Breaking News: પિતાએ નોકરી છોડી બનાવ્યો ક્રિકેટર, દીકરાએ ફટકારી ત્રેવડી સદી, બરોડાના પ્રિયાંશુએ રચ્યો ઈતિહાસ

બરોડાના 21 વર્ષીય બેટ્સમેન પ્રિયાંશુ મોલિયાએ જમ્મુ-કાશ્મીર સામે શાનદાર ત્રેવડી સદી ફટકારીને રણજી ટ્રોફીમાં ઈતિહાસ રચ્યો છે. પ્રિયાંશુએ 321 રનની અણનમ ઇનિંગ રમીને 79 વર્ષ જૂનો રેકોર્ડ પોતાના નામે કર્યો. તેની આ ઐતિહાસિક સિદ્ધિ પાછળ પિતા સુરેશ મોલિયાનો મોટો ત્યાગ છે, જેમણે પુત્રને ક્રિકેટર બનાવવા નોકરી છોડી અને રાજકોટથી વડોદરા સ્થળાંતર કર્યું હતું.

priyanshu moliyaImage Credit source: X

Smit Chauhan | Updated on: Oct 27, 2026 | 9:16 PM

બરોડાના ટોપ ઓર્ડર બેટ્સમેન પ્રિયાંશુ મોલિયાએ ફરી એકવાર પોતાની પ્રતિભા સાબિત કરી છે. માત્ર 21 વર્ષની ઉંમરે, તેણે જમ્મુ અને કાશ્મીર સામે બેવડી સદી નહીં, પરંતુ ત્રેવડી સદી ફટકારી હતી. વડોદરામાં રમાયેલી મેચમાં પ્રિયાંશુએ 321 રન બનાવ્યા અને અંત સુધી અણનમ રહ્યો. વડોદરા 616 રનમાં ઓલઆઉટ થઈ ગયું, જેમાં પ્રિયાંશુની ત્રેવડી સદી અને મહેશ પિઠિયાએ પણ શાનદાર સદી ફટકારી હતી. પ્રિયાંશુની સદી ઐતિહાસિક છે, જે 79 વર્ષમાં પહેલીવાર રણજી ટ્રોફીમાં વડોદરાના કોઈ બેટ્સમેન દ્વારા ત્રેવડી સદી ફટકારવામાં આવી છે.

પ્રિયાંશુ મોલિયાની ઐતિહાસિક ત્રેવડી સદી

પ્રિયાંશુ મોલિયાએ વડોદરા માટે ત્રેવડી સદી ફટકારવાના ગુલ મોહમ્મદના રેકોર્ડને તોડી નાખ્યો છે. ગુલ મોહમ્મદે 1947માં હોલકર સામે ૩૧૯ રન બનાવ્યા હતા. પ્રિયાંશુએ તેમને પાછળ છોડી દીધા હતા. 1947 પછી ત્રેવડી સદી ફટકારનાર તે વડોદરાનો પ્રથમ બેટ્સમેન પણ છે. આ પહેલા દીપક હુડ્ડાએ 2016માં 293 રન બનાવ્યા હતા.

Baroda’s Priyanshu Moliya struck an unbeaten 321 against the defending champions Jammu and Kashmir to help his team post a massive first innings total of 616.

#RanjiTrophy #Baroda https://t.co/TJapTUzM3R

— Circle of Cricket (@circleofcricket) October 27, 2026

પ્રિયાંશુ મોલિયા કોણ છે?

પ્રિયાંશુ મોલિયાનો જન્મ 17 જૂન, 2025ના રોજ રાજકોટમાં થયો હતો. તે ભારતીય અંડર-19 ટીમનો સભ્ય પણ રહી ચૂક્યો છે. તે 2024માં અંડર-19 વર્લ્ડ કપ ટીમનો ભાગ હતો. 17 વર્ષની ઉંમરે તેણે રણજી ટ્રોફીમાં ડેબ્યૂ કર્યું અને સતત બે સદી ફટકારી હતી. તે નારી કોન્ટ્રાક્ટર પછી આવું કરનાર પ્રથમ બેટ્સમેન બન્યો હતો. તાજેતરમાં તેણે વિજય હજારે ટ્રોફીમાં પણ 379 રન બનાવ્યા, જેમાં બે સદીનો સમાવેશ થાય છે.

પિતાનું બલિદાન, પુત્રની મહેનત

પ્રિયાંશુના પિતા, સુરેશ મોલિયાએ તેને ક્રિકેટર બનાવવા માટે ઘણા બલિદાન આપ્યા. તેમણે હીરાના વ્યવસાયમાં કામ કર્યું પરંતુ પોતાના પુત્રને ક્રિકેટર બનાવવા માટે નોકરી છોડી દીધી. ત્યારબાદ તેમણે પોતાનું સંપૂર્ણ ધ્યાન પ્રિયાંશુની પ્રેક્ટિસ અને મેચ ટ્રાવેલ પર સમર્પિત કર્યું. પોતાના પુત્રને ક્રિકેટર બનાવવા માટે, તેમણે પોતાનું ઘર રાજકોટથી વડોદરા ખસેડ્યું, જ્યાં મોહિન્દર લાલા અમરનાથ ક્રિકેટ એકેડેમીમાં પ્રિયાંશુએ તેના પહેલા વર્ષમાં 1,100 રન અને બીજા વર્ષમાં 1,500 રન બનાવ્યા. તેણે એક મેચમાં 556 રન પણ બનાવ્યા. હવે, આ ખેલાડી રણજી ટ્રોફીમાં પોતાનું કૌશલ્ય બતાવી રહ્યો છે.