી વધુ શિકાર નોંધાવ્યા છે, જે તેમને લીગના સૌથી સફળ વિકેટકીપરમાંથી એક બનાવે છે. IPLમાં આ સિદ્ધિ તેમણે Chennai Super Kings ઉપરાંત Rising Pune Supergiant માટે પ્રાપ્ત કરી છે.
26 માર્ચના મહત્વના સમાચાર : કચ્છમાં કેટલાક સ્થળે કરા સાથે વરસ્યો કમોસમી વરસાદ
