Stock Market: નિફ્ટી હજુ કેટલો ઘટશે ? કયા લેવલથી રિકવરી આવવાની શક્યતા છે ?
શેરબજારમાં છેલ્લા કેટલાક દિવસોથી ચાલી રહેલા ઘટાડાએ રોકાણકારોની ચિંતામાં વધારો કર્યો છે. સામાન્ય રીતે યુદ્ધ કે વૈશ્વિક અસ્થિરતાને આનું કારણ માનવામાં આવે છે પરંતુ ટેકનિકલ વિશ્લેષણ મુજબ નિફ્ટીના આ ઘટાડા પાછળ એક ખાસ કારણ છુપાયેલું છે.
09 માર્ચ 2026 ના રોજ નિફ્ટી 23,697.80 નો લો (Low) હિટ કરી ચૂક્યો છે. હવે આ લેવલથી તે હજુ 500 થી 1,000 પોઈન્ટ્સ નીચે જવાની શક્યતા ધરાવે છે.
આમ તો યુદ્ધ, જીઓ-પોલિટિકલ ટેન્શનને આનું કારણ માનવામાં આવે છે પરંતુ માર્કેટને ઝડપથી ઉપર જવા માટે કે ઝડપથી નીચે પડવા માટે કોઈને કોઈ બહાનું મળી જ જાય છે. હકીકતમાં, 15 એપ્રિલ 2025 ના રોજ નિફ્ટીએ આશરે 280 પોઈન્ટ્સનું ગેપ-અપ (Gap up) ઓપનિંગ આપ્યું હતું.
શેરબજારના વણલખ્યો નિયમ (Unwritten rule) મુજબ, ગમે ત્યારે ગેપ-અપ કે ગેપ-ડાઉન થયું હોય, તેને કોઈને કોઈ દિવસે ભરાવું (Fill થવું) પડે છે. 15 એપ્રિલ 2025 ના રોજ જે ગેપ-અપ થયું હતું, તે 11 મહિના વીતી ગયા હોવા છતાં ભરાઈ શક્યું નહોતું. હવે યુદ્ધે માર્કેટને આ ગેપ ભરવાની તક આપી છે.
નિફ્ટી તેના ઓલ-ટાઇમ હાઈ (All Time High) લેવલથી 10% કરતા વધુ કરેક્ટ થઈ ચૂક્યો છે અને તે 26,373 ના ઓલ-ટાઇમ હાઈથી ઘટીને 23,700 ના લેવલ સુધી આવી ગયો છે.
ટૂંકમાં, હવે 15 એપ્રિલ 2025 ના 22,923.90 ના લેવલ સુધી પહોંચવામાં માત્ર 750-800 પોઈન્ટ્સ જ બાકી રહ્યા છે. આનો અર્થ એ થયો કે, નિફ્ટીમાં હવે હજુ 750-800 પોઈન્ટ્સ વધુ ઘટવાની શક્યતા છે, જે આ જ મહિનામાં સરળતાથી થઈ શકે છે.
