ICC T20 WC Breaking News : શું કોઈ તોડી શકશે રાશિદ ખાનનો આ રેકોર્ડ ? અફઘાનિસ્તાનના કેપ્ટને ટી20માં ભલભલા દિગ્ગજોને પાછળ છોડ્યા
અફઘાનિસ્તાનના દિગ્ગજ લેગ સ્પિનર અને કેપ્ટન રાશિદ ખાનની ગણના વિશ્વના શ્રેષ્ઠ ટી20 બોલરોમાં થાય છે. તેણે ટી20 ફોર્મેટમાં એક નવો ઈતિહાસ રચ્યો છે.
અફઘાનિસ્તાનના દિગ્ગજ લેગ સ્પિનર અને કેપ્ટન રાશિદ ખાન ટી20 ફોર્મેટમાં 700 વિકેટ લેનારો વિશ્વનો પ્રથમ બોલર બન્યો છે. તેણે આ સિદ્ધિ ટી20 વર્લ્ડ કપમાં યુએઈ (UAE) સામેની મેચમાં હાંસલ કરી હતી. આ મેચમાં તેણે મોહમ્મદ અરફાનને આઉટ કરીને એક વિકેટ ઝડપી હતી. બસ આ વિકેટ સાથે જ તેણે ટી20 ક્રિકેટમાં એક નવો વર્લ્ડ રેકોર્ડ બનાવ્યો છે. અગાઉ કોઈ પણ બોલરે ટી20 ફોર્મેટમાં 700 વિકેટ લેવાનું કારનામું કર્યું નથી.
ટી20 ફોર્મેટમાં સૌથી વધુ વિકેટ લેનારા બોલરોની વાત કરીએ તો, રાશિદ ખાન પછી બીજા ક્રમે વેસ્ટ ઈન્ડિઝના પૂર્વ દિગ્ગજ ઓલરાઉન્ડર ડ્વેન બ્રાવોનું નામ આવે છે. બ્રાવોએ આ ફોર્મેટમાં 582 મેચમાં 631 વિકેટ લીધી હતી. ત્યારબાદ બ્રાવોનો સાથી ખેલાડી સુનિલ નરેન આ યાદીમાં ત્રીજા નંબરે છે, જેણે 583 મેચમાં 613 વિકેટ ઝડપી છે.
દક્ષિણ આફ્રિકાના ઈમરાન તાહિર 572 વિકેટ સાથે ચોથા ક્રમે છે, જ્યારે પાંચમા નંબરે વેસ્ટ ઈન્ડિઝના પૂર્વ ઓલરાઉન્ડર આન્દ્રે રસેલનું નામ છે, જેના ખાતામાં 508 વિકેટ નોંધાયેલી છે. આ તમામ ખેલાડીઓ ટી20 ઇન્ટરનેશનલમાંથી નિવૃત્તિ લઈ ચૂક્યા છે. હવે આમાંથી કોઈના માટે પણ રાશિદ ખાનનો આ રેકોર્ડ તોડવો સરળ નહીં હોય.
અફઘાનિસ્તાનના રાશિદ ખાને વર્ષ 2015માં ટી20 ફોર્મેટમાં ડેબ્યૂ કર્યું હતું. તેણે અત્યાર સુધી 518 મેચની 513 ઇનિંગ્સમાં 18.5ની સરેરાશ અને 6.59ના ઇકોનોમી રેટ સાથે 700 વિકેટ ઝડપી છે. આ દરમિયાન તેણે 18 વખત 4 વિકેટ લેવાની કમાલ કરી છે, જ્યારે 4 વખત તેણે 5 વિકેટ લેવાનો રેકોર્ડ પણ પોતાના નામે કર્યો છે. તે આ ફોર્મેટના સૌથી સફળ બોલરોમાંનો એક છે. રાશિદ ખાનના નામે ટી20 ઇન્ટરનેશનલમાં પણ સૌથી વધુ વિકેટ લેવાનો રેકોર્ડ છે. T20I માં તે અત્યાર સુધીમાં 191 વિકેટ લઈ ચૂક્યો છે.
અફઘાનિસ્તાન અને યુએઈ વચ્ચે રમાયેલી મેચની વાત કરીએ તો, રાશિદની કેપ્ટન્સીમાં અફઘાનિસ્તાનની શાનદાર બોલિંગ સામે યુએઈની ટીમ 20 ઓવરમાં 9 વિકેટના નુકસાન પર 160 રન બનાવવામાં સફળ રહી હતી. યુએઈ માટે સોહેબ ખાને 48 બોલમાં 68 રનની ઇનિંગ રમી હતી, જ્યારે શરાફૂએ 31 બોલમાં 40 રન બનાવ્યા હતા.
આ બંને બેટ્સમેનોએ યુએઈને સન્માનજનક સ્કોર સુધી પહોંચાડવાનું કામ કર્યું હતું. અફઘાનિસ્તાને આ ટાર્ગેટ 19.2 ઓવરમાં 5 વિકેટના નુકસાન પર હાંસલ કરી લીધો હતો. આ મેચમાં અઝમતુલ્લા ઓમરઝાઈને તેના શાનદાર ઓલરાઉન્ડ પ્રદર્શન માટે 'પ્લેયર ઓફ ધ મેચ'નો એવોર્ડ આપવામાં આવ્યો હતો.
Published On - 5:56 pm, Mon, 16 February 26
