લેન્સકાર્ટના શેરમાં ‘બ્લેક ફ્રાઈડે’ જેવો માહોલ ! 8 મેના રોજ લોક-ઈન પીરિયડ પૂરો થતા 60% શેર થશે અનલોક
લેન્સકાર્ટના રોકાણકારો માટે આવતીકાલનો દિવસ ઘણો મહત્વનો છે. 8 મેના રોજ એન્કર ઇન્વેસ્ટર્સનો લોક-ઈન પીરિયડ પૂરો થતા જંગી વેચવાલીની શક્યતા છે. નવેમ્બર 2025માં લિસ્ટિંગ બાદ 41% રિટર્ન આપનાર આ શેર અત્યારે ટેકનિકલ નબળાઈ અને હિન્દુ વિરોધી પોલિસીના વિવાદોને કારણે દબાણમાં છે.
7 મેના રોજ લેન્સકાર્ટના શેરમાં ભારે વેચવાલી જોવા મળી હતી, જેમાં શેર એક સમયે 4.14% ઘટીને 492 રૂપિયા પર બંધ રહ્યો હતો. છેલ્લા 5 ટ્રેડિંગ સેશનમાં શેરમાં 7%નો ઘટાડો નોંધાયો છે. જોકે, સૌથી મોટો ખતરો આવતીકાલે એટલે કે 8 મેના રોજ છે, કારણ કે આ દિવસે કંપનીના એન્કર ઇન્વેસ્ટર્સ માટેનો 'લોક-ઈન' પીરિયડ સમાપ્ત થઈ રહ્યો છે.
શેર અનલોકિંગ: સેબીના નિયમો મુજબ, લિસ્ટિંગ બાદ પ્રમોટર્સ અને એન્કર ઇન્વેસ્ટર્સ અમુક સમય સુધી શેર વેચી શકતા નથી. આવતીકાલે લેન્સકાર્ટના લગભગ 60% શેર વેચાણ માટે ઉપલબ્ધ (Unlock) થઈ જશે. સોફ્ટબેંક અને અબુધાબી ઇન્વેસ્ટમેન્ટ ઓથોરિટી જેવા મોટા ઇન્વેસ્ટર્સ બ્લોક ડીલ દ્વારા હિસ્સો વેચે તેવી શક્યતા છે.
ઓલ ટાઈમ હાઈથી ઘટાડો: 10 નવેમ્બર 2025ના રોજ 395 રૂપિયા પર લિસ્ટ થયા બાદ, 15 એપ્રિલ 2026ના રોજ શેરે 557.65ની ઓલ ટાઈમ હાઈ સપાટી વટાવી હતી. પરંતુ ત્યારથી અત્યાર સુધીમાં શેર તેના ઉચ્ચ સ્તરથી 14% જેટલો ગગડી ચૂક્યો છે.
ટેકનિકલ સંકેતો: PSP Suite ઇન્ડિકેટર મુજબ 29 તારીખથી સતત વેચવાલીના સિગ્નલ મળી રહ્યા છે અને RSI પણ સતત ઘટી રહ્યો છે, જે શેરની નબળાઈ સૂચવે છે.
વિવાદોની અસર: શેરબજારના આંકડાઓ સિવાય, લેન્સકાર્ટ હાલમાં તેની કથિત 'હિન્દુ વિરોધી પોલિસી'ને કારણે સોશિયલ મીડિયા અને ચર્ચાઓમાં છે. રોકાણકારો માની રહ્યા છે કે આ વિવાદની અસર કંપનીના બ્રાન્ડ વેલ્યુ અને શેરના ભાવ પર પણ પડી રહી છે. હાલના ડેટા મુજબ, પ્રમોટર્સ પાસે હવે માત્ર 17.55% હિસ્સો જ બચ્યો છે, જે રોકાણકારો માટે ચિંતાનો વિષય છે.
નવેમ્બર 2025માં લિસ્ટિંગના માત્ર 156 દિવસમાં 41% રિટર્ન આપનાર લેન્સકાર્ટ હવે કયા સ્તરે જઈને અટકશે, તેના પર બજારની નજર છે.
