ભારે ડિસ્કાઉન્ટ જોઈને તરત જ ન ખરીદો સામાન ! સેલના ચક્કરમાં ક્યાંક તમે પણ નથી કરી રહ્યા ને આ મોટી ભૂલો ?
કપડાં, બૂટ, મેકઅપ અને સ્કિન કેર પ્રોડક્ટ્સ ખરીદતી વખતે ડિસ્કાઉન્ટનું બોર્ડ જોઈને લોકો આડેધડ ખરીદી કરવા લાગે છે. પરંતુ ઓછી કિંમતના ચક્કરમાં કરાતી કેટલીક નાની ભૂલો પાછળથી પસ્તાવો કરાવી શકે છે. જાણી લો ખરીદીના ગુપ્ત નિયમો.
કોઈપણ મોલ કે ઓનલાઈન સ્ટોર પર 'Sale' અથવા 'Discount' શબ્દ વાંચતા જ મોટાભાગના લોકો જરૂરિયાત વગરનો સામાન ખરીદી લેતા હોય છે. સ્માર્ટ શોપિંગનો અર્થ માત્ર ઓછી કિંમત ચૂકવવી એવો નથી, પણ સાચી અને ગુણવત્તાયુક્ત વસ્તુ ખરીદવી તે છે. ઘણી વખત સેલમાં મળતો સસ્તો સામાન ઘરે આવ્યા પછી બિનઉપયોગી સાબિત થાય છે. જો તમે પણ સેલના શોખીન છો, તો ખરીદી કરતા પહેલા કેટલીક બાબતો ખાસ જાણી લેવી જોઈએ.
કપડાં ખરીદતી વખતે આ ભૂલો ન કરો: માત્ર ટ્રેન્ડ ન જુઓ: સેલમાં ઘણીવાર એવા આઉટફિટ્સ મળે છે જે થોડા સમય પછી આઉટડેટેડ થઈ જાય છે. હંમેશા બેઝિક કલર્સ અને આરામદાયક ફેબ્રિક પસંદ કરો જે લાંબો સમય ચાલે.
ટ્રાયલ રૂમની આળસ ભારે પડશે: ઘણા લોકો સેલની ભીડમાં ટ્રાયલ કર્યા વગર જ કપડાં લઈ લે છે. હંમેશા કપડાં પહેરીને, હાથ ઊંચા કરીને કે બેસીને ફિટિંગ ચેક કરો. વધારે ટાઈટ કે લૂઝ કપડાં વેસ્ટ જશે.
કાપડની ગુણવત્તા ચકાસો: કાપડ બહુ પાતળું, પારદર્શક કે જલ્દી સંકોચાઈ જાય તેવું ન હોવું જોઈએ. રિટર્ન પોલિસી ખાસ વાંચો: સેલની વસ્તુઓ પર ઘણીવાર એક્સચેન્જ કે રિટર્ન હોતું નથી. તેથી બિલ સંભાળીને રાખો અને ખરીદતા પહેલા દુકાનદારને આ નિયમો પૂછી લો.
બૂટ-ચંપલ (ફુટવેર) ખરીદવાનું ગણિત: સાંજના સમયે ખરીદી કરો: દિવસભર ચાલવાને કારણે સાંજે પગમાં સામાન્ય સોજો આવતો હોય છે. આ સમયે ખરીદેલા બૂટ એકદમ પરફેક્ટ ફિટિંગ અને આરામદાયક સાબિત થાય છે. ડિઝાઇન પાછળ ન ભાગો: બહુ ભારે કે કડક સોલવાળા ફૂટવેર પગમાં દુખાવો કરી શકે છે. અંદરની સિલાઈ પગમાં વાગે તેવી ન હોવી જોઈએ અને ગ્રીપ સારી હોવી જોઈએ.
કોસ્મેટિક્સ અને સ્કિન કેર પ્રોડક્ટ્સમાં મોટી ચેતવણી: એક્સપાયરી ડેટ સૌથી મહત્વની: સેલમાં ઘણીવાર જૂનો સ્ટોક ખાલી કરવામાં આવતો હોય છે. પ્રોડક્ટની મેન્યુફેક્ચરિંગ અને એક્સપાયરી ડેટ ચોક્કસ ચેક કરો. બહુ ઓછો સમય બાકી હોય તેવી પ્રોડક્ટ ન લો. સોશિયલ મીડિયાના પ્રભાવથી બચો: માત્ર ઈન્ફ્લુએન્સર્સની રીલ્સ જોઈને પ્રોડક્ટ ન ખરીદો. તમારી પોતાની સ્કિન ટાઈપ (ઓઈલી, ડ્રાય કે સેન્સિટિવ) મુજબ જ પસંદગી કરો.
ટેસ્ટરનો ઉપયોગ કરો: ફાઉન્ડેશન, લિપસ્ટિક કે કન્સિલર ખરીદતી વખતે શેડ અને ટેક્સચર ચેક કરવા ટેસ્ટર જરૂર વાપરો. ખૂબ જ સસ્તી પ્રોડક્ટ્સ ત્વચાને નુકસાન પહોંચાડી શકે છે.
ડિસ્કાઉન્ટ એ ગ્રાહકોને આકર્ષવાનો બિઝનેસ પ્લાન છે. હવે પછી જ્યારે પણ તમે સેલમાં જાઓ, ત્યારે આ સ્માર્ટ ટિપ્સ યાદ રાખજો જેથી તમારા મહેનતના પૈસા વેડફાય નહીં.
