Stock Market : બજારમાં સુનામી… 25,000 ના લેવલ પર નિફ્ટીની લડાઈ, રોકાણકારોના શ્વાસ અધ્ધર
શેરબજારમાં આ અઠવાડિયે મોટો ઘટાડો જોવા મળ્યો છે. ખાસ વાત એ છે કે, આ આખા અઠવાડિયા દરમિયાન મુખ્ય ઇન્ડેક્સમાં 2 ટકા સુધીનો કડાકો બોલાયો છે.
સામાન્ય રીતે એવું માનવામાં આવે છે કે, આટલા ઘટાડા પછી બજાર સ્થિર થવાનો પ્રયાસ કરે છે અને રિકવરી જોવા મળી શકે છે. જો કે, આ વખતે નિષ્ણાતો રિકવરીની આશા રાખવાની સાથે વધુ ઘટાડા માટે પણ પોતાને તૈયાર કરી રહ્યા છે.
નિષ્ણાતોના મતે, હાલમાં બજાર એક ચોક્કસ રેન્જમાં (સીમિત દાયરામાં) ટ્રેડિંગ કરે તેવી શક્યતા છે. તેમ છતાંય, વિદેશી સંકેતો નબળા છે અને જિઓ-પોલિટિકલ ટેન્શન યથાવત છે, આવી સ્થિતિમાં બહારથી આવતો નાનો અમથો આંચકો પણ બજારને મહત્વના સ્તરથી નીચે લઈ જઈ શકે છે.
એવામાં ચાર્ટ પર દબાણ વધી ગયું છે. નિફ્ટી 25,400 ના સપોર્ટ બેન્ડની નીચે સરકી ગયો છે. હવે 25,000 નું સ્તર મનોવૈજ્ઞાનિક રીતે અત્યંત મહત્વનું છે. જો 25,000 ની નીચે નિર્ણાયક બ્રેક જોવા મળશે, તો ઘટાડો 24,900 થી 24,700 સુધી જઈ શકે છે.
'એનરિચ મની'ના CEO પોનમુડી આર. એ સ્પષ્ટપણે જણાવ્યું છે કે, “200-દિવસીય EMA (એક્સપોનેન્શિયલ મૂવિંગ એવરેજ) ની નીચે સરકવાથી બજારનું માળખું નબળું પડ્યું છે. નકારાત્મક વલણને ખતમ કરવા માટે નિફ્ટીનું 25,400 ની ઉપર ટકવું જરૂરી છે, જ્યારે 25,000 ની નીચે ઘટાડો તીવ્ર બનીને 24,900–24,700 સુધી જઈ શકે છે.” તેમણે વધુમાં ઉમેર્યું કે, હાલમાં ઇન્ડિકેટર્સ નબળા સંકેતો આપી રહ્યા છે.
બજારને જે સકારાત્મક ટેકો મળી રહ્યો છે, તે સ્થાનિક સંકેતોને આભારી છે પરંતુ વૈશ્વિક સંકેતોને કારણે રોકાણકારોમાં ફાળ (ગભરાટ) જોવા મળી રહી છે. મોતીલાલ ઓસ્વાલ ફાઇનાન્શિયલ સર્વિસીસમાં હેડ ઓફ રિસર્ચ (વેલ્થ મેનેજમેન્ટ) સિદ્ધાર્થ ખેમકાએ જણાવ્યું હતું કે, “વૈશ્વિક અસ્થિરતા અને સંસ્થાકીય રોકાણકારોની ચાલ બજારની દિશા નક્કી કરશે. સ્થાનિક વૃદ્ધિ બજારને ટેકો આપી રહી છે પરંતુ હાલમાં બજાર એક મર્યાદિત દાયરામાં અને સાવચેતીભર્યા વલણમાં રહી શકે છે.”
જિઓજિત ઇન્વેસ્ટમેન્ટ્સના હેડ ઓફ રિસર્ચ વિનોદ નાયરે સ્પષ્ટપણે જણાવ્યું છે કે, “અમેરિકા અને ઈરાન વચ્ચે પરમાણુ વાટાઘાટોમાં પ્રગતિ ન થવાને કારણે મધ્ય પૂર્વમાં તણાવ વધવાની આશંકા છે. આ કારણોસર રોકાણકારોમાં સેન્ટિમેન્ટ્સ નબળા જોવા મળી રહ્યા છે.”
તેમણે વધુમાં ઉમેર્યું હતું કે, AI (આર્ટિફિશિયલ ઇન્ટેલિજન્સ) સાથે જોડાયેલી અનિશ્ચિતતાને કારણે રોકાણકારોનો ઝુકાવ સુરક્ષિત રોકાણ (Safe Haven) તરફ વધી રહ્યો છે. આઈટી (IT) સેક્ટરમાં ફેબ્રુઆરી મહિનામાં 19% થી વધુનો કડાકો જોવા મળ્યો છે, જે સપ્ટેમ્બર 2008 પછીનો સૌથી મોટો માસિક ઘટાડો છે.
