Breaking News: કિંજલ રબારીના લવમેરેજ, સામાજિક વિરોધથી લઈ ભાગમભાગ સુધીનો હાઈ વોલ્ટેજ ડ્રામા, જાણો ઈનસાઈડ સ્ટોરી
પહેલાં આંતરજ્ઞાતિય પ્રેમલગ્ન, પછી અચાનક 'ઘર વાપસી', અને તે પછી અમદાવાદના મોલ બહારથી કથિત અપહરણનો હાઈવોલ્ટેજ ડ્રામા! એક તરફ પોલીસ ફરિયાદ અને સીસીટીવી ફૂટેજ, તો બીજી તરફ ખુદ કિંજલ રબારીએ પોલીસ કમિશનર અને હાઇકોર્ટ સમક્ષ કરેલા ધડાકાએ સમગ્ર ગુજરાતને સ્તબ્ધ કરી દીધું છે. પડદા પાછળ ચાલેલી અસલી રમત શું હતી? વાંચો શરૂઆતથી લઈને આજ સુધીની તમામ વિગતો.
ગુજરાતની જાણીતી લોકગાયિકા કિંજલ રબારીના અંગત જીવનને લઈને શરૂ થયેલો વિવાદ હવે સામાન્ય સામાજિક મતભેદ મટીને કાયદાકીય અને પોલીસ તપાસના સૌથી મોટા મામલામાં ફેરવાઈ ચૂક્યો છે. પાટણ જિલ્લાના રાધનપુર તાલુકાના સિનાડ ગામની રહેવાસી કિંજલ રબારીના આંતરજ્ઞાતિય પ્રેમલગ્નથી શરૂ થયેલી આ કહાણીમાં ઘર વાપસી, કથિત છૂટાછેડા, મૈત્રી કરાર, અમદાવાદના મોલ બહારથી કથિત અપહરણ અને અંતે હાઇકોર્ટ તેમજ પોલીસ કમિશનર સમક્ષ થયેલા સનસનાટીભર્યા ખુલાસાઓએ સમગ્ર રાજ્યમાં ભારે ચર્ચા જગાવી છે. (Image From : Instagram: the kinjal rabari)
આ સમગ્ર પ્રકરણ શરૂઆતથી લઈને આજ દિન સુધી કઈ રીતે આગળ વધ્યું, તેનો સંપૂર્ણ ઘટનાક્રમ: અશોક ચૌધરી સાથે પ્રેમલગ્ન અને સામાજિક વિરોધની શરૂઆત: આ સમગ્ર પ્રકરણની શરૂઆત કિંજલ રબારીના પ્રેમસંબંધથી થઈ હતી. 25 વર્ષીય લોકગાયિકા કિંજલ રબારીએ અન્ય સમાજના યુવક અશોક ચૌધરી સાથે પ્રેમસંબંધ બાદ 2 મે, 2024ના રોજ હિન્દુ વિધિ મુજબ પ્રેમલગ્ન કર્યા હતા. (Image From : Instagram: the kinjal rabari)
કિંજલ રબારીએ આંતરજ્ઞાતિય લગ્ન કર્યા હોવાની વાત સામે આવતાં જ તેમના પરિવાર અને રબારી સમાજમાં ભારે આક્રોશ ફેલાયો હતો. સોશિયલ મીડિયા પર કિંજલ વિરુદ્ધ પોસ્ટ્સ વાયરલ થવા લાગી અને વિરોધ ઉગ્ર બન્યો હતો. તે સમયે કિંજલ રબારીએ સોશિયલ મીડિયા પર ખુલાસો કરતાં સ્પષ્ટ કર્યું હતું કે તેણે પોતાની મરજીથી લગ્ન કર્યા છે. સાથે જ તેણે અને તેના પતિ અશોક ચૌધરીએ પોતાના જીવને જોખમ હોવાનું જણાવી પોલીસ પ્રોટેક્શનની માંગણી કરી હતી અને પરિણામ ભોગવવા પરિવારને જવાબદાર ઠેરવ્યા હતા. (Image From : Instagram: the kinjal rabari)
મધ્યસ્થી, 'ઘર વાપસી' અને સોશિયલ મીડિયા પર અણધાર્યો યુ-ટર્ન: વિવાદ વકર્યા બાદ બંને પક્ષો, સામાજિક આગેવાનો અને પરિવારજનો વચ્ચે મધ્યસ્થીના પ્રયાસો તેજ થયા હતા. આખરે આગેવાનોની સમજાવટ બાદ મામલો થાળે પડ્યો હોવાનો દાવો કરવામાં આવ્યો. (Image From : Instagram: the kinjal rabari)
કિંજલ રબારી પોતાના પિતાના ઘરે પરત ફરી હતી. ઘરે પરત ફર્યા બાદ કિંજલે પોતાના સોશિયલ મીડિયા એકાઉન્ટ પરથી લગ્ન સંબંધિત વીડિયો અને તમામ પોસ્ટ્સ ડિલીટ કરી દીધી હતી. એટલું જ નહીં, તેણે એક વીડિયો નિવેદન જાહેર કરીને જણાવ્યું હતું કે, “હું રાહ ભટકી ગઈ હતી અને મેં જે પગલું ભર્યું હતું તે ખોટું હતું. હું કોઈપણ દબાણ વગર રાજીખુશીથી મારા પરિવાર પાસે પરત આવી છું અને હંમેશાં તેમની સાથે રહેવા માંગુ છું.” (Image From : Instagram: the kinjal rabari)
તે સમયે કિંજલના પિતા ઠાકરશી રબારીએ પણ નિવેદન આપ્યું હતું કે દીકરી ટૂંકા ગાળાના પ્રેમને છોડીને મા-બાપ અને સમાજના પ્રેમને માન આપીને સ્વેચ્છાએ પાછી આવી છે અને આ સમાજની એકતાની જીત છે. આ ઘટના બાદ એવું લાગતું હતું કે વિવાદ શાંત પડી ગયો છે. (Image From : Instagram: the kinjal rabari)
અમદાવાદના સીબીડી મોલ બહાર કથિત અપહરણનો હાઈવોલ્ટેજ ડ્રામા: પરંતુ શાંત દેખાતી આ પરિસ્થિતિ પાછળ મોટો વંટોળ સર્જાઈ રહ્યો હતો. થોડા સમય બાદ આ કેસમાં અણધાર્યો અને સ્તબ્ધ કરી દેનારો વળાંક આવ્યો. અમદાવાદના ચાંદખેડા વિસ્તારમાં આવેલા સીબીડી (CBD) મોલ બહારથી કિંજલ રબારીનું ધોળા દિવસે કથિત અપહરણ થયું હોવાની વાત વાયુવેગે પ્રસરતાં ખળભળાટ મચી ગયો હતો. નરસી ઉર્ફે મુકેશ રબારી નામના વ્યક્તિએ પોલીસ કંટ્રોલ રૂમને બપોરે 2:18 વાગ્યે જાણ કરી હતી કે કિંજલ રબારીનું અજાણ્યા શખ્સો દ્વારા ક્રેટા અને અન્ય ગાડીઓમાં અપહરણ કરવામાં આવ્યું છે.
પોલીસ તપાસમાં સામે આવ્યું હતું કે કિંજલ રબારી રાધનપુરથી પોતાની બહેન-બનેવી સાથે અમદાવાદ આવી હતી અને ત્યારબાદ મુકેશ રબારી સાથે મોલમાં મૂવી જોવા ગઈ હતી. મૂવી દરમિયાન કિંજલે તબિયત ખરાબ હોવાનું બહાનું કાઢી મોલની બહાર નીકળી હતી. (Image From : Instagram: the kinjal rabari)
પોલીસ ફરિયાદ, કલમો અને મૈત્રી કરારનો રહસ્યસ્ફોટ: આ ઘટના બાદ ચાંદખેડા પોલીસે તાત્કાલિક તપાસ હાથ ધરી હતી. એસીપી (ACP) ડી.વી. રાણાના જણાવ્યા અનુસાર, મુકેશ રબારીની ફરિયાદના આધારે પોલીસે ભારતીય ન્યાય સંહિતા (BNS) ની કલમ 137(2), 126(2) અને 54 હેઠળ ગુનો નોંધ્યો હતો. (Image From : Instagram: the kinjal rabari)
આ ફરિયાદમાં ચોંકાવનારી બાબત એ સામે આવી કે કિંજલ રબારી અને મુકેશ રબારી મૈત્રી કરારથી સાથે રહેતા હોવાનો દાવો કરવામાં આવ્યો હતો. ફરિયાદમાં અપહરણ પાછળ પૂર્વ પતિ અશોક ચૌધરીનું નામ આપવામાં આવ્યું હતું. જોકે, સીસીટીવી ફૂટેજની તપાસ કરતાં કિંજલ રબારી જાતે કારમાં બેસતી દેખાતાં સમગ્ર કેસ શંકાના દાયરામાં આવી ગયો હતો. (Image From : Instagram: the kinjal rabari)
કિંજલ રબારીનો વીડિયો અને પત્ર: અપહરણની થિયરી ફગાવી: અપહરણના સમાચાર વાયરલ થતાં જ કિંજલ રબારીએ ફરી એકવાર સોશિયલ મીડિયા પર વીડિયો જારી કરીને સનસનાટી મચાવી દીધી હતી. કિંજલે સ્પષ્ટ શબ્દોમાં જણાવ્યું કે: “મારું કોઈ અપહરણ થયું નથી. હું સંપૂર્ણપણે સુરક્ષિત છું અને મારી પોતાની મરજીથી મારા સાચા પતિ અશોક ચૌધરી સાથે આવી ગઈ છું.” (Image From : Instagram: the kinjal rabari)
ત્યારબાદ કિંજલે અમદાવાદ પોલીસ કમિશનર અને ચાંદખેડા પીઆઈને વિગતવાર પત્ર લખીને સમગ્ર ષડયંત્રનો પર્દાફાશ કર્યો હતો. પત્રમાં તેણે જણાવ્યું કે મોલમાં તેણે જ પોતાના પતિ અશોક ચૌધરીને મળવા માટે બોલાવ્યો હતો અને તે સ્વેચ્છાએ તેની સાથે નીકળી ગઈ હતી. (Image From : Instagram: the kinjal rabari)
પરિવાર સામે ગંભીર આક્ષેપો: ગોંધી રાખવી, બળજબરીથી છૂટાછેડા અને અત્યાચાર: પોલીસ કમિશનરને લખેલા પત્રમાં અને નિવેદનોમાં કિંજલ રબારીએ પોતાના પિતા ઠાકરશી રબારી અને પરિવારજનો સામે અત્યંત ગંભીર આરોપો મૂક્યા: ગોંધી રાખવાનો આક્ષેપ: 10 માર્ચ, 2026ના રોજ તેના પિતા અને પિયર પક્ષના લોકો તેને બળજબરીથી ઉપાડી ગયા હતા, ઘરમાં પૂરી રાખી હતી અને તેનો મોબાઈલ ફોન પણ છીનવી લીધો હતો. પતિ પર હુમલો: કિંજલે આરોપ લગાવ્યો કે તેના પતિ અશોક ચૌધરીનું અપહરણ કરી તેની સાથે અમાનુષી મારપીટ કરવામાં આવી હતી. (Image From : Instagram: the kinjal rabari)
બળજબરીથી છૂટાછેડા: કિંજલે સ્પષ્ટ કર્યું કે, “મારે અશોક સાથે ક્યારેય છૂટાછેડા લેવા નહોતા.” પરંતુ પરિવારે દબાણપૂર્વક રાધનપુર કોર્ટમાં છૂટાછેડાની અરજી કરાવી હતી અને જવાબ પણ બળજબરીથી લખાવ્યો હતો. અન્ય પુરુષ સાથે સંબંધનું દબાણ: કિંજલનો સૌથી મોટો ઘટસ્ફોટ એ હતો કે પરિવારે તેને બળજબરીથી સમાજના અન્ય પુરુષ (મુકેશ દેસાઈ/રબારી) ને સોંપી દીધી હતી અને તેની સાથે મૈત્રી કરાર કરાવી રહેવા માટે માનસિક-શારીરિક દબાણ કરવામાં આવતું હતું. (Image From : Instagram: the kinjal rabari)
ગુજરાત હાઇકોર્ટમાં કબૂલાત અને વર્તમાન સ્થિતિ: આ સમગ્ર મામલો ગુજરાત હાઇકોર્ટ સમક્ષ પણ પહોંચ્યો હતો. હાઇકોર્ટ સમક્ષ હાજર થઈને કિંજલ રબારીએ રૂબરૂ સ્વીકાર કર્યો હતો કે તેનું કોઈ અપહરણ થયું નથી. તેણે મુક્ત મને જાહેર કર્યું કે તે પુખ્ત વયની છે અને પોતાના કાયદેસરના પતિ અશોક ચૌધરી સાથે જ રહેવા માંગે છે. (Image From : Instagram: the kinjal rabari)
આમ, પ્રેમલગ્નથી શરૂ થયેલો આ વિવાદ, પરિવાર અને સમાજના દબાણ, સોશિયલ મીડિયાના ખોટા દાવાઓ, બોગસ અપહરણના આક્ષેપો અને અંતે ન્યાયતંત્ર સમક્ષ ગાયિકાની હિંમતભરી કબૂલાત સાથે એક નિર્ણાયક તબક્કે પહોંચ્યો છે. હાલ પોલીસ સમગ્ર કેસમાં તમામ ટેકનિકલ પુરાવા અને કોર્ટની કાર્યવાહીના આધારે આગળની કાયદેસરની તપાસ ચલાવી રહી છે. (Image From : Instagram: the kinjal rabari)
Published On - 4:33 pm, Wed, 9 September 26
