ICC Women’s World Cup : ઓસ્ટ્રેલિયા સેમિફાઈનલ માટે થયું ક્વોલિફાય, જાણો ટીમ ઈન્ડિયાની શું છે સ્થિતિ

ઓસ્ટ્રેલિયા મહિલા ક્રિકેટ ટીમે ICC મહિલા વર્લ્ડ કપ 2025 ની પોતાની પાંચમી મેચમાં બાંગ્લાદેશને 10 વિકેટથી હરાવ્યું. આ સાથે, ઓસ્ટ્રેલિયાએ પોતાના શાનદાર ફોર્મ અને મજબૂત પ્રદર્શનના આધારે સેમિફાઈનલ માટે ક્વોલિફાય કર્યું. તેઓ ICC મહિલા વર્લ્ડ કપ 2025 ના સેમિફાઈનલમાં પહોંચનારી પ્રથમ ટીમ બની. બાકીના ત્રણ સ્થાનો માટે હવે સાત ટીમો સ્પર્ધા કરી રહી છે.

ઓસ્ટ્રેલિયા વર્લ્ડ કપ સેમિફાઈનલમાં ક્વોલિફાય

ICC મહિલા વર્લ્ડ કપ 2025 પોઈન્ટ ટેબલમાં ઓસ્ટ્રેલિયા ટોચ પર છે. ઓસ્ટ્રેલિયાએ પાંચ મેચમાં નવ પોઈન્ટ મેળવ્યા છે, જેમાં ચાર મેચમાં જીત અને એક મેચ રીઝલ્ટ વગરની રહી છે. ઓસ્ટ્રેલિયા હજુ સુધી એક પણ મેચ હર્યું નથી. જોકે, શ્રીલંકા સામેની તેમની મેચ વરસાદને કારણે ધોવાઈ ગઈ હતી, જેના કારણે તેમને શ્રીલંકા સાથે પોઈન્ટ શેર કરવા પડ્યા હતા. ઓસ્ટ્રેલિયા આ ટુર્નામેન્ટમાં સૌથી સફળ ટીમ છે અને આ વખતે તેમનું વર્ચસ્વ સ્પષ્ટ દેખાઈ રહ્યું છે.

પોઈન્ટ ટેબલમાં ટીમ ઈન્ડિયા કયા સ્થાને?

બીજી તરફ, ઈંગ્લેન્ડની મહિલા ટીમ પોઈન્ટ ટેબલમાં 7 પોઈન્ટ સાથે બીજા સ્થાને છે, જેણે ચારમાંથી ત્રણ મેચ જીતી છે. દક્ષિણ આફ્રિકા ચાર મેચમાંથી 6 પોઈન્ટ સાથે ત્રીજા સ્થાને છે, જેમાં ત્રણ જીતી છે અને એક હારનો સામનો કરવો પડ્યો છે. ભારતની મહિલા ટીમ ચાર મેચમાંથી 4 પોઈન્ટ સાથે ચોથા સ્થાને છે, જેમાં બે જીતી છે અને બે હારનો સામનો કરવો પડ્યો છે. ન્યુઝીલેન્ડ (3 પોઈન્ટ), બાંગ્લાદેશ (2 પોઈન્ટ), શ્રીલંકા (2 પોઈન્ટ) અને પાકિસ્તાન (1 પોઈન્ટ) અનુક્રમે પાંચથી આઠમા સ્થાને છે. તે સ્પષ્ટ છે કે ઓસ્ટ્રેલિયાનું પ્રદર્શન અન્ય ટીમો કરતા ઘણું સારું રહ્યું છે.

ભારત સેમિફાઈનલમાં કેવી રીતે પહોંચશે?

ભારતનો સેમિફાઈનલમાં પહોંચવાનો રસ્તો હવે સરળ નથી. લીગ સ્ટેજમાં તેમની ત્રણ મેચ બાકી છે, જેમાં તેઓ ઈંગ્લેન્ડ, ન્યુઝીલેન્ડ અને બાંગ્લાદેશનો સામનો કરશે. જો ભારત ત્રણેય મેચ જીતી જાય છે, તો તેઓ 10 પોઈન્ટ સાથે ક્વોલિફાય થશે. જોકે, બે જીત અને એક હાર તેમના નેટ રન રેટને અસર કરી શકે છે. બે મેચ હારવાથી તેઓ ટુર્નામેન્ટમાંથી બહાર થઈ શકે છે.

આ પણ વાંચો: 8 છગ્ગા, 25 ચોગ્ગા, 245 રન… પર્થમાં છે રોહિત શર્માનો ‘જલવો’, ચાર મેચમાં શાનદાર છે રેકોર્ડ

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો