દરેક શેર પર થશે ‘મોટો ફાયદો’! 450% ડિવિડન્ડની જાહેરાતથી રોકાણકારો ‘ખુશખુશાલ’, શું તમારી પાસે છે આ સ્ટોક?
શેરબજારમાં ક્યારે કયો શેર રોકાણકારોને માલામાલ કરી દે તે કહેવું મુશ્કેલ છે. તાજેતરમાં જ ફાર્મા સેક્ટરની એક જાણીતી કંપનીએ માર્ચ ક્વાર્ટરના એવા શાનદાર પરિણામો જાહેર કર્યા છે કે, બજારમાં હલચલ મચી ગઈ છે.
હેલ્થકેર અને ફાર્મા સેક્ટરની કંપની પ્રોક્ટર એન્ડ ગેમ્બલ હેલ્થે (P&G Health) માર્ચ ક્વાર્ટરમાં (Q4) મજબૂત વ્યાપારી પ્રદર્શન નોંધાવ્યું છે. કંપનીનો નેટ પ્રોફિટ (ચોખ્ખો નફો) વાર્ષિક ધોરણે 54.6% વધીને ₹94.6 કરોડ થયો છે, જે ગયા વર્ષે સમાન ક્વાર્ટરમાં ₹61.2 કરોડ હતો.
કંપનીની કમાણી પણ 19.1% વધીને ₹371 કરોડ પર પહોંચી ગઈ છે, જે એક વર્ષ પહેલા ₹311 કરોડ હતી. બજારમાં સારી માંગ અને મજબૂત બ્રાન્ડ પોર્ટફોલિયોના કારણે કંપનીના વેચાણમાં સારો ઉછાળો જોવા મળ્યો છે.
P&G Health નું EBITDA 67.6% ઉછળીને ₹135.6 કરોડ પર પહોંચી ગયું છે, જે ગયા વર્ષે ₹80.9 કરોડ હતું, જ્યારે EBITDA માર્જિન 26% થી વધીને 37% થયું છે, જે ઉત્તમ કોસ્ટ કંટ્રોલ (ખર્ચ નિયંત્રણ) અને મજબૂત ઓપરેશનલ પ્રદર્શન દર્શાવે છે.
કંપનીના બોર્ડે નાણાકીય વર્ષ 2025-26 માટે ₹10 ની ફેસ વેલ્યુ ધરાવતા દરેક ઇક્વિટી શેર પર ₹45 પ્રતિ શેર ડિવિડન્ડ આપવાની ભલામણ કરી છે. આ પ્રસ્તાવ આગામી એન્યુઅલ જનરલ મીટિંગ (AGM) માં શેરધારકોની મંજૂરીને આધીન રહેશે.
કંપનીએ જણાવ્યું છે કે, AGM માં મંજૂરી મળ્યા બાદ, ડિવિડન્ડની ચુકવણી 25 સપ્ટેમ્બર 2026 સુધીમાં કરી દેવામાં આવશે. 26 જૂન 2026 એટલે કે મંગળવારને દિવસે પ્રોક્ટર એન્ડ ગેમ્બલ હેલ્થ કંપનીનો શેર ₹5,652.50 પર ટ્રેડ થઈ રહ્યો હતો.
