હોળીનો જાદુ સાત સમુંદર પાર ! વિશ્વના આ દેશોમાં પણ મનાવાય છે હોળી; જુઓ લિસ્ટ
હોળી એટલે માત્ર રંગોનો તહેવાર જ નહીં, પણ ખુશીઓ વહેંચવાનો અવસર. શું તમે જાણો છો કે ભારતની જેમ જ થાઈલેન્ડ, સ્પેન અને ઈટાલી જેવા દેશોમાં પણ હોળી જેવા જ અનોખા ઉત્સવો ઉજવાય છે? જાણો વિશ્વના આ 7 સૌથી કલરફુલ ફેસ્ટિવલ્સ વિશે.
હોળી, રંગોનો તહેવાર, ભારતનો સૌથી ઉત્સાહભર્યો ઉત્સવ છે. જે અનિષ્ટ પર વિજય અને વસંતના આગમનનું પ્રતિક છે. પરંતુ આ જાદુ માત્ર ભારત પૂરતો મર્યાદિત નથી. દુનિયાભરમાં અલગ-અલગ સમુદાયો પોતાના અંદાજમાં હોળી જેવી જ મસ્તી કરે છે. ક્યાંક ફળો ફેંકાય છે તો ક્યાંક કાદવમાં રમાય છે. ચાલો જાણીએ દુનિયાના એવા તહેવારો જે તમને ભારતની હોળીની યાદ અપાવશે.
સોંગક્રાન (થાઈલેન્ડ - Songkran): થાઈલેન્ડમાં નવા વર્ષની ઉજવણી 'સોંગક્રાન' તરીકે થાય છે, જે વિશ્વની સૌથી મોટી 'વોટર ફાઈટ' ગણાય છે. લોકો રસ્તા પર ડોલ અને પાણીની બંદૂકો લઈને એકબીજાને પલાળે છે. આ તહેવાર ભૂતકાળની નકારાત્મકતા ધોઈને નવી શરૂઆત કરવાનું પ્રતિક છે.
બોર્યોંગ મડ ફેસ્ટિવલ (દક્ષિણ કોરિયા - Boryeong Mud Festival): દક્ષિણ કોરિયાના ડેચોન બીચ પર દર જુલાઈમાં લોકો કાદવમાં કૂદે છે અને રમે છે. શરૂઆતમાં આ ફેસ્ટિવલ સ્કીનકેર પ્રોડક્ટ્સના પ્રચાર માટે હતો, પણ આજે તે હોળી જેવો જ મસ્તીભર્યો સામુદાયિક ઉત્સવ બની ગયો છે.
લા ટોમેટિના (સ્પેન - La Tomatina): સ્પેનના બુન્યોલ શહેરમાં દર ઓગસ્ટમાં હજારો લોકો એકબીજા પર 100 ટનથી વધુ પાકેલા ટામેટા ફેંકે છે. હોળીની જેમ જ આ તહેવાર પણ તમામ ચિંતાઓ ભૂલીને ખુલીને જીવવાનો અવસર છે.
બેટલ ઓફ ધ ઓરેન્જિસ (ઈટાલી - Battle of the Oranges): ઈટાલીના ઇવ્રિયા શહેરમાં 1808થી આ પરંપરા ચાલી આવે છે. અહીં લોકો એકબીજા પર લગભગ 400 ટન સંતરા ફેંકે છે. હસી-મજાક અને તોફાન આ તહેવારને હોળી જેવો જ જોશીલો બનાવે છે.
ચિંચિલા વોટરમેલન ફેસ્ટિવલ (ઓસ્ટ્રેલિયા - Chinchilla Watermelon Festival): ક્વીન્સલેન્ડના ચિંચિલા શહેરમાં તબરૂચ (Watermelon) થી જોડાયેલી અનોખી રમતો રમાય છે. 'મેલોન બુલ્સ આઈ' જેવી રમતો લોકોમાં ભારે ઉત્સાહ ભરે છે.
હારો વાઈન ફેસ્ટિવલ (સ્પેન - Haro Wine Festival): સ્પેનના હારો શહેરમાં 'બેટાલા ડેલ વીનો' નામે મશહૂર આ ફેસ્ટિવલમાં લોકો એકબીજા પર વાઈન છાંટીને ઉનાળાનું સ્વાગત કરે છે.
કાસ્કામોરાસ (સ્પેન - Cascamorras): 1490થી ઉજવાતા આ તહેવારમાં સ્પેનના ગ્વાડિક્સ અને બાઝા શહેરોના લોકો એકબીજા પર રંગ, પાવડર અને પેઇન્ટ લગાવે છે, જે આબેહૂબ ભારતની હોળીની યાદ અપાવે છે.
આ તમામ તહેવારો સાબિત કરે છે કે રંગ, મસ્તી અને એકતાની ઉજવણી કરવા માટે કોઈ સરહદો હોતી નથી. દરેક દેશ પોતાની સંસ્કૃતિ મુજબ હોળી જેવો જ આનંદ માણે છે.
