ICC T20 World Cup Breaking News: નેપાળનું વર્લ્ડ કપ સપનું ચકનાચૂર, કેરેબિયન ટીમે માત્ર 15 ઓવરમાં ખેલ ખતમ કર્યો

ટી20 વર્લ્ડ કપ 2026ના ગ્રુપ-સી મુકાબલામાં વેસ્ટ ઈન્ડિઝે નેપાળને 9 વિકેટે કરારી હાર આપીને સુપર-8માં પોતાની જગ્યા પાકી કરી લીધી છે. કોલંબોના મેદાન પર રમાયેલી આ એકતરફી મેચમાં વેસ્ટ ઈન્ડિઝના બોલરો અને બેટ્સમેનોએ શાનદાર પ્રદર્શન કરીને નેપાળની આશાઓ પર પાણી ફેરવી દીધું હતું. આ હારની સાથે જ ટુર્નામેન્ટમાં નેપાળની સફર પણ સમાપ્ત થઈ ગઈ છે.

નેપાળનું ટોપ ઓર્ડર ‘ફ્લોપ’

વેસ્ટ ઈન્ડિઝના કેપ્ટને ટોસ જીતીને પહેલા બોલિંગ કરવાનો નિર્ણય લીધો હતો, જે તેમના બોલરોએ સાચો સાબિત કરી બતાવ્યો. નેપાળની શરૂઆત અત્યંત ખરાબ રહી અને ટીમે પાવરપ્લેમાં જ માત્ર 23 રનના સ્કોર પર પોતાની 4 મહત્વની વિકેટો ગુમાવી દીધી હતી. કેરેબિયન બોલરો સામે નેપાળનો ટોપ ઓર્ડર લાચાર જોવા મળ્યો હતો.

એરીએ મોરચો સંભાળ્યો

નેપાળની ટીમ 100 રન સુધી પણ પહોંચશે તેમ લાગતું નહોતું, ત્યારે દીપેન્દ્ર સિંહ એરીએ મોરચો સંભાળ્યો હતો. તેણે પોતાની સૂઝબૂઝથી એક છેડો સાચવી રાખ્યો અને 47 બોલમાં 58 રનની મહત્વપૂર્ણ અડધી સદી ફટકારી. તેની આ ઇનિંગની મદદથી નેપાળે નિર્ધારિત 20 ઓવરમાં 8 વિકેટ ગુમાવીને 133 રન બનાવ્યા, જે વેસ્ટ ઈન્ડિઝ જેવી મજબૂત ટીમ સામે ઘણા ઓછા હતા.

134 રનના નાના લક્ષ્યાંકનો પીછો કરવા ઉતરેલી વેસ્ટ ઈન્ડિઝની ટીમે શરૂઆતથી જ આક્રમક વલણ અપનાવ્યું હતું. ઓપનિંગ બેટ્સમેનોએ નેપાળી બોલરો પર જોરદાર પ્રહાર કર્યા હતા. વેસ્ટ ઈન્ડિઝે માત્ર 15.2 ઓવરમાં લક્ષ્ય હાંસલ કરી લીધું હતું. આ દરમિયાન ટીમે માત્ર એક વિકેટ ગુમાવીને 134 રન બનાવી 9 વિકેટે શાનદાર જીત નોંધાવી હતી. વેસ્ટ ઈન્ડિઝની તોફાની બેટિંગે નેપાળના બોલરોને વાપસીની કોઈ તક આપી ન હતી.

નેપાળ આઉટ, વેસ્ટ ઈન્ડિઝ ઇન

આ જીતની સાથે વેસ્ટ ઈન્ડિઝ સુપર-8 માટે ક્વોલિફાય કરનારી મુખ્ય ટીમોમાં જોડાઈ ગઈ છે. બીજી તરફ, નેપાળ માટે આ વર્લ્ડ કપ એક ખરાબ સપના જેવો રહ્યો. પોતાની શરૂઆતની ત્રણેય મેચ હાર્યા બાદ હવે નેપાળ સત્તાવાર રીતે ટુર્નામેન્ટમાંથી બહાર થઈ ગયું છે. નેપાળ માટે આંતરરાષ્ટ્રીય સ્તરે આ અનુભવ સારો રહ્યો પરંતુ પ્રદર્શનની દૃષ્ટિએ ટીમ દરેક વિભાગમાં પાછળ જોવા મળી હતી.