Post Office Scheme: આ સરકારી યોજનામાં મળશે ₹4.5 લાખનું વ્યાજ ! જાણો કેવી રીતે રોકાણ કરવું
જો તમે કોઈ જોખમ લીધા વગર તમારા પૈસાને સુરક્ષિત રીતે વધારવા માંગતા હો, તો પોસ્ટ ઓફિસની એક યોજના તમારા માટે ઉત્તમ વિકલ્પ બની શકે છે. આ યોજના બજારના ઉતાર-ચઢાવથી સંપૂર્ણપણે મુક્ત છે અને રોકાણકારને નિશ્ચિત તથા ગેરંટીકૃત વળતર આપે છે. જાણો આ યોજના વિશે.
NSCની રોકાણનો સમયગાળો 5 વર્ષનો હોય છે. આ યોજનામાં રોકાણની શરૂઆત માત્ર ₹1,000થી કરી શકાય છે. મહત્વની વાત એ છે કે તેમાં રોકાણની કોઈ મહત્તમ મર્યાદા નથી, એટલે રોકાણકાર પોતાની આર્થિક ક્ષમતા મુજબ જેટલું ઇચ્છે તેટલું રોકાણ કરી શકે છે.
હાલમાં, સરકાર NSC પર 7.7% વાર્ષિક વ્યાજ આપે છે. જો કોઈ રોકાણકાર આ યોજનામાં ₹10 લાખ જમા કરાવે છે, તો તેમને 5 વર્ષ પછી આશરે ₹14.49 લાખ મળશે. આનો અર્થ એ છે કે તેઓ ફક્ત વ્યાજમાંથી આશરે ₹4.49 લાખ કમાશે. આ યોજનામાં દર વર્ષે વ્યાજ ચક્રવૃદ્ધિ થાય છે, અને ચક્રવૃદ્ધિનો લાભ એકંદર વળતરમાં સુધારો કરે છે.
રાષ્ટ્રીય બચત પ્રમાણપત્ર (NSC)માં રોકાણ કરવાથી રોકાણકારોને કર બચતનો મહત્વપૂર્ણ લાભ મળે છે. આ યોજનામાં રોકાણ કરેલી રકમ આવકવેરા કાયદાની કલમ 80C હેઠળ વાર્ષિક રૂ. 1.5 લાખ સુધી કર કપાત માટે પાત્ર ગણાય છે. એટલું જ નહીં, દર વર્ષે મળતું વ્યાજ પણ ફરીથી રોકાણ માનવામાં આવતું હોવાથી તે પર પણ કર કપાતનો લાભ મળે છે. જોકે, યોજના પૂર્ણ થતાં સમયે મળતી કુલ વ્યાજ રકમ પર કર લાગુ પડે છે. આમ, NSC સલામત રોકાણ સાથે કર બચતનો સારો વિકલ્પ બની રહે છે.
ફક્ત ભારતીય નિવાસી જ NSC ખાતું ખોલી શકે છે. NRI, કંપનીઓ, ટ્રસ્ટ અને HUF આ યોજનામાં રોકાણ કરવા માટે પાત્ર નથી. કોઈપણ પુખ્ત વ્યક્તિ પોતાના નામે અથવા સગીર બાળક વતી ખાતું ખોલી શકે છે. બે કે ત્રણ લોકો સંયુક્ત ખાતું પણ ખોલી શકે છે. 10 વર્ષ કે તેથી વધુ ઉંમરનો બાળક પણ પોતાના નામે NSC લઈ શકે છે. વાલી માનસિક રીતે અક્ષમ વ્યક્તિ માટે ખાતું ખોલી શકે છે.
