‘સોનું’ 26% સસ્તું થયું… શું આ રોકાણ કરવાની સાચી તક છે કે હજુ ભાવ ઘટશે? રિપોર્ટમાં થયો ‘મોટો ખુલાસો’
ભારતમાં તહેવારોની સીઝનની શરૂઆત સાથે જ બુલિયન માર્કેટમાં હલચલ વધી ગઈ છે. વર્ષ 2026માં રેકોર્ડ ઊંચાઈને સ્પર્શ્યા બાદ સોનાના ભાવમાં લગભગ 26%નું કરેક્શન (ઘટાડો) જોવા મળ્યું છે. હવે રોકાણકારો એ મૂંઝવણમાં છે કે, શું આ સોનું ખરીદવાનો સૌથી યોગ્ય સમય છે કે પછી બજારમાં હજુ વધુ ઘટાડો આવશે?
ભારતમાં તહેવારો અને લગ્નની સીઝન શરૂ થઈ ચૂકી છે. એવામાં સોનાના ભાવ પર રોકાણકારોની નજર ટકેલી છે. વર્ષ 2026ના સર્વોચ્ચ સ્તરથી સોનાના ભાવમાં આશરે 26%નો ઘટાડો આવી ચૂક્યો છે. આ બધા વચ્ચે Tata Asset Managementનું માનવું છે કે, લાંબાગાળાના રોકાણકારો માટે આ ઘટાડો ખરીદીની શ્રેષ્ઠ તક પૂરી પાડી શકે છે. જો કે, Tata MF એ ઉતાવળમાં રોકાણ કરવાથી બચવાની સલાહ આપી છે.
ફંડ હાઉસનું માનવું છે કે, સોનામાં આગળ પણ તીવ્ર ઉતાર-ચઢાવ જોવા મળી શકે છે. તેથી, ટૂંકાગાળાની તેજી કે મંદી જોઈને નિર્ણય લેવો યોગ્ય રહેશે નહીં. Tata MF ના ઓક્ટોબર 2026ના માર્કેટ આઉટલુક મુજબ, સોનું જાન્યુઆરીના આશરે $5,595 પ્રતિ ઔંસના શિખરથી ઘટીને લગભગ $4,138 પર આવી ગયું છે. ટૂંકમાં, તેમાં આશરે 26%નો ઘટાડો નોંધાયો છે. ફંડ હાઉસના જણાવ્યા અનુસાર, આ ઘટાડાનું મુખ્ય કારણ યુએસ ટ્રેઝરી યીલ્ડમાં વધારો અને મજબૂત અમેરિકન ડોલર છે.
Tata MF નું કહેવું છે કે, સોનાની મૂળભૂત ક્ષમતા કે સ્ટોરીમાં કોઈ મોટી નબળાઈ આવી નથી. લાંબાગાળે સોનાની તરફેણમાં સૌથી મોટું પરિબળ સેન્ટ્રલ બેંકો દ્વારા થઈ રહેલી ખરીદી છે. Tata MF મુજબ, વર્ષ 2026ના બીજા ત્રિમાસિક ગાળામાં સેન્ટ્રલ બેંકોએ 289 ટન સોનું ખરીદ્યું.
વર્ષ 2026માં આ ખરીદી 700 થી 900 ટન વચ્ચે રહી શકે છે. વર્ષ 2022 પહેલાં આનો વાર્ષિક સરેરાશ દર આશરે 400-500 ટન હતો. ટૂંકમાં, સેન્ટ્રલ બેંકોનો સોના પ્રત્યેનો રસ પહેલાં કરતાં નોંધપાત્ર રીતે વધ્યો છે. Tata MF મુજબ, ખાસ કરીને ઉભરતા બજારોની સેન્ટ્રલ બેંકો પોતાના અનામત (રિઝર્વ) ભંડોળમાંથી અમેરિકન ડોલર ધરાવતી સંપત્તિઓનો હિસ્સો ઘટાડી રહી છે. આ માટે તેઓ સોનાને એક ઉત્તમ વિકલ્પ તરીકે જોઈ રહ્યા છે.
'ચીન' પણ સોનાની માંગનું એક મોટું કેન્દ્ર બની રહ્યું છે. Tata MF મુજબ, વર્ષ 2026માં ચીનની સોનાની આયાત 1,000 ટનને પાર પહોંચી ચૂકી છે. આ આંકડો વર્ષ 2025માં આખા વર્ષ દરમિયાન થયેલી આયાત કરતાં પણ વધુ છે. રિટેલ માંગ, ગોલ્ડ ETF માં રોકાણ અને સેન્ટ્રલ બેંકની ખરીદીથી ચીનના ફિઝિકલ ગોલ્ડ માર્કેટને ટેકો મળી રહ્યો છે. મિડલ ઈસ્ટમાં તણાવ અને અમેરિકા-ચીન વચ્ચેની વ્યૂહાત્મક સ્પર્ધા પણ સોનાની માંગમાં વધારો કરી શકે છે.
Tata MF એ વધતા અમેરિકી દેવા અને ફિસ્કલ ડેફિસિટ (રાજકોષીય ખાધ)ને પણ સોના માટે લાંબાગાળાનું પોઝિટિવ પરિબળ ગણાવ્યું છે. US સરકારનું દેવું 40 ટ્રિલિયન ડોલરને પાર પહોંચી ગયું છે. આ સિવાય રાજકોષીય ખાધ GDP ના આશરે 6-7% પર છે. ફંડ હાઉસના જણાવ્યા મુજબ, દેવાની સ્થિરતા અને ડોલરની ખરીદશક્તિને લઈને ચિંતા વધશે, તો સોનું રોકાણકારો માટે 'વેલ્યુ સ્ટોર' તરીકે વધુ આકર્ષક બની શકે છે.
લાંબાગાળે સોના પર Tata MF નો દ્રષ્ટિકોણ સકારાત્મક છે. જો કે, તાજેતરની તેજી અને મંદીને જોતાં ફંડ હાઉસે સાવચેતી રાખવા કહ્યું છે. સોનામાં આગળ પણ તીવ્ર કન્સોલિડેશન (સ્થિરતા કે ઉતાર-ચઢાવ) જોવા મળી શકે છે. આથી, Tata MF એકસાથે પૂરી રકમ રોકવાને બદલે તબક્કાવાર રોકાણ (SIP/તબક્કાવાર પદ્ધતિ) કરવાનો આગ્રહ રાખે છે. બજારની સૌથી નીચલી સપાટી પકડવાનો પ્રયાસ કરવાને બદલે અલગ-અલગ સમયે થોડું-થોડું રોકાણ કરવું શ્રેષ્ઠ રહેશે.
