Stock Market : બે દિવસમાં 6 લાખ કરોડ રૂપિયા સ્વાહા ! બજારમાં ગભરાટનું વાતાવરણ, સેન્સેક્સ 1046 પોઈન્ટ ગગડ્યો, હવે આગળ શું?
ભારતીય શેરબજાર હાલ ગભરાટની સ્થિતિમાં છે. BSE સેન્સેક્સ 436.41 પોઈન્ટ અથવા 0.51% ઘટીને 84,666.28 પર બંધ થયો. આ બે દિવસના ઘટાડાથી રોકાણકારોના કરોડો રૂપિયા ધોવાયા છે.
આઇટી શેરોમાં સૌથી વધુ ઘટાડો થયો અને પીએસયુ બેંકો, રિયલ એસ્ટેટ તેમજ કન્ઝ્યુમર ડ્યુરેબલ્સ શેરોમાં વધારો થયો. સ્મોલ કેપે બીજા ઇંડેક્સ કરતાં વધુ સારું પ્રદર્શન કર્યું. જાપાની બોન્ડ યીલ્ડમાં વધારો અને બેંક ઓફ જાપાન (BOJ) દ્વારા આગામી ડિસેમ્બર મીટિંગમાં કડક પગલાં લેવાની અપેક્ષાને કારણે વધુ દબાણ આવ્યું.
બજાર મોટાભાગે ફેડ તરફથી 0.25 ટકાના દર ઘટાડા અને BOJ તરફથી દર વધારાની અપેક્ષા રાખી રહ્યું છે. જો કે, વર્ષ 2026 માટે આગળનો માર્ગ ઘણા ફેક્ટરો દ્વારા નક્કી કરવામાં આવશે. ભવિષ્યમાં સેન્ટ્રલ બેંકની ટિપ્પણી, ચલણની ચાલ અને FII ફ્લો સેન્ટિમેન્ટ નક્કી કરશે.
ટેકનિકલી નિફ્ટી 25,650-25,700 ના સ્તરે તાત્કાલિક સપોર્ટ ધરાવે છે, જ્યારે મજબૂત રેઝિસ્ટન્સ 25,950-26,000 ના સ્તરે જોવા મળી રહ્યો છે. બેંક નિફ્ટી માટે તાત્કાલિક સપોર્ટ 58,900-59,000 ની આસપાસ છે, જ્યારે રેઝિસ્ટન્સ 59,500-59,600 ની નજીક છે. બજારનું સેન્ટિમેન્ટ થોડું મંદી તરફ છે. એવામાં જો મુખ્ય સપોર્ટ લેવલ જળવાઈ રહે અને ખરીદીમાં રસ જળવાઈ રહે તો નવી તકો ઉભરી શકે છે.
જિયોજિત ઇન્વેસ્ટમેન્ટ્સના રિસર્ચ હેડ વિનોદ નાયરે જણાવ્યું હતું કે, આવતીકાલના યુએસ ફેડ પોલિસી પરિણામ પહેલા રોકાણકારો સાવચેત બન્યા હોવાથી તાજેતરના પ્રોફિટ બુકિંગ ચાલુ રહેતાં લોકલ શેરબજારમાં ઘટાડો થયો હતો. રૂપિયામાં નબળાઈ, FII વેચવાલી અને યુએસ-ભારત વેપાર સોદા અંગે અનિશ્ચિતતાએ સેન્ટિમેન્ટને વધુ નબળું બનાવ્યું હતું.
