આઇફોનની નિકાસમાં ભારતે ચીનને પછાડ્યું, એપલના સીઈઓ ટિમ કૂકે કહ્યું-ભારતમાં બનાવાશે iPhone
એપ્રિલ મહિનામાં ભારતે, અમેરિકામાં સૌથી વધુ આઇફોન નિકાસ કર્યા છે. અગાઉ, ચીન આઇફોનની નિકાસમાં ભારત કરતા ઘણુ આગળ હતું. પરંતુ ગયા મહિનાથી આઈફોનની નિકાસનો આખો નજારો બદલાઈ ગયો છે.
ટ્રમ્પે ચીનમાં બનેલા આઇફોનની અમેરિકામાં નિકાસ પર 30 % ટેરિફ લાદ્યો છે. તે અન્ય દેશો પર માત્ર 10 % છે. આ 20 % તફાવતને કારણે, ચીનમાં બનેલા આઇફોન ભારતમાં બનેલા આઇફોન કરતાં વધુ મોંઘા થઈ ગયા છે. તેથી, કંપનીઓ ચીનનો વિકલ્પ શોધી રહી છે, અને આ વિકલ્પ ભારતના રૂપમાં જોવા મળી રહ્યો છે.
ટ્રમ્પે તાજેતરમાં ભારતમાં બનેલા આઇફોન પર પણ 25 % ટેરિફ લાદવાની વાત કરી છે, પરંતુ તેની અસર હજુ સુધી બજારમાં દેખાઈ રહી નથી. તાજેતરમાં, એપલના સીઈઓ ટિમ કૂકે કહ્યું હતું કે જૂન ક્વાર્ટરમાં અમેરિકામાં વેચાનારા આઇફોન ભારતમાં બનાવવામાં આવશે.
તાતા ઇલેક્ટ્રોનિક્સ, પેગાટ્રોન અને ફોક્સકોન ભારતમાં આઇફોન બનાવતી ત્રણ મુખ્ય કંપનીઓ છે. ફોક્સકોનનો આમાં સૌથી વધુ હિસ્સો છે.
રિસર્ચ ફર્મ ઓમડિયાના રિસર્ચ મેનેજર લે ઝુઆન ચીવએ જણાવ્યું હતું કે ભારતની ઉત્પાદન ક્ષમતામાં સુધારો થયો હોવા છતાં, તેની ક્ષમતા હજુ પણ મર્યાદિત છે. દર ક્વાર્ટરમાં યુએસમાં લગભગ 20 મિલિયન આઇફોન વેચાય છે. ભારતને આ સ્તર સુધી પહોંચવામાં માર્ચ 2026 સુધીનો સમય લાગશે.
