Gold Price Forecast 2026 : સોનાના ભાવમાં મોટો ધડાકો ? WGCના અહેવાલે આપ્યા સનસનાટીપૂર્ણ સંકેત!
સોનાના ભાવમાં તાજેતરમાં થયેલા ઘટાડા બાદ હવે ફરી વધારો થવાની શક્યતા વ્યક્ત કરવામાં આવી રહી છે. વર્લ્ડ ગોલ્ડ કાઉન્સિલના નવા અહેવાલમાં કેટલાક એવા પરિબળો સામે આવ્યા છે, જે આગામી સમયમાં સોનાની કિંમત વધારવામાં મદદરૂપ થઈ શકે છે.
છેલ્લા કેટલાક સમયથી સોનાના ભાવમાં મોટો ઘટાડો જોવા મળ્યો છે. જોકે, હવે બજારમાં ફરી સોનાના ભાવ વધવાની આશા જાગી છે. વર્લ્ડ ગોલ્ડ કાઉન્સિલ (WGC) ના એક અહેવાલમાં જણાવાયું છે કે સોનાની કિંમતમાં થયેલો ઘટાડો લાંબા સમયની મંદી નહીં, પરંતુ થોડા સમય માટેનું પ્રાઇસ કરેકશન હોઈ શકે છે.
અહેવાલ પ્રમાણે, ઓક્ટોબર મહિનાના અંતે સોનાનો ભાવ પ્રતિ ઔંસ 3,913 ડોલર નોંધાયો હતો. સમગ્ર ઓક્ટોબર દરમિયાન સોનાની કિંમતમાં લગભગ 6.3 ટકાનો ઘટાડો થયો હતો. એટલું જ નહીં, જાન્યુઆરી 2026માં નોંધાયેલા 5,405 ડોલર પ્રતિ ઔંસના રેકોર્ડ ભાવની સરખામણીએ સોનું લગભગ 25 ટકા સસ્તું થયું છે.
વર્લ્ડ ગોલ્ડ કાઉન્સિલના જણાવ્યા મુજબ, સોનાના ભાવમાં સુધારો આવવાની શક્યતા દર્શાવતા ત્રણ ઐતિહાસિક સંકેતોમાંથી બે અત્યારે જોવા મળી રહ્યા છે.પહેલો સંકેત એ છે કે સોનાનો ભાવ તેની છેલ્લા 200 દિવસની સરેરાશ કિંમત કરતાં લગભગ 10 ટકા નીચે છે. બીજો સંકેત અમેરિકી ડોલરની મજબૂતી છે. ડોલર તાજેતરમાં નવી ઊંચાઈએ પહોંચ્યો છે.
જોકે, ત્રીજો સંકેત હજુ સંપૂર્ણ રીતે જોવા મળ્યો નથી. આ સંકેત વાયદા બજારમાં સોનાની સટ્ટાકીય ખરીદીમાં ઘટાડા સાથે જોડાયેલો છે. જો આ ખરીદીમાં પણ ઘટાડો થાય, તો સોનાના ભાવમાં સુધારો આવવાની શક્યતા વધુ મજબૂત બની શકે છે.
WGCના ઐતિહાસિક અભ્યાસ મુજબ, જ્યારે આવા ત્રણમાંથી ઓછામાં ઓછા બે સંકેતો એકસાથે જોવા મળ્યા છે, ત્યારે ત્યાર પછીના ત્રણ મહિનામાં સોનાએ સરેરાશ 4.2 ટકા વળતર આપ્યું છે. અભ્યાસમાં આવા લગભગ 90 ટકા કિસ્સાઓમાં સોનાના ભાવ વધ્યા હોવાનું સામે આવ્યું છે. જ્યારે ત્રણેય સંકેતો એકસાથે જોવા મળ્યા હોય તેવા માત્ર પાંચ ઐતિહાસિક કિસ્સા નોંધાયા છે. આ પાંચેય કિસ્સામાં સોનાએ સકારાત્મક વળતર આપ્યું હતું.
આગામી સમયમાં અમેરિકાની મધ્યસત્ર ચૂંટણી, શેરબજારની સ્થિતિ, ક્રેડિટ માર્કેટ અને મોંઘવારીના આંકડા સોનાની કિંમતની દિશા નક્કી કરવામાં મહત્વની ભૂમિકા ભજવી શકે છે. આ ઉપરાંત, દુનિયાભરમાં ચાલી રહેલા ભૂ-રાજકીય તણાવ અને આર્થિક અનિશ્ચિતતા પણ સોનાની માંગને ટેકો આપી શકે છે.
વર્લ્ડ ગોલ્ડ કાઉન્સિલના મતે, લાંબા ગાળા માટે સોનામાં રોકાણ કરવા ઇચ્છતા લોકોએ એકસાથે મોટી રકમ રોકવાને બદલે થોડું-થોડું કરીને રોકાણ કરવું વધુ યોગ્ય બની શકે છે. જોકે, સોનાના ભાવમાં ફરી તેજી આવશે તેની કોઈ ખાતરી નથી. તેથી રોકાણ કરતા પહેલાં બજારની સ્થિતિ, જોખમ અને પોતાની આર્થિક ક્ષમતાને ધ્યાનમાં લેવી જરૂરી છે. ( નોંધ: અહીં આપવામાં આવેલી માહિતી પબ્લિક ડોમેન પરથી લેવામાં આવી છે, જે ફક્ત તમારી જાણકારી માટે છે.)
