પસ્તાવો ન કરવો હોય તો આ કામ જલ્દી શરૂ કરી દેજો! માર્ચમાં રોકાણકારોએ રેકોર્ડબ્રેક ₹32,000 કરોડ ઠાલવ્યા
સમયસર લીધેલો એક નાનો નિર્ણય ભવિષ્યમાં મોટું વળતર આપી શકે છે. અત્યારે જ્યારે દરેક વ્યક્તિ પોતાની કમાણી વધારવા માટે નવા રસ્તા શોધી રહી છે, ત્યારે માર્ચ મહિનાના આ આંકડા જાણવા તમારા માટે ખૂબ જરૂરી છે.
ભારતીય શેરબજારમાં રોકાણ કરનારાઓ માટે મોટા સમાચાર સામે આવ્યા છે. માર્ચ મહિનામાં લોકોએ SIP દ્વારા રોકાણનો નવો રેકોર્ડ બનાવ્યો છે. તમને જણાવી દઈએ કે, માર્ચમાં કુલ SIP રોકાણ ₹32,087 કરોડ રહ્યું હતું, જે અત્યાર સુધીનું સૌથી ઊંચું સ્તર છે.
ફેબ્રુઆરીની સરખામણીમાં તેમાં 8%નો વધારો થયો છે. આ દર્શાવે છે કે, સામાન્ય લોકો હવે બચત માટે મ્યુચ્યુઅલ ફંડ પર વધુ વિશ્વાસ કરી રહ્યા છે. શેરબજારમાં નાણાં રોકતા ઇક્વિટી ફંડ્સમાં રોકાણકારોએ મોટાપાયે ફંડ રોક્યા છે. ફેબ્રુઆરીની સરખામણીમાં માર્ચમાં રોકાણ 56% વધીને ₹40,450 કરોડ પર પહોંચી ગયું છે.
આમાં સૌથી વધુ પસંદગી ફ્લેક્સી કેપ ફંડ્સને મળી છે, જેમાં એકલા ₹10,000 કરોડથી વધુનું રોકાણ આવ્યું છે. સ્મોલ અને મિડ કેપ ફંડ્સમાં પણ ભારે રોકાણ જોવા મળ્યું હતું. ખાસ વાત એ છે કે, જ્યાં એક તરફ લોકો શેરબજારના ફંડ્સમાં પૈસા લગાવી રહ્યા છે, ત્યાં બીજી તરફ ડેટ ફંડ્સમાંથી મોટાપાયે ઉપાડ થયેલ છે.
માર્ચ મહિનામાં રોકાણકારોએ આ ફંડ્સમાંથી ₹2.94 લાખ કરોડ પાછા ખેંચી લીધા છે. જાણકારોનું માનવું છે કે, માર્ચમાં નાણાકીય વર્ષ પૂરું થવાને કારણે કંપનીઓ અને મોટા રોકાણકારોને ટેક્સ ભરવા અથવા બીજા ખર્ચ માટે રોકડની જરૂર પડે છે, તેથી તેઓએ આ નાણાં ઉપાડ્યા છે.
આ સિવાય ભારે ઉપાડની અસર મ્યુચ્યુઅલ ફંડ ઉદ્યોગની કુલ સંપત્તિ પર પણ પડી છે. મ્યુચ્યુઅલ ફંડ્સનું કુલ એસેટ અંડર મેનેજમેન્ટ (AUM) 10% ઘટીને ₹73.48 લાખ કરોડ રહ્યું હતું, જે ફેબ્રુઆરીમાં ₹81.77 લાખ કરોડ હતું. હાઇબ્રિડ ફંડ્સ અને આર્બિટ્રેજ ફંડ્સમાંથી પણ રોકાણકારોએ આ દરમિયાન પૈસા બહાર કાઢ્યા છે.
