બાબર આઝમનો 20-30 ઓવરનો પ્લાન, જે પાકિસ્તાનને સેમી ફાઈનલમાં લઈ જશે!
વર્લ્ડ કપ સેમી ફાઈનલમાં પહોંચવાની પાકિસ્તાન ટીમની તમામ આશાઓ ખતમ થઈ ગઈ છે, છતાં તેમના કેપ્ટન બાબર આઝમને જીતની આશા છે. બાબર આઝમનું માનવું છે કે ક્રિકેટમાં કંઈ પણ થઈ શકે છે. એવામાં પાકિસ્તાન ઈંગ્લેન્ડને 280થી વધુ રનના માર્જિનથી કેવી રીતે હરાવશે એ મોટો પ્રશ્ન છે.
પાકિસ્તાન ક્રિકેટ ટીમની સફર વર્લ્ડ કપ 2023માં સમાપ્ત થવાના આરે છે. ન્યુલેન્ડની જીતે પાકિસ્તાનની સેમી ફાઈનલમાં પહોંચવાની આશા લગભગ ખતમ કરી નાખી છે. સ્થિતિ એવી છે કે જો પાકિસ્તાનને સેમી ફાઈનલમાં પહોંચવું હોય તો તેણે અશક્યને શક્ય બનાવવું પડશે અને કેપ્ટન બાબર આઝમે જાહેરાત કરી છે કે તેની ટીમે પણ આ માટે પ્લાન તૈયાર કરી લીધો છે.
ક્રિકેટમાં કંઈ પણ થઈ શકે છે : બાબર
પાકિસ્તાની ટીમની 8માંથી 4 મેચમાં હારને કારણે સેમી ફાઈનલમાં પહોંચવાની આશા પહેલાથી કઠિન હતી. તેમને શ્રીલંકા તરફથી મદદની જરૂર હતી પરંતુ તેમ ન થયું અને ન્યુઝીલેન્ડે તેમને ખૂબ જ સરળતાથી હરાવ્યાં. આ સાથે ન્યુઝીલેન્ડનું સ્થાન લગભગ નિશ્ચિત થઈ ગયું હતું અને પાકિસ્તાનની રમત લગભગ પૂરી થઈ ગઈ હતી. હવે પાકિસ્તાનને ઈંગ્લેન્ડને 287 રનથી હરાવવું પડશે અથવા 3 ઓવરમાં રનનો ટાર્ગેટ ચેઝ કરવો પડશે.
બાબર આઝમ મીડિયાની સામે
હવે 3 ઓવરમાં રન ચેઝનું સમીકરણ અશક્ય છે પરંતુ પ્રથમ સમીકરણથી હજુ પણ નેટ રન રેટ ન્યુઝીલેન્ડથી આગળ લઈ જવાની થોડી શક્યતા છે અને પાકિસ્તાની કેપ્ટનને પણ એવી જ આશા છે. કોલકાતાના ઈડન ગાર્ડન્સમાં શનિવાર 11મી ઓક્ટોબરે યોજાનારી મેચના એક દિવસ પહેલા બાબર આઝમ જ્યારે મીડિયાની સામે આવ્યો ત્યારે બાબરે કહ્યું કે ક્રિકેટમાં કંઈપણ શક્ય છે અને તેની ટીમ ટૂર્નામેન્ટને જોરદાર રીતે સમાપ્ત કરવાનો પ્રયાસ કરશે.
20-30 ઓવર માટે બાબરની યોજના
પાકિસ્તાની સુકાનીએ વધુમાં કહ્યું કે તેમની ટીમ પાસે નેટ રન રેટ સુધારવાની યોજના છે. બાબરે તેની યોજનાની ટૂંકી ઝલક આપી, જે મુખ્યત્વે વિસ્ફોટક ઓપનર ફખર ઝમાનની આસપાસ ફરે છે. બાબરે કહ્યું કે ટીમે પ્રથમ 10 અને તેના પછીની ઓવર માટે પ્લાન બનાવ્યો છે. બાબરે એવી પણ આશા વ્યક્ત કરી કે જો ફખર 20-30 ઓવર સુધી ટકી શકે તો તેની ટીમ આ રન રેટ હાંસલ કરી શકે છે.
ઈંગ્લેન્ડ માટે મેચમાં જીત જરૂરી
હવે બાબર અને તેની ટીમે ભલે યોજના બનાવી હોય પરંતુ તે બિલકુલ સરળ નથી. ઈંગ્લેન્ડ સામે લગભગ 287 રનથી જીતવા માટે, પાકિસ્તાને પોતે 400 થી વધુ રન બનાવવા પડશે અને પછી ઈંગ્લેન્ડને 120 રનથી ઓછા રનમાં આઉટ કરવું પડશે. આ વર્લ્ડ કપમાં ઈંગ્લેન્ડનું પ્રદર્શન ભલે સારું ન રહ્યું હોય, પરંતુ આ મેચ તેમના માટે પણ મહત્વપૂર્ણ છે કારણ કે અહીં જીતીને જ તેઓ ચેમ્પિયન્સ ટ્રોફીની ટિકિટ મેળવી શકશે.
આ પણ વાંચો: ઈંગ્લિશ ટીમનો ભારત પ્રવાસ, ટેસ્ટ અને ટી-20 સીરિઝ માટે ટીમની કરી જાહેરાત