હવે સોનું નહિ ચાંદી બોલશે! 1 દિવસમાં 2700 રૂ. ઉછાળો, ચાંદીના ભાવ હવે ક્યા સુધી જશે?
શેરબજારમાં ચાલી રહેલી ઉથલપાથલ વચ્ચે રોકાણકારો સોનામાં અને ચાંદીમાં રોકાણ કરવાનું પસંદ કરી રહ્યા છે. એકબાજુ જ્યાં સ્ટોક માર્કેટ ગગડી રહ્યું છે ત્યાં બીજીબાજુ સોનામાં અને ચાંદીમાં રોકાણકારો સારો એવો નફો કમાઈ રહ્યા છે. એવામાં ચાલો જાણીએ કે, હાલ ચાંદીનો ભાવ કેટલે પહોંચ્યો અને તેનું ભવિષ્ય શું છે.
ઇન્ડિયન બુલિયન એન્ડ જ્વેલર્સ એસોસિએશન (IBJA)ના ડેટા અનુસાર, મંગળવારે રાત્રે ચાંદીના ભાવમાં લગભગ 2,700 રૂપિયાનો વધારો થયો હતો, ત્યારબાદ 1 કિલો ચાંદીનો ભાવ 1,00,460 રૂપિયા થયો હતો, જ્યારે બુધવારે સવારે MCX અને હાજર બજારોમાં તેમાં થોડો ઘટાડો થયો હતો.
એન્જલ વનના કરન્સી વિશ્લેષક પ્રથમેશ માલ્યાના મતે, રશિયા અને યુક્રેન વચ્ચે ચાલી રહેલા તણાવને કારણે રોકાણકારો સોના અને ચાંદીમાં રોકાણ કરવાનું પસંદ કરી રહ્યા છે. તેમણે કહ્યું કે, છેલ્લા 3-4 સેશનમાં આંતરરાષ્ટ્રીય બજારમાં ચાંદીમાં લગભગ 6 ટકાનો વધારો જોવા મળ્યો છે.
આ સાથે પ્રથમેશ માલ્યાએ કહ્યું કે, MCX ફ્યુચર માર્કેટમાં ચાંદીના ભાવમાં લગભગ 5 ટકાનો વધારો થયો છે. તેમણે કહ્યું કે, રશિયા-યુક્રેન યુદ્ધને કારણે આગામી દિવસોમાં ચાંદીમાં વધારો થશે અને MCX ફ્યુચર માર્કેટમાં ચાંદી ટૂંક સમયમાં 1,06,000 રૂપિયા પ્રતિ કિલોગ્રામના ભાવે પહોંચી શકે છે. જો કે, તેમણે વેપારીઓને ચેતવણી પણ આપી છે કે ભવિષ્યમાં ચાંદીના ભાવ ઘટી શકે છે.
ચાંદીના વધતા ભાવ વચ્ચે પ્રશ્ન એ ઉભો થાય છે કે 1 કિલો ચાંદીનો ભાવ ક્યાં સુધી જશે? તાજેતરમાં પર્સનલ ફાઇનાન્સ પુસ્તક 'રિચ ડેડ પુઅર ડેડ'ના લેખક રોબર્ટ કિયોસાકીએ સોશિયલ મીડિયા પ્લેટફોર્મ X પર એક પોસ્ટ દ્વારા 2025માં ચાંદીના ભાવમાં 3 ગણો ઉછાળો આવવાની આગાહી કરી છે. તેમના મતે, હાલમાં ચાંદીના ભાવમાં 60 ટકાનો ઘટાડો થયો છે, જ્યારે સોનું અને બિટકોઇન ઓલ ટાઈમ હાઈ પર છે.
Published On - 8:17 pm, Wed, 4 June 25
