Breaking News : મુંબઈ–અમદાવાદ બુલેટ ટ્રેનને લઈ મોટી ખુશખબર, નવસારીમાં કામગીરી અંતિમ તબક્કામાં
મુંબઈ-અમદાવાદ બુલેટ ટ્રેન માટે 14 ટ્રેક્શન સબસ્ટેશન (TSS) સ્થાપિત થઈ રહ્યા છે, જે અવિરત વીજળી પૂરી પાડશે. બિલિમોરામાં પ્રથમ TSS અંતિમ તબક્કામાં છે.
ભારતની પ્રથમ મુંબઈ–અમદાવાદ બુલેટ ટ્રેન પરિયોજનાને અવિરત વીજળી પૂરી પાડવા માટે સમગ્ર કોરિડોરમાં કુલ 14 ટ્રેક્શન સબસ્ટેશન (TSS) સ્થાપિત કરવામાં આવી રહ્યાં છે. હાઈસ્પીડ ટ્રેનના સંચાલન માટે આ સબસ્ટેશન મહત્વપૂર્ણ ભૂમિકા ભજવશે. આ વ્યવસ્થાથી બુલેટ ટ્રેનને સતત અને વિશ્વસનીય વીજ પુરવઠો મળી શકશે.
ટ્રેક્શન સબસ્ટેશન (TSS) હાઈસ્પીડ રેલવેની વીજ પુરવઠા વ્યવસ્થાનો મહત્વપૂર્ણ ભાગ છે. આ સબસ્ટેશન ગ્રીડમાંથી વીજળી મેળવે છે અને તેને જરૂરી વોલ્ટેજ સ્તરમાં રૂપાંતરિત કરીને ટ્રેક્શન પાવર સિસ્ટમ સુધી પહોંચાડે છે. જેના આધારે બુલેટ ટ્રેનનું સંચાલન શક્ય બને છે.
508 કિલોમીટર લાંબા મુંબઈ–અમદાવાદ બુલેટ ટ્રેન કોરિડોર માટે નક્કી કરાયેલા સ્થળોએ કુલ 14 ટ્રેક્શન સબસ્ટેશન બનાવવામાં આવી રહ્યાં છે. જેમાંથી પાંચ સબસ્ટેશન મહારાષ્ટ્રમાં મુંબઈ, થાણે, વિરાર, બોઈસર અને થાણે ડેપો ખાતે સ્થાપિત કરવામાં આવશે. જ્યારે ગુજરાતમાં વાપી, બિલિમોરા, સુરત, ભરૂચ, વડોદરા, આણંદ, મહેમદાબાદ, અમદાવાદ અને સાબરમતી ડેપો સહિત નવ સ્થળોએ સબસ્ટેશન બનાવવામાં આવી રહ્યાં છે.
ગુજરાતના નવસારી જિલ્લાના બિલિમોરામાં પ્રથમ ટ્રેક્શન સબસ્ટેશનનું બાંધકામ હવે અંતિમ તબક્કામાં પહોંચી ગયું છે. આશરે 18,000 ચોરસ મીટર વિસ્તારમાં ફેલાયેલા આ સબસ્ટેશનમાં વીજ પાવર ટ્રાન્સમિશનને લગતું ઇન્ફ્રાસ્ટ્રક્ચર ઝડપથી તૈયાર કરવામાં આવી રહ્યું છે. અહીં વિવિધ ઉપકરણોની સ્થાપના, પરીક્ષણ અને કમિશનિંગની કામગીરી ચાલી રહી છે.
બિલિમોરા સબસ્ટેશનમાં કંટ્રોલ પેનલ, ચેન્જઓવર સ્વિચ, ટ્રાન્સફોર્મર અને સર્કિટ બ્રેકર બિલ્ડિંગમાં ઉપકરણો સ્થાપિત કરવાની કામગીરી પૂર્ણ થઈ ગઈ છે. આ ઉપરાંત તમામ ગેન્ટ્રી ટાવર અને બીમ ઇન્સ્ટોલેશનનું કામ પણ પૂર્ણ કરવામાં આવ્યું છે. હાલ બાકીની ટેકનિકલ પ્રક્રિયાઓ આગળ વધારવામાં આવી રહી છે.
ગુજરાતમાં આવેલા ટ્રેક્શન સબસ્ટેશનોને ગુજરાત એનર્જી ટ્રાન્સમિશન કોર્પોરેશન લિમિટેડ (GETCO)ના 220 kV અંબેઠા ગ્રીડ સબસ્ટેશનમાંથી વીજળી મળશે. ત્યારબાદ મુંબઈ–અમદાવાદ બુલેટ ટ્રેન કોરિડોરમાં ઉપયોગમાં લેવાતી આધુનિક 2 × 25 kV ટ્રેક્શન પાવર સપ્લાય સિસ્ટમ દ્વારા વાયાડક્ટ પર સ્થાપિત ઓવરહેડ ઇક્વિપમેન્ટ (OHE) સુધી વીજળી પહોંચાડવામાં આવશે.
આ સમગ્ર ટ્રેક્શન પાવર સપ્લાય નેટવર્કનું સેન્ટ્રલાઇઝ્ડ કંટ્રોલ સેન્ટરથી સતત રિયલ-ટાઇમ મોનિટરિંગ કરવામાં આવશે. આ આધુનિક વીજ પુરવઠા વ્યવસ્થા બુલેટ ટ્રેનના સુરક્ષિત, કાર્યક્ષમ અને અવિરત સંચાલનમાં મહત્વપૂર્ણ સાબિત થશે. મુંબઈ–અમદાવાદ બુલેટ ટ્રેન પ્રોજેક્ટમાં વીજળી સંબંધિત આ કામગીરી પૂર્ણ થવાથી દેશની પ્રથમ હાઈસ્પીડ રેલવે સેવાને વધુ એક મહત્વપૂર્ણ ટેકનિકલ આધાર મળશે.
