Breaking News: અફઘાનિસ્તાન સામે 349 રન બનાવવા છતાં હારી ટીમ ઈન્ડિયા, વરસાદે બગાડી રમત

ઈન્ડિયા A ટીમ હાલમાં ત્રિકોણીય શ્રેણી માટે શ્રીલંકાના પ્રવાસે છે. શ્રેણીની બીજી મેચમાં મોટો અપસેટ સર્જાયો હતો. અફઘાનિસ્તાન A ટીમે ડકવર્થ-લુઈસ પદ્ધતિના આધારે ઈન્ડિયા A ને 4 રને હરાવ્યું હતું.

India A Lost matchImage Credit source: X/BCCI

Smit Chauhan | Updated on: Jun 11, 2026 | 8:14 PM

શ્રીલંકાના દામ્બુલામાં રમાયેલી ત્રિકોણીય શ્રેણીની બીજી મેચમાં, કુદરતનો પ્રકોપ ટીમ ઈન્ડિયા પર ભારે પડ્યો હતો. ભારતીય બેટ્સમેનોના મજબૂત પ્રદર્શનને કારણે 349 રનના વિશાળ સ્કોર છતા, વારંવાર વરસાદ બાદ ડકવર્થ-લુઈસ (DLS) પદ્ધતિના આધારે અફઘાનિસ્તાન A ટીમને ચાર રનથી વિજેતા જાહેર કરવામાં આવી અને શ્રેણીમાં ભારતની પહેલી હાર થઈ.

ટીમ ઈન્ડિયાની આક્રમક શરૂઆત

ભારતીય ટીમ મેચમાં દરેક મોરચે આગળ દેખાતી હતી, પરંતુ વરસાદને કારણે રમત અચાનક બંધ થઈ જવાથી ક્રિકેટના સૌથી જટિલ નિયમના આધારે મેચનો નિર્ણય લેવાની ફરજ પડી. ટોસ હારીને પહેલા બેટિંગ કરવાનો નિર્ણય લીધા પછી, ભારતીય A ટીમે ખૂબ જ આક્રમક શરૂઆત કરી.

વૈભવ સૂર્યવંશીના 22 બોલમાં 44 રન

યુવા બેટ્સમેન વૈભવ સૂર્યવંશીએ શરૂઆતની ઓવરોમાં માત્ર 22 બોલમાં 44 રન બનાવીને ટીમ ઈન્ડિયાને ઝડપી શરૂઆત આપી. ત્યારબાદ વિકેટકીપર-બેટ્સમેન પ્રભસિમરન સિંહે બાજી સંભાળી. તેણે 69 બોલમાં 84 રનની ઈનિંગ રમી, જેમાં 14 ચોગ્ગાનો સમાવેશ થાય છે.

ભારતે 349 રનનો સ્કોર બનાવ્યો

ત્યારબાદ, વાઈસ કેપ્ટન ઋતુરાજ ગાયકવાડ અને કેપ્ટન તિલક વર્માએ પોતાનો ક્લાસ બતાવ્યો. બંને બેટ્સમેનોએ શાનદાર અડધી સદી ફટકારી. બંનેએ 66-66 રનનું યોગદાન આપ્યું. અંતે, સૂર્યાંશ શેડગેના આકમક 40 રનની મદદથી ભારતે 49 ઓવરમાં 9 વિકેટે 349 રનનો વિશાળ સ્કોર બનાવ્યો.

Afghanistan A won by 4 runs (DLS Method).

India A will now shift focus towards their next fixture in the #TriNationSeries.

Scorecard ▶️ https://t.co/dMNsGrzIOD #INDAvAFGA pic.twitter.com/XDa1P3tNMg

— BCCI (@BCCI) June 11, 2026

વરસાદે ભારતની રમત બગાડી

ભારતીય ઈનિંગ સમાપ્ત થયા પછી હવામાન બદલાયું. ભારે વરસાદને કારણે રમત ઘણા સમય માટે રોકાઈ ગઈ, જેના કારણે ઓવરો ઘટાડવાની ફરજ પડી. અફઘાનિસ્તાન A ને જીતવા માટે 38 ઓવરમાં 294 રન બનાવવાનો ટાર્ગેટ મળ્યો હતો. જવાબમાં, અફઘાનિસ્તાને મજબૂત શરૂઆત કરી. ઓપનર હસન ઈશખિલ 34 રન બનાવીને આઉટ થયો પછી, કેપ્ટન ઈમરાન મીરે અણનમ 75 અને બહિર શાહે અણનમ 51 રન બનાવીને ભારતીય બોલરોની ધુલાઈ કરી. બંનેએ ત્રીજી વિકેટ માટે 108 રનની ભાગીદારી કરી.

ડકવર્થ-લુઈસ પદ્ધતિથી જીત્યું અફઘાનિસ્તાન

જ્યારે અફઘાનિસ્તાને 25.5 ઓવરમાં 2 વિકેટ ગુમાવીને 177 રન બનાવ્યા હતા, ત્યારે દામ્બુલામાં ફરી ભારે વરસાદ શરૂ થયો. જ્યારે રમત બીજી વખત બંધ કરવામાં આવી, ત્યારે સત્તાવાર પરિણામ માટે જરૂરી ઓછામાં ઓછી ઓવરો પહેલાથી જ રમાઈ ચૂકી હતી. ડકવર્થ-લુઈસ પદ્ધતિ મુજબ 25.5 ઓવર પછી અફઘાનિસ્તાનનો પાર સ્કોર 173 રન હોવો જોઈએ અને તે સમય સુધીમાં અફઘાનિસ્તાન 177 રન બનાવી ચૂક્યું હતું, તેથી તેઓ જરૂરી સ્કોરથી 4 રન આગળ હતા અને તેમને વિજેતા જાહેર કરવામાં આવ્યા.