સરકારી તેલ કંપનીએ જાહેર કર્યું છેલ્લા 4 વર્ષનું ‘સૌથી મોટું ડિવિડન્ડ’, રોકાણકારો થશે ‘માલામાલ’
સરકારી તેલ કંપનીના રોકાણકારો માટે એક ખુશખબર સામે આવ્યા છે. વાત એમ છે કે, કંપનીએ પોતાના શેરધારકો માટે એક શાનદાર ડિવિડન્ડની જાહેરાત કરી છે, જે છેલ્લા ચાર વર્ષમાં કંપનીનું સૌથી મોટું ડિવિડન્ડ છે.
દેશની અગ્રણી સરકારી તેલ કંપનીએ નાણાકીય વર્ષ 2025-26 માટે પ્રતિ શેર 19.25 રૂપિયાના ફાઇનલ ડિવિડન્ડની જાહેરાત કરી છે. કંપનીએ આ માટે 14 ઓગસ્ટ 2026 ને રેકોર્ડ ડેટ તરીકે નક્કી કરી છે. જો કે, ડિવિડન્ડની ચૂકવણી શેરધારકોની મંજૂરી મળ્યા બાદ જ કરવામાં આવશે.
જણાવી દઈએ કે, છેલ્લા ચાર વર્ષમાં કંપનીનું આ સૌથી મોટું ડિવિડન્ડ છે. HPCL દ્વારા જાહેર કરાયેલ પ્રતિ શેર 19.25 રૂપિયાનું ડિવિડન્ડ છેલ્લા કેટલાક વર્ષોની સરખામણીએ ઘણું વધારે છે. આ પહેલા કંપનીએ ફેબ્રુઆરી 2024માં 15 રૂપિયા, ઓગસ્ટ 2024માં 11 રૂપિયા, ઓગસ્ટ 2025માં 10.50 રૂપિયા અને નવેમ્બર 2025માં પ્રતિ શેર 6 રૂપિયાનું ડિવિડન્ડ આપ્યું હતું.
માત્ર જુલાઈ 2021માં આપવામાં આવેલું પ્રતિ શેર 22.75 રૂપિયાનું ડિવિડન્ડ આના કરતાં વધુ હતું. કંપનીએ માર્ચ 2026 ના ક્વાર્ટરમાં 4,901 કરોડ રૂપિયાનો નેટ પ્રોફિટ (ચોખ્ખો નફો) નોંધાવ્યો છે, જે બજારના અંદાજ 2,120 કરોડ રૂપિયા કરતાં ઘણો વધારે રહ્યો.
આ અગાઉના ક્વાર્ટરની સરખામણીએ 20 ટકા વધુ છે. ક્વાર્ટર દરમિયાન કંપનીની આવક 1.15 લાખ કરોડ રૂપિયા રહી, જ્યારે EBITDA 28 ટકા વધીને 8,979 કરોડ રૂપિયા પર પહોંચી ગયો. ખાસ વાત એ છે કે, EBITDA માર્જિન પણ વધીને 7.8 ટકા થઈ ગયું છે.
નાણાકીય વર્ષ 2025-26માં HPCL નું રિફાઇનિંગ પ્રદર્શન પણ મજબૂત રહ્યું હતું. કંપનીનું વાર્ષિક ગ્રોસ રિફાઇનિંગ માર્જિન (GRM) વધીને 8.79 ડૉલર પ્રતિ બેરલ થઈ ગયું છે, જે ગયા વર્ષે 5.74 ડૉલર પ્રતિ બેરલ હતું. માર્ચ ક્વાર્ટરમાં GRM 14.5 ડૉલર પ્રતિ બેરલ રહ્યું હતું.
બીજી તરફ, ક્રૂડ ઓઈલના ભાવમાં ઘટાડા વચ્ચે 12 જૂને HPCL ના શેરમાં જોરદાર તેજી જોવા મળી હતી અને શુક્રવારે શેર 6.56 ટકા વધીને 388.90 રૂપિયા પર બંધ થયો હતો. 14 ઓગસ્ટ 2026 સુધી જે રોકાણકારો પાસે કંપનીના શેર હશે, તેઓ આ ડિવિડન્ડ મેળવવા માટે પાત્ર બનશે.
Published On - 2:13 pm, Sat, 13 June 26
