IND vs ENG: ભારતીય ઝડપી બોલરોનો ફેન થયો પાકિસ્તાનનો પૂર્વ કેપ્ટન, કહ્યુ આવી લાઇન-અપ પહેલા નથી જોઇ
પાકિસ્તાનના પૂર્વ કેપ્ટને કહ્યુ હતુ કે, બુમરાહે (Jasprit Bumarh) પ્રથમ ઇનીંગમાં ચાર વિકેટ ઝડપી હતી. ઇંગ્લેન્ડને તેણે બેકફુટ પર લાવી દીધુ હતુ. જો રુટ એ પ્રથમ ઇનીંગમાં પણ ફીફટી લગાવી હતી. પરંતુ બુમરાહે તેને બેંટીગમાં સહજતા અનુભવવા દીધી નહોતી.
નોંટિંગહામમાં ઇંગ્લેન્ડ સામે પ્રથમ ટેસ્ટ મેચના ચોથા દિવસે ભારતીય પેસ બોલરોએ શાનદાર બોલીંગ કરી હતી. કેપ્ટન જો રુટ (Joe Root) ના 109 રન છતાં ઇંગ્લેન્ડ બીજી ઇનીંગમાં 303 રન જ બનાવી શક્યા હતા. ભારતને 209 રનનુ લક્ષ્ય મળ્યુ હતુ. ભારતીય બોલરો સામે રુટ ઉપરાંત કોઇ પણ બેટ્સમેન ટકી શક્યો નહોતો. જસપ્રિત બુમરાહ (Jasprit Bumarh) અને ઝડપી બોલરોએ જે રીતે યજમાન ટીમના બેટ્સમેનોને પેવેલિયન પરત મોકલ્યા છે. તે જોઇને પાકિસ્તાનનો પૂર્વ કેપ્ટન ઇન્ઝમામ-ઉલ-હક (Inzmam Ul Haq) ખૂબ જ પ્રભાવિત થયો છે. તેણે ભારતીય બોલરોની ખૂબ પ્રશંસા કરી છે.
હકે, સોશિયલ મીડિયા વિડીયો દ્વારા કહ્યુ હતુ કે, પ્રથમ દિવસે પોતાની ઝડપી બોલીંગ વડે ટીમ ઇન્ડીયાએ સિરીઝ માટે લય પકડી લીધી છે. તેમણે તુરત જ ઇંગ્લેન્ડને બેકફુટ પર લાવી દીધુ છે. ઉપમહાદ્વીપના બોલરોને મોટેભાગે પ્રથમ ટેસ્ટમાં મુશ્કેલી થતી હોય છે. કારણ કે, ઇંગ્લેન્ડમાં બોલીંગ લાઇન અલગ અલગ હોય છે. ટીમ ઇન્ડીયાના બોલરો એ ઇંગ્લેન્ડના બેટ્સમેનોનુ મનોબળ નબળુ કરી દીધુ છે.
આવી ભારતીય બોલીંગ લાઇન-અપ ક્યારેય જોઇ નથી.
ઇંઝમામ એ કહ્યુ કે, બુમરાહે પ્રથમ ઇનીંગમાં ચાર વિકેટ ઝડપી છે. ઇંગ્લેન્ડને બેકફુટ પર લાવી દીધુ છે. જો રુટએ પ્રથમ ઇનીંગમાં પણ અર્ધશતક લગાવ્યુ છે. પરંતુ બુમરાહે તેને ક્યારેય સહજ અનુભવવા નહોતુ દીધુ. મહંમદ શામી અને સિરાજ જેવા અન્ય ઝડપી બોલર પણ શાનદાર છે. મે આવી ભારતીય ઝડપી બોલીંગ લાઇન-અપ ક્યારેય નથી જોઇ.
પૂર્વ પાકિસ્તાની કેપ્ટને કહ્યુ, ટીમ ઇન્ડીયાએ પહેલા પણ ખૂબ સારા ઝડપી બોલર તૈયાર કર્યા છે. જોકે વર્તમાન ભારતીય ઝડપી બોલરો પાસે હકિકતમાં ઝડપી બોલરો વાળી આક્રમકતા છે. જ્યારે તમારી પાસે આક્રમક ઝડપી બોલર હોય, તો આ પ્રકારનુ પ્રદર્શન આવવુ નક્કી છે.
બુમરાહે મચાવ્યો કહેર
પ્રથમ ઇનીંગમાં ચાર વિકેટ ઝડપવા બાદ બુમરાહે બીજી ઇનીંગમાં પાંચ વિકેટ ઝડપી હતી. જ્યારે સિરાઝ અને શાર્દૂલ ઠાકુરે 2-2 વિકેટ ઝડપી હતી. 209 રનના લક્ષ્યનો પીછો કરવા ઉતરેલ ભારતીય ટીમે કેએલ રાહુલની વિકેટ ગુમાવી હતી. તેણે 26 રન બનાવ્યા હતા. ભારત ને જીત માટે 157 રનની પાંચમાં દિવસની રમતની શરુઆતે જરુર હતી. વરસાદને લઇને પાંચમાં દિવસની રમત સમય પર શરુ થઇ શકી નહોતી.