IND vs ZIM: અભિષેક શર્માનું ખરાબ ફોર્મ યથાવત, સતત 5 ઈનિંગમાં ફ્લોપ, આ બોલરનો ફરી બન્યો શિકાર
ઈંગ્લેન્ડ પ્રવાસમાં નિષ્ફળતા બાદ સંજુ સેમસનને ટીમ ઈન્ડિયામાંથી બહાર કરી દેવામાં આવ્યો હતો. પરંતુ હવે અભિષેક શર્મા પણ સતત પાંચમી મેચમાં ફ્લોપ રહ્યા બાદ તેના ટીમમાં સ્થાન સામે સવાલો થઈ રહ્યા છે. તેને પ્લેઈંગ 11 માંથી ભાર કરવાની માંગ થઈ રહી છે અને સંજુને પાછા ટીમમાં લાવવાની અપીલ કરવામાં આવી રહી છે.
સ્ટાર ભારતીય ઓપનર અભિષેક શર્માનું બેટ અચાનક શાંત પડી ગયું છે. આયર્લેન્ડ અને ઈંગ્લેન્ડ પ્રવાસ પર ઉતાર-ચઢાવવાળા પ્રદર્શન બાદ, અભિષેક ઝિમ્બાબ્વે પ્રવાસ પર સતત બીજી મેચમાં નિષ્ફળ ગયો. હરારેમાં પ્રથમ મેચમાં તે ફક્ત 1 રન બનાવીને આઉટ થયો હતો, બીજી મેચમાં ફક્ત 8 રન બનાવીને બીજી ઓવરમાં આઉટ થયો હતો. પરિણામે સંજુ સેમસનની જેમ પ્લેઈંગ ઈલેવનમાં તેના સ્થાન પર સવાલ થઈ રહ્યા છે.
અભિષેક શર્મા ઝિમ્બાબ્વેમાં પણ ફ્લોપ
ટીમ ઈન્ડિયાએ 25 જુલાઈ, શનિવારના રોજ હરારેમાં રમાઈ રહેલી T20 શ્રેણીની બીજી મેચમાં પ્રથમ બેટિંગ કરી હતી. આ વખતે અભિષેક શર્માએ પહેલી ઓવરમાં બે ચોગ્ગા ફટકારીને મજબૂત શરૂઆતની આશા જગાવી હતી. હકીકતમાં, પાછલી મેચમાં, તે આઠ બોલ સુધી રમી શક્યો હતો પરંતુ ફક્ત એક રન બનાવીને આઉટ થયો હતો. તેથી, આ વખતે તેની શરૂઆત આશાસ્પદ લાગી. જોકે, બીજી ઓવરમાં તેની શરૂઆતનો અંત આવ્યો.
સતત પાંચમી ઈનિંગમાં નિષ્ફળ
અભિષેકે ઝિમ્બાબ્વેના ફાસ્ટ બોલર બ્લેસિંગ મુઝારાબાની બોલ પર કટ શોટ રમ્યો, પરંતુ તે સીધો પોઇન્ટ ફિલ્ડરના હાથમાં ગયો, જેણે કોઈ ભૂલ કરી નહીં અને અભિષેક કેચ આઉટ થયો. આ સાથે, અભિષેકની 8 બોલમાં 8 રનની ઇનિંગનો અંત આવ્યો. શ્રેણીની બંને મેચમાં તેનું બેટ શાંત રહ્યું, અને અત્યાર સુધી તે 16 બોલમાં ફક્ત 9 રન જ બનાવી શક્યો છે. પરંતુ આ ફક્ત બીજી ઇનિંગ નથી, પરંતુ આ સતત પાંચમી ઇનિંગ છે જેમાં અભિષેક શર્મા નિષ્ફળ ગયો છે.
ઈંગ્લેન્ડમાં પણ ખરાબ પ્રદર્શન
આ બધું ઈંગ્લેન્ડ સામેની T20 શ્રેણીથી શરૂ થયું હતું, જ્યારે તેણે છેલ્લી ત્રણ મેચમાં અપેક્ષા મુજબ રન બનાવ્યા ન હતા. ઈંગ્લેન્ડ સામેની છેલ્લી ત્રણ મેચમાં અભિષેકનો સ્કોર 10, 16 અને 3 હતો. હવે, તે સતત પાંચ ઈનિંગમાં નિષ્ફળ ગયો છે, જેના કારણે પ્લેઈંગ ઈલેવનમાં તેના સ્થાન અંગે પ્રશ્નો ઉભા થયા છે અને ફરી એકવાર સંજુ સેમસનની વાપસીની માંગણીઓ તેજ થઈ રહી છે.
મુઝારાબાની સામે મુશ્કેલી
આ પ્રવાસ અભિષેક માટે પણ નિરાશાજનક સાબિત થયો છે કારણ કે બંને મેચમાં તે એક જ બોલર સામે આઉટ થયો હતો. 6 ફૂટ 8 ઇંચ ઊંચા બ્લેસિંગ મુઝારાબાનીએ બંને ઇનિંગમાં અભિષેકની વિકેટ લીધી હતી. પરંતુ ફક્ત આ બે ઇનિંગ જ નહીં, જ્યારે પણ અભિષેક અને મુઝારાબાની સામ-સામે આવે છે, ત્યારે અભિષેકને મુશ્કેલીનો સામનો કરવો પડ્યો છે. T20 મેચોમાં અભિષેકે અત્યાર સુધીમાં મુઝારાબાના 21 બોલનો સામનો કર્યો છે, જેમાં ફક્ત 8 રન બનાવ્યા છે, જ્યારે ત્રણ વખત વિકેટ ગુમાવી છે. આનો અર્થ એ છે કે અભિષેકે આગામી મેચમાં ન માત્ર રન બનાવવા પડશે, પણ આ બોલર સામે સારું પ્રદર્શન પણ કરવું પડશે.
IND vs ZIM: 4, 6, 4, 4 અને આઉટ… વૈભવ સૂર્યવંશી અને આ બોલર વચ્ચે મજેદાર મુકાબલો, એક જ ઓવરમાં જોરદાર એક્શન
Published On - 7:35 pm, Sat, 25 July 26
