રક્ષાબંધનના તહેવાર પર સાયબર ઠગોથી સાવધાન! નાની ભૂલ પણ ખાલી કરી શકે છે બેંક ખાતું
રક્ષાબંધનના તહેવારની આડમાં સ્કેમર્સ લોકોને ઠગવાની કોઈ તક છોડતા નથી. કેશબેક ઓફર, ફેક શોપિંગ વેબસાઇટ કે ગિફ્ટ લિંક દ્વારા થતી છેતરપિંડીથી કેવી રીતે બચવું? જાણો વિગતવાર માહિતી.
ભારત દેશમાં દરેક તહેવાર ખૂબ જ ધામધૂમ અને ઉત્સાહ સાથે ઉજવવામાં આવે છે, જેમ કે રક્ષાબંધનનો પર્વ. આ વખતે રાખડીનો આ તહેવાર 28 ઓગસ્ટ 2026ના રોજ ઉજવવામાં આવશે.
આ દિવસે બહેનો પોતાના ભાઈના કાંડા પર રાખડી બાંધે છે, પરંતુ શું તમે જાણો છો કે રક્ષાબંધનની આડમાં સાયબર ઠગો લોકોને છેતરવાની એક પણ તક છોડતા નથી? તેથી તમારી એક નાની ભૂલ પણ તમારા પર ભારે પડી શકે છે. ચાલો જાણીએ કે રક્ષાબંધનના નામે થતા ફ્રોડથી બચવા માટે તમારે કઈ બાબતોનું ધ્યાન રાખવું જોઈએ...
ફેક બેંક કે ઓફર કોલ્સથી સાવચેત રહો: છેતરપિંડી કરનારાઓ તમને ખાસ ઓફર્સ કે કેશબેક આપવાના નામે બેંક અધિકારી અથવા ઈ-કોમર્સ વેબસાઈટના એજન્ટ બનીને ફોન કરી શકે છે. અહીં ખાસ ધ્યાન રાખવું કે જો તમને કોલ પર જરાય શંકા જાય તો તરત જ ફોન કાપી નાખો. સાથે જ તમારી કોઈપણ ગોપનીય કે બેંકિંગ માહિતી અથવા OTP કોઈની પણ સાથે શેર ન કરો, અન્યથા તમારી સાથે મોટી નાણાકીય છેતરપિંડી થઈ શકે છે.
ફેક શોપિંગ વેબસાઇટ્સ અને એપ્સથી બચો: ઘણા લોકો રક્ષાબંધનના તહેવાર પર રાખડી કે ભાઈ માટે ગિફ્ટ જેવી વસ્તુઓની ઓનલાઈન ખરીદી કરે છે. આવા સમયે સાવધ રહો કે સ્કેમર્સ ઘણી નકલી વેબસાઇટ્સ કે એપ્સ બનાવીને તમને છેતરી શકે છે. આ ફેક સાઇટ્સ દેખાવમાં બિલકુલ અસલી જેવી જ લાગે છે. તેથી અસલી અને નકલી વેબસાઇટ વચ્ચેનો તફાવત ઓળખવો જરૂરી છે.
સોશિયલ મીડિયાની લોભામણી ઓફર્સથી સાવધાન: સોશિયલ મીડિયા પર પણ ઘણી આકર્ષક ઓફર્સ જોવા મળે છે જે લોકોને લોભાવે છે. ધ્યાનમાં રાખો કે આવા મોટાભાગના પ્રમોશન્સ ફેક હોઈ શકે છે, તેથી કોઈપણ ઓર્ડર કરતા પહેલા તેની યોગ્ય તપાસ કરી લો. ઘણી વખત સોશિયલ મીડિયા પર અનોખી અને અત્યંત સસ્તી ચીજો દર્શાવવામાં આવે છે. આવી બાબતો પર તાત્કાલિક વિશ્વાસ કરીને પૈસા ચૂકવી ઓર્ડર ન કરવો. વેબસાઇટ વિશ્વસનીય લાગે તો જ ઓર્ડર કરો અને બની શકે તો 'કેશ ઓન ડિલિવરી' (COD) નો વિકલ્પ જ પસંદ કરો.
વોટ્સએપ પર આવતી શંકાસ્પદ ગિફ્ટ લિંક્સ પર ક્લિક ન કરો: રક્ષાબંધનના તહેવાર દરમિયાન જો વોટ્સએપ પર કોઈ ભેટ (ગિફ્ટ) મળવા અંગેનો મેસેજ આવે તો તરત સાવધાન થઈ જાવ. આવા મેસેજમાં ગિફ્ટ ક્લેમ કરવા માટે એક લિંક આપેલી હોય છે અને તેના પર ક્લિક કરવાનું કહેવામાં આવે છે. ભૂલથી પણ આવી કોઈ અજાણી લિંક પર ક્લિક ન કરવું, કારણ કે આ મેસેજ ફેક હોય છે. આ લિંક્સ તમારા મોબાઈલને હેક કરી શકે છે અને એક જ ઝાટકે તમારું બેંક ખાતું ખાલી કરી શકે છે.
