Gold Silver : સોનાના ભાવ ઘટ્યા પણ ચાંદીની ‘ચમક’ ચમકી ઉઠી, જાણો શું છે આજનો ભાવ
મંગળવારે સોનાના ભાવમાં 1,200 રૂપિયાનો ભારે ઘટાડો જોવા મળ્યો હતો. સોનાનો ભાવ પ્રતિ 10 ગ્રામે 1,00,170 રૂપિયા થઈ ગયો હતો. જો કે, ચાંદીમાં ચમક યથાવત રહી હતી. જાણો સોનાના ભાવમાં ઘટાડો કેમ થયો.
HDFC સિક્યોરિટીઝના સિનિયર એનાલિસ્ટ સૌમિલ ગાંધીએ જણાવ્યું હતું કે, "વેપારીઓ હવે એવું માનતા થયા છે કે ઈરાન અને ઈઝરાયલ વચ્ચે સીધી લડાઈ નહીં થાય અને બંને પક્ષો શાંતિથી વાતચીત દ્વારા કોઈ રસ્તો શોધી શકે તેમ છે. આ વિચારથી બજારમાં સોના અંગેની ચિંતા ઘટી રહી છે." ટૂંકમાં, જ્યારે ભયનું વાતાવરણ ઓછું થાય છે ત્યારે લોકો સોનામાં રોકાણ કરવાનું પણ ઓછું કરે છે, જેના કારણે સોનાનો ભાવ ઘટે છે.
સોનાના ભાવ ઘટ્યા હોવા છતાં, ચાંદી મોંઘી થઈ ગઈ છે. મંગળવારે ચાંદીનો ભાવ 100 રૂપિયા વધીને 1,07,200 રૂપિયા પ્રતિ કિલો થયો છે. સોમવારે તેનો ભાવ 1,07,100 રૂપિયા પ્રતિ કિલો હતો.
મહેતા ઇક્વિટીઝના વાઇસ પ્રેસિડેન્ટ રાહુલ કલાન્ત્રીએ જણાવ્યું હતું કે, લોકો હવે ઊંચા ભાવે નફો કમાઈ રહ્યા છે અને ચાંદી જેવી ધાતુઓમાં થોડું રોકાણ કરી રહ્યા છે.
વૈશ્વિક સ્તરે પણ સોનાના ભાવમાં ઘટાડો થયો છે. સ્પોટ ગોલ્ડનો ભાવ ઘટીને USD 3,380.65 પ્રતિ ઔંસ થયો છે. જ્યારે સ્પોટ સિલ્વરનો ભાવ 0.44 ટકા વધીને USD 36.47 પ્રતિ ઔંસ થયો છે. આ આંકડા દર્શાવે છે કે, વિશ્વભરના રોકાણકારો હાલમાં સાવચેત થયા છે.
હવે બજારની નજર ફેડરલ રિઝર્વ બેંક ઓફ અમેરિકાની બેઠક અને કેટલાક મહત્વપૂર્ણ આર્થિક ડેટા પર છે. ટૂંકમાં તેમની નજર 'રિટેલ સેલ્સ' અને 'ઈન્ડસ્ટ્રિયલ આઉટપુટ' પર છે.
એબાન્સ ફાઇનાન્સિયલ સર્વિસીસના સીઈઓ ચિંતન મહેતા કહે છે, "આ આંકડાઓ આપણને સમજવામાં મદદ કરશે કે યુએસ અર્થતંત્ર કેટલું મજબૂત છે. જો નબળાઈ જોવામાં આવશે, તો લોકો એકવાર ફરીથી સોના અને ચાંદીની નજર કરશે."
Published On - 8:10 pm, Tue, 17 June 25
