ઓસ્ટ્રેલિયા અને બાંગ્લાદેશ વચ્ચે ગ્રેટ બેરિયર રીફ એરેના મેકે ખાતે રમાઈ રહેલી બીજી અને અંતિમ ટેસ્ટ મેચના પહેલા જ દિવસે બોલરોએ એવી તબાહી મચાવી જેની કોઈએ કલ્પના પણ ન કરી હોય. મિશેલ સ્ટાર્કની આગેવાની હેઠળના ઓસ્ટ્રેલિયન પેસ આક્રમણે પ્રથમ ઇનિંગમાં બાંગ્લાદેશને ફક્ત 64 રનમાં ઓલઆઉટ કરી દીધું હતું, જ્યારે બાંગ્લાદેશી બોલરોએ બીજી ઇનિંગમાં ચમત્કારિક વાપસી કરી અને દિવસના અંત સુધીમાં આઠ ઓસ્ટ્રેલિયન વિકેટો ઝડપી હતી.

ઓસ્ટ્રેલિયામાં ટેસ્ટના પહેલા દિવસે 18 વિકેટ પડી

મેકે ટેસ્ટના પહેલા દિવસે કુલ 74 ઓવર રમાઈ હતી, જેમાં બંને ટીમોએ સંયુક્ત રીતે 229 રન બનાવ્યા હતા અને 18 વિકેટ ગુમાવી હતી. છેલ્લા 51 વર્ષમાં ઓસ્ટ્રેલિયાની ધરતી પર ટેસ્ટ મેચના પહેલા દિવસે આટલી બધી વિકેટ પડી હોવાની આ ત્રીજી ઘટના છે. આ પહેલા ફક્ત બે વાર એક જ દિવસમાં 18 કે તેથી વધુ વિકેટ પડી છે.

સ્ટાર્કે પહેલી ઇનિંગમાં તબાહી મચાવી

મેચની શરૂઆતમાં ઓસ્ટ્રેલિયન બોલરોએ પ્રભુત્વ જમાવ્યું હતું. મિશેલ સ્ટાર્કે ઘાતક સ્વિંગ બોલિંગથી છ વિકેટ લીધી હતી. કેપ્ટન પેટ કમિન્સે ત્રણ અને જોશ હેઝલવુડે એક વિકેટ લીધી, જેનાથી બાંગ્લાદેશની ટીમ પ્રથમ ઇનિંગમાં 64 રનમાં ઓલઆઉટ થઈ ગઈ. પરંતુ જ્યારે ઓસ્ટ્રેલિયા બેટિંગ કરવા આવ્યું, ત્યારે બાંગ્લાદેશી ડાબોડી ફાસ્ટ બોલર શરીફુલ ઇસ્લામે કાંગારૂ બેટ્સમેનોનો સામે ભારે વિનાશ વેર્યો.

શરીફુલ ઇસ્લામે 6 વિકેટ લીધી

શરીફુલે 11 ઓવરમાં 35 રન આપીને 6 વિકેટ લીધી હતી. આ દરમિયાન તેણે ટ્રેવિસ હેડ, માર્નસ લાબુશેન, સ્ટીવ સ્મિથ, બ્યુ વેબસ્ટર, પેટ કમિન્સ અને મિશેલ સ્ટાર્કને આઉટ કર્યા હતા. તસ્કિન અહેમદ અને મેહદી હસન મિરાઝે 1-1 વિકેટ લીધી હતી. પરિણામે, ઓસ્ટ્રેલિયાએ પ્રથમ દિવસની રમત 8 વિકેટે 165 રન પર પૂરી કરી. કેમેરોન ગ્રીન 51 રન બનાવીને અણનમ રહ્યો, જ્યારે નાથન લિયોન તેની સાથે ક્રીઝ પર હતો. આ મેચનો બીજો દિવસ ખૂબ જ રોમાંચક બનવાનો છે.

Viral Girl: ‘6-7’ સેલિબ્રેશનથી ઈન્ટરનેટ સેન્સેશન બની ગયેલી દિલ્હીની યુવા મહિલા ક્રિકેટર કોણ છે?