Breaking News : રોહિત શર્માની નારાજગી કે ઈજાનો મુદ્દો, અજિત અગરકર અને BCCI વચ્ચે અંતર વધવાનું અસલી કારણ શું ?
અજિત અગરકરના ચીફ સિલેક્ટર તરીકેના કાર્યકાળ દરમિયાન ભારતીય ટીમે શાનદાર સફળતાઓ મેળવી છે. તેમ છતાં તેનો કાર્યકાળ આગળ વધ્યો નથી. તેની પાછળ શું કારણ તે જાણો.
વન ડે વર્લ્ડ કપ 2023ની ફાઇનલ, 2024નો T20 વર્લ્ડ કપ અને 2025ની ચેમ્પિયન્સ ટ્રોફી સહિતના મોટા ટૂર્નામેન્ટમાં ભારતીય ટીમે સફળતા મેળવી છે. અગરકર જુલાઈ 2023માં મુખ્ય પસંદગીકાર બન્યો હતો. તેના કાર્યકાળ દરમિયાન ભારતીય ટીમે સફળતાઓ મેળવી છે. હવે તેના કરારના વિસ્તરણ અંગે સવાલો ઉભા થયા છે.
છેલ્લા કેટલાક અઠવાડિયાથી અજિત અગરકરના કાર્યકાળને લઈને અટકળો ચાલી રહી હતી. અગાઉ એવું માનવામાં આવતું હતું કે તેઓ 2027ના વનડે વર્લ્ડ કપ સુધી જવાબદારી સંભાળી શકે છે. પરંતુ તાજેતરના સમયમાં સ્થિતિ બદલાઈ હોવાનું અહેવાલોમાં જણાવાયું હતું. 18 સપ્ટેમ્બરની AGMમાં આ મામલે અંતિમ નિર્ણય અધિકારીઓ પર છોડવામાં આવ્યો હતો.
રોહિત શર્માને લઈને શું થયું?
અગરકરના ભવિષ્યને લઈને ચાલી રહેલી ચર્ચામાં રોહિત શર્માનો મુદ્દો પણ સામે આવ્યો છે. કેટલાક અહેવાલોમાં દાવો કરવામાં આવ્યો છે કે ઇંગ્લેન્ડ પ્રવાસ પહેલાં રોહિતના ભવિષ્ય અંગે પસંદગી સમિતિમાં ચર્ચા થઈ હતી. જોકે, આ સમગ્ર મામલે BCCI તરફથી અગરકરના કાર્યકાળના અંતનું સત્તાવાર કારણ જાહેર કરવામાં આવ્યું નથી.
સૂત્રો અનુસાર, રોહિત શર્માને તેના ભવિષ્ય અંગે સમજાવવાની જવાબદારી પસંદગીકાર પ્રજ્ઞાન ઓઝાને આપવામાં આવી હતી. ત્યારબાદ રોહિતે આ મુદ્દે નારાજગી વ્યક્ત કરી હોવાનું જણાવાયું હતું. બાદમાં BCCI સચિવ દેવજિત સૈકિયાએ રોહિતના સ્થાન અંગે કોઈ તાત્કાલિક ખતરો ન હોવાનું સ્પષ્ટ કર્યું હતું.
VVS લક્ષ્મણ સાથે મતભેદની ચર્ચા
કેટલાક અહેવાલોમાં અગરકર અને BCCI સેન્ટર ઓફ એક્સેલન્સ (CoE)ના વડા VVS લક્ષ્મણ વચ્ચે મતભેદ હોવાનો દાવો કરવામાં આવ્યો છે. જોકે, આ બાબત BCCI દ્વારા સત્તાવાર રીતે અગરકરના કાર્યકાળ સાથે જોડાયેલા કારણ તરીકે જાહેર કરવામાં આવી નથી. સૂત્રો અનુસાર, એશિયન ગેમ્સ 2026 માટે ભારતીય ટીમ મોકલવા અંગે બંનેની વિચારસરણી અલગ હતી. આ ઉપરાંત સપ્ટેમ્બર-ઓક્ટોબરમાં ઇન્ડિયા-Aની વિવિધ મેચોના શેડ્યૂલને લઈને પણ મતભેદ હોવાના અહેવાલો સામે આવ્યા હતા. ઇન્ડિયા-Aના કાર્યક્રમો નક્કી કરવામાં CoEની મહત્વની ભૂમિકા હોય છે.
ખેલાડીઓની ઈજાઓને લઈને પણ ચર્ચા
સૂત્રો અનુસાર, અગરકર અને ટીમ મેનેજમેન્ટ વચ્ચે ખેલાડીઓની વારંવાર થતી ઈજાઓ અને ફિટનેસને લઈને ચિંતાનો પણ ઉલ્લેખ કરવામાં આવ્યો છે. ખેલાડીઓના સારવાર અને રિહેબિલિટેશનમાં CoEની ભૂમિકા હોવાથી આ મુદ્દે બંને પક્ષ વચ્ચે મતભેદ વધ્યા હોવાનો દાવો કરવામાં આવ્યો છે.
આ સમગ્ર ચર્ચા વચ્ચે અગરકર BCCIની એક રિવ્યૂ મીટિંગમાં હાજર રહ્યો નહોતો. તેના ભવિષ્ય અંગેની અટકળોને આ ઘટનાથી વધુ વેગ મળ્યો છે. જોકે, 18 સપ્ટેમ્બર સુધી BCCIએ તેના કાર્યકાળના અંત અથવા વિસ્તરણ અંગે અંતિમ નિર્ણય જાહેર કર્યો નહોતો. BCCI સચિવ દેવજિત સૈકિયાએ જણાવ્યું હતું કે આ અંગે યોગ્ય સમયે નિર્ણય લેવામાં આવશે.
