T20 ક્રિકેટમાં અંતિમ ઓવરોમાં ઝડપથી રન બનાવીને ટીમને જીત અપાવનાર બેટ્સમેનની ભૂમિકા અત્યંત મહત્ત્વપૂર્ણ હોય છે. ભારતીય ટીમમાં લાંબા સમયથી હાર્દિક પંડ્યા આ જવાબદારી સંભાળતો આવ્યો છે. જોકે, ટીમને આ ભૂમિકામાં વધુ વિકલ્પો મળે તે જરૂરી છે. આવી સ્થિતિમાં નમન ધીર પોતાની આક્રમક બેટિંગ અને દબાણમાં શાંત રહીને રમવાની ક્ષમતાથી પસંદગીકારોનું ધ્યાન ખેંચી રહ્યો છે.

છવાઈ ગયો નમન ધીર

ન્યૂઝીલેન્ડ સામેની પ્રથમ T20Iમાં નમને પોતાની ક્ષમતા સાબિત કરી હતી. ભારતને 226 રનના લક્ષ્યાંકનો પીછો કરવાનો હતો અને 167 રનમાં પાંચ વિકેટ પડી જતાં ટીમ મુશ્કેલીમાં હતી. ભારતને જીતવા માટે 33 બોલમાં લગભગ 60 રનની જરૂર હતી. આ સમયે નમન ધીરે ક્રિઝ પર આવીને આક્રમક બેટિંગ શરૂ કરી હતી. તેણે મિચેલ સેન્ટનરની ઓવરમાં છગ્ગો અને ચોગ્ગો ફટકારીને ન્યૂઝીલેન્ડ પર દબાણ વધાર્યું હતું.

15 બોલમાં 42 રન ફટકારી ટીમને અપાવી જીત

નમન અહીં અટક્યો નહોતો. તેણે સતત બાઉન્ડરી ફટકારીને માત્ર 15 બોલમાં અણનમ 42 રન બનાવ્યા હતા. તેના આ પ્રદર્શનને કારણે ભારતે બે બોલ બાકી રાખીને લક્ષ્યાંક હાંસલ કરી લીધો હતો. આ સાથે નમન સફળ T20I રનચેઝમાં સાતમા કે તેનાથી નીચેના ક્રમે બેટિંગ કરતાં સૌથી વધુ વ્યક્તિગત સ્કોર બનાવનાર ભારતીય ખેલાડી બન્યો હતો. આ પહેલાં તેણે વેસ્ટ ઈન્ડિઝ સામેની વરસાદથી પ્રભાવિત બેંગલુરુ T20Iમાં પણ માત્ર છ બોલમાં 24 રન બનાવ્યા હતા.

રવિ શાસ્ત્રીએ કર્યા વખાણ

નમન ધીરની બેટિંગથી પ્રભાવિત થઈને રવિ શાસ્ત્રીએ તેની મહેનતને સફળતાનું મુખ્ય કારણ ગણાવ્યું હતું. રવિ શાસ્ત્રીના જણાવ્યા અનુસાર, નમન નેટ્સમાં વહેલો પહોંચે છે અને થ્રોડાઉન સેશનમાં પણ સતત મહેનત કરે છે. તેની પાસે પ્રતિભાની સાથે રમત પ્રત્યેની શિસ્ત પણ છે. શાસ્ત્રીએ પેસ અને બાઉન્સ સામે નમનની બેટિંગ કરવાની ક્ષમતાને વિદેશી પરિસ્થિતિઓ માટે ઉપયોગી ગણાવી હતી.

શ્રેયસ અય્યરે નમનની પ્રશંસા કરી

શ્રેયસ અય્યરે પણ નમનના સંયમ અને શાંત સ્વભાવની પ્રશંસા કરી હતી. બીજી તરફ, મોહમ્મદ કૈફે તેને ભારતનો નવો ફિનિશર ગણાવ્યો હતો. હાર્દિક પંડ્યાની ફિટનેસને ધ્યાનમાં રાખતાં નમનનું આ પ્રદર્શન ટીમ માટે મહત્ત્વપૂર્ણ બની શકે છે. જોકે, તેને આ ભૂમિકામાં નિયમિત તક અને સતત સારા પ્રદર્શન દ્વારા પોતાની જગ્યા મજબૂત કરવી પડશે.

SA vs AUS: દક્ષિણ આફ્રિકાએ બીજી ટેસ્ટમાં ઓસ્ટ્રેલિયાને હરાવી હિસાબ બરાબર કર્યો, હેડે પહેલીવાર જોયો આવો દિવસ