
ઓસ્ટ્રેલિયા પ્રવાસ પર વનડે શ્રેણીમાં ભારતીય ટીમની બેટિંગ નિષ્ફળ ગઈ હતી, પરંતુ T20 શ્રેણીમાં પણ ટીમ ઈન્ડિયાની શરૂઆત સારી રહી નથી. પ્રથમ T20 મેચમાં ભારતીય બેટ્સમેન સારા ફોર્મમાં હતા, પરંતુ વરસાદને કારણે ઈનિંગ પૂર્ણ થઈ શકી ન હતી. પરંતુ બીજી T20માં ટીમ ઈન્ડિયાની બેટિંગ એટલી ખરાબ થઈ ગઈ કે તે પૂરી 20 ઓવર પણ રમી શક્યા નહીં.
મેલબોર્નમાં T20 શ્રેણીની બીજી મેચમાં ભારતીય ટીમ ફક્ત 125 રનના નજીવા સ્કોર પર ઓલઆઉટ થઈ ગઈ. ઓસ્ટ્રેલિયાના પેસ આક્રમણ સામે ટીમ ઈન્ડિયા 9 બોલ પહેલા જ પેવેલિયનમાં પરત ફરી ગઈ. જેમાંથી 9 બેટ્સમેન બે આંકડાને પણ સ્પર્શી શક્યા નહીં અને ચાર ખેલાડીઓ તો ખાતું પણ ન ખોલાવી શક્યા.
31 ઓક્ટોબર, શનિવારના રોજ મેલબોર્નમાં શ્રેણીની બીજી મેચમાં ટીમ ઈન્ડિયાએ પહેલા બેટિંગ કરી અને ફરી એકવાર ખરાબ શરૂઆત કરી. આ વખતે, વાઈસ કેપ્ટન શુભમન ગિલ આઉટ થનાર પ્રથમ બેટ્સમેન હતો, જેને જોશ હેઝલવુડે તેના ઈનસ્વિંગ, આઉટસ્વિંગ અને બાઉન્સરથી હેરાન કર્યા પછી પેવેલિયન પરત મોકલ્યો હતો.
ઓસ્ટ્રેલિયન પેસ બોલર જોશ હેઝલવુડે પ્રથમ આઠ ઓવરમાં ચાર ઓવરનો સ્પેલ પૂરો કર્યો, જેમાં ગિલ, કેપ્ટન સૂર્યકુમાર યાદવ અને તિલક વર્માને આઉટ કર્યા. ટીમ ઈન્ડિયાએ માત્ર 49 રનમાં પાંચ વિકેટ ગુમાવી દીધી હતી, પરંતુ અભિષેક શર્માએ લડાયક ઈનિંગ રમી હતી.
અભિષેક શર્માએ ઓસ્ટ્રેલિયા સામે માત્ર 23 બોલમાં તેની પહેલી અડધી સદી ફટકારી હતી. તેને બેટિંગ ઓર્ડરમાં પ્રમોટ થયેલા હર્ષિત રાણાનો સાથ મળ્યો. રાણા અને અભિષેકે છઠ્ઠી વિકેટ માટે 56 રનની ભાગીદારી કરી, જેનાથી ટીમ 100 રનનો આંકડો પાર કરી શકી. અભિષેક શર્માએ 37 બોલમાં 68 રનની ધમાકેદાર ઈનિંગ રમી, જ્યારે હર્ષિતે પણ 35 રનનું મહત્વપૂર્ણ યોગદાન આપ્યું.
ટીમ ઈન્ડિયાની ઈનિંગ આખરે 18.4 ઓવરમાં 125 રનમાં જ સમેટાઈ ગઈ, જેમાં અભિષેકે અડધાથી વધુ રન બનાવ્યા. અભિષેક અને હર્ષિત સિવાય અન્ય નવ બેટ્સમેન એક આંકડાના સ્કોર પર આઉટ થયા. મતલબ કે, તેમાંથી કોઈએ 10 કે તેથી વધુ રન બનાવ્યા નહીં. આમાંથી ચાર બેટ્સમેન – તિલક વર્મા, કુલદીપ યાદવ, જસપ્રીત બુમરાહ અને વરુણ ચક્રવર્તી – પોતાનું ખાતું ખોલવામાં નિષ્ફળ રહ્યા.
આ પણ વાંચો: IND vs AUS : મેચ પહેલા એક મિનિટનું મૌન પાળવામાં આવ્યું, ખેલાડીઓએ કાળી પટ્ટી પહેરી મેદાનમાં ઉતર્યા