Monthly Income : જીવનને મળશે નવો સહારો, પોસ્ટ ઓફિસની આ યોજના તમને કરાવશે તગડી કમાણી, જાણો
પોસ્ટ ઓફિસની સિનિયર સિટિઝન સેવિંગ્સ સ્કીમ (SCSS) એક સુરક્ષિત રોકાણ વિકલ્પ છે જે નિશ્ચિત માસિક આવક પૂરી પાડે છે.
નિવૃત્તિ પછી જો દર મહિને સ્થિર આવકની શોધમાં છો, તો પોસ્ટ ઓફિસની સિનિયર સિટિઝન સેવિંગ્સ સ્કીમ (SCSS) તમારા માટે શ્રેષ્ઠ વિકલ્પ બની શકે છે. આ યોજના ખાસ કરીને એવા વરિષ્ઠ નાગરિકો માટે રચાઈ છે જેમને સુરક્ષિત અને વિશ્વસનીય રોકાણ સાથે દર મહિને નિશ્ચિત વ્યાજ મળે – તે પણ સરકારી ગેરંટી સાથે. SCSS મા મળતું વ્યાજદર 8.2% છે, જે મોટાભાગની બેંકોના ફિક્સ ડિપોઝિટ કરતાં ઘણો વધુ છે.
SCSS ખાસ કરીને 60 વર્ષથી વધુ ઉંમરના નાગરિકો માટે રચાયેલ છે. જો કોઈ સરકારી કર્મચારીએ 55થી 60 વર્ષની ઉંમરે VRS લીધું હોય, તો તે પણ આ યોજનામાં ખાતું ખોલી શકે છે. રક્ષા દળના નિવૃત્ત કર્મચારીઓ માટે ઉંમર મર્યાદા 50 વર્ષ છે. આ રીતે, વિવિધ વર્ગના નિવૃત્ત નાગરિકો માટે આ યોજના ખૂબ ઉપયોગી છે.
આ યોજનામાં લઘુત્તમ રોકાણ ₹1,000 છે, જ્યારે મહત્તમ ₹30 લાખ સુધી કરી શકાય છે. જો કોઈ વ્યક્તિ ₹30 લાખનું રોકાણ કરે, તો તેમને દર વર્ષે લગભગ ₹2.46 લાખ વ્યાજ મળે – એટલે દર મહિને ₹20,500ની આકરી આવક ફક્ત વ્યાજથી જ મળે છે. આ આવક સંપૂર્ણપણે સુરક્ષિત હોય છે અને નિવૃત્તિ પછીની નાણાકીય જરૂરિયાતોને સંપૂર્ણપણે પૂરી કરી શકે છે.
આ યોજનામાં કરવામાં આવેલા રોકાણ પર તમને આવકવેરાની કલમ 80C હેઠળ ₹1.5 લાખ સુધીની ટેક્સ છૂટ મળે છે. જોકે, મળતું વ્યાજ કરપાત્ર હોય છે. સ્કીમની મુદત 5 વર્ષ છે, અને જરૂર પડે તો તેને વધારીને વધુ 3 વર્ષ સુધી લંબાવી શકાય છે. એટલે કે, લાંબા સમય માટે સ્થિર અને સુરક્ષિત આવક માટે આ યોજના શ્રેષ્ઠ પસંદગી સાબિત થઈ શકે છે.
જો તમે અથવા તમારા માતા-પિતા નિવૃત્તિ માટે સલામત અને નક્કર આવકની યોજના શોધી રહ્યા હોય, તો પોસ્ટ ઓફિસની આ યોજના ચોક્કસપણે વિચારવાપાત્ર છે. વધુ માહિતી માટે નજીકની પોસ્ટ ઓફિસનો સંપર્ક કરો.
