Breaking News: ક્રિકેટનો ચહેરો બદલવા માટે ICC નો ‘માસ્ટર પ્લાન’… ODIમાં ઘટાડો અને WTCમાં 12 ટીમો
ICC's Plan for Major Changes In Cricket: ક્રિકેટમાં ટૂંક સમયમાં એવા મોટા ફેરફારો થઈ શકે છે, જે રમતનું ભવિષ્ય બદલી નાખશે. ICC કેટલાક એવા પ્રસ્તાવો પર વિચાર કરી રહી છે, જેનાથી એક લોકપ્રિય ફોર્મેટને સૌથી મોટો ફટકો પડી શકે છે, જ્યારે બીજી તરફ નવી ટુર્નામેન્ટ અને ટેસ્ટ ક્રિકેટ માટે પણ મોટા નિર્ણયો લેવાઈ શકે છે. આખરે શું છે ICCનો આ માસ્ટર પ્લાન?
આંતરરાષ્ટ્રીય ક્રિકેટ પરિષદ (ICC) આગામી સમયમાં ક્રિકેટ કેલેન્ડર અને તેના ફોર્મેટમાં કેટલાક ક્રાંતિકારી ફેરફારો કરવાનું વિચારી રહી છે, જે ક્રિકેટનો ચહેરો સંપૂર્ણપણે બદલી શકે છે. આ મોટા ફેરફારોમાં ODI મેચોની સંખ્યા ઘટાડવા અને ચેમ્પિયન્સ લીગની જેમ નવી વર્લ્ડ T20 ટુર્નામેન્ટ શરૂ કરવા જેવા આશ્ચર્યજનક પ્રસ્તાવોનો સમાવેશ થાય છે. એક અહેવાલ મુજબ, 8 જુલાઈએ સ્કોટલેન્ડના એડિનબર્ગમાં યોજાનારી ICC વાર્ષિક સામાન્ય સભા (AGM) માં તમામ 12 પૂર્ણ સભ્ય દેશો વચ્ચે આ પ્રસ્તાવો પર ગંભીરતાથી ચર્ચા કરવામાં આવશે.
ICCનો ‘માસ્ટર પ્લાન’
હકીકતમાં, ICC એ અમેરિકન કન્સલ્ટિંગ ફર્મ મેકકિન્સીને ક્રિકેટના ભવિષ્ય પર વિચાર કરવાનું કામ સોંપ્યું છે. આ સમગ્ર બ્લુપ્રિન્ટ તે વ્યૂહાત્મક સમીક્ષાનો એક ભાગ છે. ICC આ અનોખા વિચારો દ્વારા T20 ક્રિકેટના વધતા વર્ચસ્વ વચ્ચે ટેસ્ટ અને ODI ફોર્મેટને જીવંત રાખવા અને વૈશ્વિક સ્તરે રમતને લોકપ્રિય બનાવવાનો પ્રયાસ કરી રહી છે. ક્રિકેટ વિશ્વની સૌથી લોકપ્રિય રમતોમાંની એક હોઈ શકે છે, પરંતુ તેને વૈશ્વિક રમત બનાવવામાં પડકારો છે. નાના દેશોમાં ક્રિકેટની પહોંચ વધી છે, પરંતુ તેમનું લાંબા સમય સુધી ટકી રહેલું હજુ પણ અનિશ્ચિત છે.
સૌથી મોટો ફટકો ODI ક્રિકેટ પર પડશે!
T20 ના આગમન પછી, 50 ઓવરની મેચોમાં ચાહકોની રુચિ અને ઉત્સાહમાં સતત ઘટાડો થયો છે. તેથી, એવું માનવામાં આવે છે કે આ પરિવર્તનનો સૌથી પહેલો ભોગ ODI ક્રિકેટ બનશે. ભવિષ્યમાં, ODI ક્રિકેટનું સતત આયોજન કરવાને બદલે 50 ઓવરના વર્લ્ડ કપ શરુ થવાના 18 મહિના પહેલા જ ODI મેચો અને સિરીઝનું આયોજન થઈ શકે છે. ODI વર્લ્ડ કપ 4 વર્ષમાં એકવાર રમાય છે, તેથી 2027 ના વનડે વર્લ્ડ કપ પછી લગભગ અઢી વર્ષ સુધી ODI ક્રિકેટ રમાશે નહીં.
શું નવી T20 ટુર્નામેન્ટ શરૂ થશે?
T20 ક્રિકેટની વધતી જતી લોકપ્રિયતાને ધ્યાનમાં રાખીને, ICC એક નવી વૈશ્વિક ફ્રેન્ચાઇઝ ટુર્નામેન્ટ શરૂ કરવાનું પણ વિચારી રહી છે. આ ટુર્નામેન્ટ હવે બંધ થઈ ગયેલી ચેમ્પિયન્સ લીગ T20 જેવી જ હોઈ શકે છે, જ્યાં વિશ્વભરની લીગની ટોચની ટીમો ભાગ લેશે. એશિયા કપ જેવી ખંડીય ટુર્નામેન્ટની સંખ્યા વધારવા અને ત્રણેય ફોર્મેટ માટે કેલેન્ડરમાં અલગ વિન્ડો ફાળવવાની પણ યોજના છે.
WTC માં 3 નવી ટીમો જોડાશે
ટેસ્ટ ક્રિકેટને પ્રોત્સાહન આપવા માટે, ICC વર્લ્ડ ટેસ્ટ ચેમ્પિયનશિપનો વિસ્તાર કરવાની તૈયારી કરી રહ્યું છે. 2027 થી 2029 દરમિયાન યોજાનાર આગામી WTC ચક્રમાં ટીમોની સંખ્યા વધારીને 12 કરી શકાય છે. આ મહત્વપૂર્ણ નિર્ણયથી આયર્લેન્ડ, ઝિમ્બાબ્વે અને અફઘાનિસ્તાનને વર્લ્ડ ટેસ્ટ ચેમ્પિયનશિપમાં સીધો પ્રવેશ મળી શકે છે.
