Science Intresting Facts: પાણીમાં હાથ નાખતા જ આંગળીઓ કેમ થઈ જાય છે કરચલીવાળી? કારણ જાણીને ચોંકી જશો
સ્નાન કરતી વખતે કે સ્વિમિંગ પૂલમાં લાંબો સમય રહેતાં આંગળીઓ પર કરચલીઓ દેખાવા લાગે છે. શું આ માત્ર પાણીના કારણે થાય છે? જાણો નર્વસ સિસ્ટમ અને બ્લડ વેસલ્સ સાથે જોડાયેલું રસપ્રદ વિજ્ઞાન.
તમે જ્યારે લાંબા સમય સુધી પાણીમાં રહો છો ત્યારે એક રસપ્રદ ફેરફાર જોવા મળે છે. હાથની આંગળીઓ અને પગની આંગળીઓની ચામડી પર નાની-નાની કરચલીઓ દેખાવા લાગે છે. સ્નાન કરતી વખતે, સ્વિમિંગ કરતી વખતે અથવા લાંબા સમય સુધી પાણીમાં કામ કર્યા પછી આવું સામાન્ય રીતે જોવા મળે છે. પરંતુ શું તમે ક્યારેય વિચાર્યું છે કે પાણીમાં જતાં આંગળીઓની ચામડી આવી કેમ બની જાય છે?
ઘણા લોકો માને છે કે પાણીમાં લાંબો સમય રહેવાથી ચામડી પાણી શોષી લે છે અને તેથી આંગળીઓ કરચલીવાળી બને છે. જોકે, તેની પાછળ શરીરની એક ખાસ પ્રક્રિયા પણ કામ કરે છે.
પાણીમાં હાથ લાંબા સમય સુધી રાખવાથી આંગળીઓની નાની રક્તવાહિનીઓ સંકોચાય છે. આ પ્રક્રિયાને વાસોકન્સ્ટ્રિક્શન કહેવામાં આવે છે. આ ફેરફાર આપણા શરીરની નર્વસ સિસ્ટમના નિયંત્રણ હેઠળ થાય છે.
રક્તવાહિનીઓ સંકોચાતા આંગળીની અંદરના ભાગમાં થોડો ફેરફાર થાય છે. તેના કારણે ઉપરની ચામડી પર કરચલીઓ દેખાવા લાગે છે.
પરંતુ આ ફેરફાર આંગળીઓ પર જ દેખાય છે. હાથની હથેળી, આંગળીઓ અને પગના તળિયાની ચામડી શરીરના અન્ય ભાગોની ચામડી કરતાં અલગ હોય છે. આ વિસ્તારોમાં નસો અને રક્તવાહિનીઓની ખાસ રચના હોય છે. તેથી પાણીમાં લાંબો સમય રહેવાથી અહીં થતો ફેરફાર વધુ સ્પષ્ટ દેખાય છે.
કેટલાક વૈજ્ઞાનિક અભ્યાસોમાં એવું પણ જોવા મળ્યું છે કે નર્વસ સિસ્ટમ સાથે જોડાયેલી કેટલીક સમસ્યાઓ ધરાવતા લોકોમાં પાણીમાં આંગળીઓ પર સામાન્ય રીતે પડતી કરચલીઓ અલગ રીતે દેખાઈ શકે છે. આ બાબતથી પણ નર્વસ સિસ્ટમની ભૂમિકા સમજવામાં વૈજ્ઞાનિકોને મદદ મળી છે.
પાણીમાંથી હાથ બહાર કાઢ્યા પછી રક્તવાહિનીઓ ધીમે ધીમે સામાન્ય સ્થિતિમાં આવે છે. પરિણામે આંગળીઓની ચામડી પણ ફરી સામાન્ય દેખાવા લાગે છે.
પાણીમાં લાંબો સમય હાથ રાખ્યા પછી આંગળીઓ પર પડતી કરચલીઓ એક સામાન્ય શારીરિક પ્રક્રિયા છે. તે માત્ર ચામડી પાણી શોષી લેવાના કારણે થતી નથી. પાણીના સંપર્કમાં આવ્યા બાદ આંગળીઓની નાની રક્તવાહિનીઓમાં ફેરફાર થાય છે અને નર્વસ સિસ્ટમ આ પ્રક્રિયાને નિયંત્રિત કરે છે.
અટલે આગલી વખતે સ્નાન કર્યા પછી તમારી આંગળીઓ કરચલીવાળી દેખાય તો ચિંતા કરવાની જરૂર નથી. આ તમારા શરીરની સામાન્ય અને કુદરતી પ્રક્રિયા છે, જે બતાવે છે કે આપણું શરીર આસપાસના વાતાવરણ પ્રમાણે સતત પોતાની અંદર ફેરફાર કરતું રહે છે. (All Image Credit Source: Social Media)
Published On - 12:08 pm, Wed, 16 September 26
