Breaking News: 7 ટ્રોફી જીતાડનાર દિગ્ગજ 18 વર્ષ બાદ CSK થી થયો અલગ, ચેન્નાઈ સુપર કિંગ્સના સુવર્ણ યુગનો અંત
IPL 2027 પહેલા ચેન્નાઈ સુપર કિંગ્સમાં સૌથી મોટો ફેરફાર થયો છે. છેલ્લા 18 વર્ષથી ટીમ સાથે જોડાયેલો અને પાંચ IPL સહિત કુલ 7 ટ્રોફી જીતાડનાર દિગ્ગજ ટીમથી અલગ થયો છે. તેની વિદાય સાથે CSKના એક ઐતિહાસિક અને સફળ યુગનો અંત આવ્યો છે.
IPLની સૌથી સફળ ફ્રેન્ચાઈઝીઓમાંની એક ચેન્નાઈ સુપર કિંગ્સ (CSK) ના કેમ્પમાંથી મોટા સમાચાર આવ્યા છે. છેલ્લા 18 વર્ષથી ચેન્નાઈ સુપર કિંગ્સ અને ટીમ સાથે સંકળાયેલા હેડ કોચ સ્ટીફન ફ્લેમિંગે પરસ્પર સંમતિથી અલગ થવાનો નિર્ણય લીધો છે. ફ્રેન્ચાઈઝી અનુસાર, ફ્લેમિંગ અને CSK મેનેજમેન્ટ વચ્ચે અનેક રાઉન્ડની ચર્ચાઓ પછી આ મોટો નિર્ણય લેવામાં આવ્યો હતો, જેનાથી ચેન્નાઈ માટે એક ઐતિહાસિક યુગનો અંત આવ્યો છે.
ખેલાડીથી કોચ સુધીની સફર
ન્યૂઝીલેન્ડનો ભૂતપૂર્વ કેપ્ટન સ્ટીફન ફ્લેમિંગ 2008 માં IPL ની શરૂઆતની સિઝનમાં ચેન્નાઈ સુપર કિંગ્સમાં ખેલાડી તરીકે જોડાયો હતો. પછીના વર્ષે 2009 માં તેણે હેડ કોચની ભૂમિકા સંભાળી. 2009 થી 2026 સુધી ફ્લેમિંગે ભૂતપૂર્વ ભારતીય કેપ્ટન એમએસ ધોની સાથે મળીને એક જબરદસ્ત ભાગીદારી બનાવી, જેણે IPLમાં ઈતિહાસ રચ્યો. તેમની દેખરેખ હેઠળ CSK લીગની સૌથી સુસંગત અને સફળ ટીમ તરીકે ઉભરી આવી.
OFFICIAL ANNOUNCEMENT
The Super Kings and Head Coach Stephen Fleming have mutually decided to part ways.
Together, we shared one of the most successful and enduring partnerships in IPL history. The legacy you’ve built will continue to inspire us.With immense respect and… pic.twitter.com/qjvb4oZUuU
— Chennai Super Kings (@ChennaiIPL) July 13, 2026
ફ્લેમિંગના કાર્યકાળમાં CSKની ઐતિહાસિક સિદ્ધિઓ
સ્ટીફન ફ્લેમિંગે ચેન્નાઈ સુપર કિંગ્સને એક બ્રાન્ડ અને ચેમ્પિયન ટીમ બનાવવામાં મહત્વપૂર્ણ ભૂમિકા ભજવી હતી. આ 18 વર્ષના કાર્યકાળ દરમિયાન ચેન્નાઈ સુપર કિંગ્સે નોંધપાત્ર સફળતા મેળવી. ફ્લેમિંગના કોચિંગ હેઠળ ચેન્નાઈ સુપર કિંગ્સે પાંચ વખત IPL ટાઈટલ અને બે વખત ચેમ્પિયન્સ લીગ T20 ટ્રોફી જીતી. તેના માર્ગદર્શન હેઠળ CSK રેકોર્ડ 12 વખત પ્લેઓફમાં પહોંચ્યું. વધુમાં ફ્લેમિંગના કાર્યકાળ દરમિયાન ચેન્નાઈ રેકોર્ડ 10 વખત IPL ફાઈનલમાં પહોંચ્યું હતું.
IPL ઉપરાંત અન્ય લીગમાં કર્યું કોચિંગ
IPL ઉપરાંત ફ્લેમિંગે બાકીની સુપર કિંગ્સ ટીમો (SA20 માં જોબર્ગ સુપર કિંગ્સ અને MLC માં ટેક્સાસ સુપર કિંગ્સ) ને પણ કોચિંગ આપ્યું હતું. SA20 ની ચારેય સિઝન અને MLC ની પ્રથમ ત્રણ સિઝનમાં તેની ટીમો પ્લેઓફમાં પહોંચી પરંતુ ક્યારેય ફાઈનલમાં પહોંચી નહીં. 2026 ની MLC સિઝનમાં ટેક્સાસ સુપર કિંગ્સ સૌથી નીચે રહી અને પ્લેઓફ માટે ક્વોલિફાય કરવામાં નિષ્ફળ રહી, જે સુપર કિંગ્સ ફ્રેન્ચાઈઝી સાથે ફ્લેમિંગનું છેલ્લું કાર્ય સાબિત થયું.
