દુલીપ ટ્રોફીમાં 15 વર્ષીય વૈભવ સૂર્યવંશીની શાનદાર કપ્તાની, લીધો પહેલો DRS અને મુકેશ કુમારને અપાવી મોટી વિકેટ
દુલીપ ટ્રોફીમાં ઈસ્ટ ઝોનની કેપ્ટનશીપ કરી રહેલા 15 વર્ષીય વૈભવ સૂર્યવંશીએ સેન્ટ્રલ ઝોન સામે છેલ્લી 3 સેકન્ડમાં સફળ DRS લઈને મુકેશ કુમારને ઓપનર આર્યન જુયાલની મહત્વપૂર્ણ વિકેટ અપાવી હતી. નિયમિત કેપ્ટન ઈશાન કિશન ઈજાગ્રસ્ત થતાં વૈભવ કાર્યકારી કેપ્ટનની ભૂમિકા ભજવી રહ્યો છે.
વૈભવ સૂર્યવંશીની ઉંમર માત્ર 15 વર્ષની છે, પરંતુ તેની ક્રિકેટની સમજ કોઈ અનુભવી દિગ્ગજ ખેલાડીથી ઓછી નથી. તેની બેટિંગમાં તો આપણે આ કૌશલ્ય અગાઉ ઘણી વખત જોયું જ છે, પરંતુ હવે કેપ્ટન તરીકેની પોતાની પહેલી કસોટીમાં પણ તે બેમિસાલ સાબિત થઈ રહ્યો છે. વૈભવ સૂર્યવંશીએ દુલીપ ટ્રોફીમાં કેપ્ટન તરીકે એક એવો મોટો નિર્ણય લીધો, જેમાં મોટા-મોટા નામી કેપ્ટનો પણ ઘણીવાર થાપ ખાઈ જતા હોય છે. જોકે, વૈભવનો આ નિર્ણય સો ટકા સાચો સાબિત થયો હતો.
કેપ્ટન વૈભવે લીધો પ્રથમ DRS
વૈભવ સૂર્યવંશીની ચતુર કપ્તાનીનો આ શાનદાર નજારો સેન્ટ્રલ ઝોનની ઇનિંગ્સની 40મી ઓવરમાં જોવા મળ્યો હતો. મુકેશ કુમારની આ ઓવરના બીજા બોલ પર કેચની જોરદાર અપીલ થઈ હતી, જેને મેદાન પરના અમ્પાયરે નકારી કાઢી હતી. આ સ્થિતિમાં મુકેશ કુમારે કેપ્ટન તરફ જોયું અને ઈશારો કર્યો કે બોલ બેટની ધાર સાથે અથડાયો છે. આખરી નિર્ણય કેપ્ટન વૈભવે લેવાનો હતો. એક નીડર કેપ્ટન તરીકે તેણે પોતાના બોલર પર પૂરો વિશ્વાસ મૂક્યો અને જ્યારે રિવ્યુ માટે માત્ર 3 સેકન્ડ બાકી હતી, ત્યારે DRS લેવાનો સાહસિક નિર્ણય કર્યો.
DRS નો નિર્ણય રહ્યો સફળ, મુકેશ કુમારને મળી વિકેટ
ઈસ્ટ ઝોનની કેપ્ટનશીપ કરી રહેલા વૈભવ સૂર્યવંશીનો આ પહેલો જ DRS નિર્ણય સંપૂર્ણપણે સાચો પડ્યો. પરિણામે મુકેશ કુમારને સેન્ટ્રલ ઝોનના સેટ ઓપનર આર્યન જુયાલની કિંમતી વિકેટ મળી ગઈ. આર્યન જુયાલ 113 બોલમાં 46 રન બનાવીને આઉટ થયો અને તે મેચમાં મુકેશ કુમારનો બીજો શિકાર બન્યો.
વૈભવ સૂર્યવંશી કેમ કરી રહ્યો છે ઈસ્ટ ઝોનની કપ્તાની?
વૈભવ સૂર્યવંશીને દુલીપ ટ્રોફી માટે ઈસ્ટ ઝોનના વાઇસ-કેપ્ટન બનાવવામાં આવ્યા હતા. જોકે, સેન્ટ્રલ ઝોન સામેના સેમિફાઇનલ મુકાબલામાં નિયમિત કેપ્ટન ઈશાન કિશનને હાથમાં ઈજા થવાના કારણે તે મેદાનની બહાર છે. ઈશાન કિશનની ગેરહાજરીમાં વૈભવ કાર્યકારી કેપ્ટનની મહત્વની ભૂમિકા નિભાવી રહ્યો છે.
જુઓ Video
Stand-in Captain Vaibhav Sooryavanshi goes for the review with 3 seconds remaining…and gets it right
DRS done right as the set Aryan Juyal (46) is dismissed ✅
The celebrations say it all #DuleepTrophy pic.twitter.com/IwBQbr8hJQ
— BCCI Domestic (@BCCIdomestic) August 30, 2026
