Breaking: IND vs PAK: ભારતના ‘અર્જુન’નું પરાક્રમ! પાકિસ્તાન સામે 80 બોલમાં તોફાની સેન્ચુરી ફટકારી રચ્યો ઇતિહાસ

જે પિચ પર વિરેન્દ્ર સહેવાગ અને રાહુલ દ્રવિડ જેવા દિગ્ગજોના પુત્રો સદંતર નિષ્ફળ રહ્યા, તે જ 22 યાર્ડની પિચ પર છોલે-કુલચેની લારી ચલાવતા એક પિતાના દીકરાએ પાકિસ્તાન સામે અદ્ભુત કમાલ કરી બતાવી. વાત થઈ રહી છે અર્જુન રાજપૂતની, જેણે માત્ર 80 બોલમાં પાકિસ્તાન સામે સદી ફટકારી દીધી. અર્જુન રાજપૂતની આ સદી એટલા માટે ખાસ છે કારણ કે જ્યારે તે ક્રિઝ પર આવ્યો ત્યારે ભારતીય અંડર-19 ટીમ મુશ્કેલીમાં હતી. ટીમે 42 રન પર 4 વિકેટ ગુમાવી દીધી હતી, પરંતુ અર્જુને મેદાનમાં આવતાની સાથે જ પાકિસ્તાની બોલરોને જડબાતોડ જવાબ આપ્યો.

અર્જુન રાજપૂતની શાનદાર સદી

અર્જુન રાજપૂતે 12મી ઓવરમાં ક્રિઝ પર પગ મૂક્યો હતો, તે સમયે ટીમનો રન રેટ 3 રન પ્રતિ ઓવર ચાલી રહ્યો હતો. પરંતુ આ ડાબોડી બેટ્સમેને પોતાના ચોથા બોલ પર જ ચોગ્ગો ફટકારીને પોતાના ઈરાદા સ્પષ્ટ કરી દીધા હતા. રિઝવાનુલ્લાહ અને નિકાબ શફીક સામે આક્રમક અંદાજ અપનાવીને તેણે સેન્ચુરી લગાવી. અલી રઝા, જેણે ઘાતક બોલિંગ કરીને ભારતીય ટોપ ઓર્ડરને હચમચાવી દીધો હતો, તેને પણ અર્જુને બેકફૂટ પર ધકેલી દીધો. તેની ઓવરમાં અર્જુને એક શાનદાર સિક્સર અને એક ચોગ્ગો ફટકાર્યો. આ ખેલાડીએ 4 સિક્સર અને 11 ચોગ્ગાની મદદથી પોતાની સદી પૂરી કરી.

કોણ છે અર્જુન રાજપૂત?

અર્જુન રાજપૂત જાલંધરનો રહેવાસી છે. તેના પિતાનું નામ હોતી રામ છે, જેઓ પહેલાં છોલે-કુલચેની લારી ચલાવતા હતા. અત્યંત ગરીબી હોવા છતાં તેમણે પોતાના પુત્ર અર્જુનને ક્રિકેટર બનાવ્યો. આ ડાબોડી બેટ્સમેને હરભજન સિંહ એકેડેમીમાંથી તાલીમ મેળવી છે. પોતાની પ્રતિભાના દમ પર તે પંજાબ અંડર-16 ટીમનો કેપ્ટન પણ બન્યો હતો. વિનુ માંકડ ટ્રોફી અને કૂચ બિહાર ટ્રોફીમાં શાનદાર પ્રદર્શન કરીને તે અંડર-19 ટીમમાં સામેલ થયો. ઉલ્લેખનીય છે કે, આ ખેલાડી એક શ્રેષ્ઠ ઓફ સ્પિનર પણ છે. છેલ્લી મેચમાં આ ખેલાડીએ માત્ર 8 રન આપીને 3 વિકેટ ઝડપી હતી.

આયુર્વેદમાં સ્વાસ્થ્યનો ખજાનો ગણાય છે આ 5 પરંપરાગત નિયમો, ધન્વંતરિ જયંતિ પર જાણો નિરોગી જીવનનો સાચો આધાર