ખાંડ પછી હવે ગોળના ભાવ વધતાં ગૃહિણીઓનું બજેટ ખોરવાયું, તહેવારો પહેલાં કિંમતો આસમાને પહોંચી
ખાંડના વધતા ભાવ બાદ હવે તહેવારોની સિઝન પહેલાં ગોળના ભાવમાં 25 થી 30 ટકાનો મોટો ઉછાળો આવ્યો છે. મહારાષ્ટ્ર અને ઉત્તર પ્રદેશમાં શેરડીની અછતના અંદાજ વચ્ચે મુંબઈ APMC માર્કેટમાં ગોળનો ભાવ ₹80 થી ₹100 પ્રતિ કિલોએ પહોંચ્યો છે, જેની સીધી અસર તહેવારોની મીઠાઈઓ અને વાનગીઓ પર પડશે.
ખાંડ પછી હવે ગોળના સતત વધતા ભાવે ઘરનું બજેટ ખોરવી નાખવાની સાથે સામાન્ય લોકોની ચિંતા વધારી દીધી છે. તહેવારોની સિઝન શરૂ થાય તે પહેલાં જ ગોળના ભાવમાં ભારે તેજી જોવા મળી રહી છે. મુંબઈ APMC માં 25 ઓગસ્ટ 2026 ના રોજ ગોળનો ભાવ (Jaggery Price) આશરે ₹80 થી ₹100 પ્રતિ કિલો નોંધાયો હતો. બજારમાં અલગ-અલગ ગુણવત્તાવાળો ગોળ મળતો હોય છે અને તેની ક્વોલિટી મુજબ ગ્રાહકોએ વધુ કિંમત ચૂકવવી પડી શકે છે. આ ઉપરાંત છૂટક વેચાણ કેન્દ્રો પર ગોળના રિટેલ ભાવ આના કરતાં પણ વધુ હોઈ શકે છે.
ભાવવધારાથી ગ્રાહકો પરેશાન: મહારાષ્ટ્ર અને ઉત્તર પ્રદેશ જેવા દેશના અગ્રણી ગોળ ઉત્પાદક રાજ્યોમાં છેલ્લા બે અઠવાડિયામાં ગોળના ભાવમાં મોટો ઉછાળો આવ્યો છે. પ્રાપ્ત અહેવાલો અનુસાર કિંમતોમાં આશરે 25 ટકા સુધીનો વધારો નોંધાયો છે.
પહેલાં ખાંડ અને હવે ગોળના ભાવ વધવાના કારણે આગામી તહેવારોમાં મીઠાઈ, લાડુ અને અન્ય પરંપરાગત વાનગીઓ બનાવવાનો ખર્ચ વધી શકે છે. આનો સીધો અર્થ એ છે કે ફેસ્ટિવ સિઝનમાં મીઠાઈ ખરીદવી વધુ મોંઘી બનશે અને મોંઘવારીનો બોજ વધશે.
ઑક્ટોબર મહિનામાં નવું ઉત્પાદન શરૂ થાય ત્યાં સુધી ભાવ ઊંચા રહેવાની શક્યતા છે. ગોળના આ વધેલા ભાવ 2027 સુધી જળવાઈ રહેવાની સંભાવના છે, જેની અસર મીઠાઈ ઉત્પાદકો અને સામાન્ય ગ્રાહકો બંને પર પડશે.
ઓગસ્ટમાં આટલા વધ્યા ભાવ: ઉદ્યોગના નિષ્ણાતોનું કહેવું છે કે આગામી વર્ષે શેરડીની ઉપલબ્ધતા ઓછી રહેવાની ધારણા છે, તેથી ગોળના ભાવ 2027 સુધી ઊંચા સ્તરે રહી શકે છે, જેનાથી વેપારીઓ અને ગ્રાહકો પર આર્થિક દબાણ વધશે. ગોળ ઉત્પાદકો અને વેપારીઓના જણાવ્યા મુજબ, ખાંડના ભાવ સાથે તાલ મિલાવતા ગોળના ભાવમાં ઓગસ્ટ મહિના દરમિયાન દેશભરમાં 25 થી 30 ટકાનો ધરખમ વધારો જોવા મળ્યો છે.
