નવરાત્રી પર્વે ગૌતમ અદાણી અને ડૉ. પ્રીતિ અદાણીએ દક્ષિણ ગુજરાતના શ્રીમદ રાજચંદ્ર આશ્રમની લીધી મુલાકાત
નવરાત્રીના પવિત્ર અવસરે અદાણી ગ્રૂપના ચેરમેન ગૌતમ અદાણી અને અદાણી ફાઉન્ડેશનના ચેરપર્સન ડૉ. પ્રીતિ અદાણીએ ધરમપુર સ્થિત શ્રીમદ રાજચંદ્ર આશ્રમની મુલાકાત લીધી હતી. આ મુલાકાત દરમિયાન તેમણે પૂજ્ય ગુરુદેવશ્રી રાકેશજીના આશીર્વાદ મેળવ્યા હતા તેમજ આદિવાસી મહિલા સશક્તિકરણ અને આરોગ્ય ક્ષેત્રે સહયોગ અંગે મહત્વપૂર્ણ ચર્ચાઓ કરી હતી.
નવરાત્રીના પવિત્ર પર્વ નિમિત્તે અદાણી ગ્રૂપના ચેરમેન ગૌતમ અદાણી અને અદાણી ફાઉન્ડેશનના ચેરપર્સન ડૉ. પ્રીતિ અદાણીએ દક્ષિણ ગુજરાત સ્થિત 'શ્રીમદ રાજચંદ્ર મિશન ધરમપુર' (SRMD) ની મુલાકાત લીધી હતી. આ મુલાકાત દરમિયાન બંનેએ મિશનના સંસ્થાપક પૂજ્ય ગુરુદેવશ્રી રાકેશજીના દર્શન કરી આશીર્વાદ પ્રાપ્ત કર્યા હતા. આ મુલાકાતમાં સેવા, યુવા વિકાસ, આદિવાસી મહિલાઓના ઉત્થાન અને વંચિત સમુદાયોના કલ્યાણ માટેના સંભવિત સહયોગ અંગે ઊંડાણપૂર્વક ચર્ચા કરવામાં આવી હતી.
શ્રીમદ રાજચંદ્ર આશ્રમની મુલાકાત અંગે ગૌતમ અદાણીએ જણાવ્યું હતું કે, “આ નવરાત્રીએ હું મા દુર્ગાના આશીર્વાદ માંગું છું અને મારા જીવનને દિશા આપતાં મૂલ્યોનું સ્મરણ કરું છું. શ્રીમદ રાજચંદ્ર આશ્રમની મારી મુલાકાતે મારા એ દૃઢ વિચારને વધુ મજબૂત બનાવ્યો છે કે: 'સેવા એ જ સાધના છે'. હું હંમેશાં નમ્રતાપૂર્વક સેવા કરવાની અને અન્યોના જીવનમાં સકારાત્મક પરિવર્તન લાવવાની શક્તિ મળે તેવી પ્રાર્થના કરું છું.”
મુલાકાત દરમિયાન પૂજ્ય ગુરુદેવશ્રીએ ભારપૂર્વક જણાવ્યું હતું કે સાધના (આધ્યાત્મિક અભ્યાસ) અને સેવા (નિઃસ્વાર્થ કર્મ) એકબીજાના પૂરક છે. તેમણે પોતાના જીવન, સંસાધનો અને તકોનો ઉપયોગ સમાજના વ્યાપક હિત માટે કરવા પર ભાર મૂક્યો હતો. અદાણી દંપતીએ આશ્રમના ધ્યાન અને પ્રવચન પરિસર 'રાજ સભાગૃહ' ખાતે આયોજિત સત્સંગમાં પણ ભાગ લીધો હતો, જ્યાં પૂજ્ય ગુરુદેવશ્રીએ માનવ જીવનના ઉદ્દેશ્ય અને આધ્યાત્મિક સાધનાના મહત્વ પર માર્ગદર્શન આપ્યું હતું. આ ઉપરાંત ગૌતમ અદાણીએ સામાજિક પહેલોમાં યોગદાન આપતા વિવિધ ક્ષેત્રોના યુવા પ્રોફેશનલ્સ અને વિદ્યાર્થીઓ સાથે પણ સંવાદ સાધ્યો હતો.
અદાણી ફાઉન્ડેશનના ચેરપર્સન ડૉ. પ્રીતિ અદાણીએ 'શ્રીમદ રાજચંદ્ર સર્વમંગલ સેન્ટર ઓફ એક્સેલન્સ ફોર વિમેન'ની મુલાકાત લીધી હતી, જ્યાં તેમણે કૌશલ્ય વિકાસ, આજીવિકા અને ઉદ્યોગસાહસિકતા કાર્યક્રમો દ્વારા આત્મનિર્ભર બનેલી આદિવાસી મહિલાઓ સાથે વાતચીત કરી હતી. તેમણે શ્રીમદ રાજચંદ્ર હોસ્પિટલ એન્ડ રિસર્ચ સેન્ટરની મુલાકાત લઈને દિવ્યાંગ બાળકોને તબીબી સહાય સાધનોનું વિતરણ કર્યું હતું. આ સાથે જ તેમણે SRMD સ્થિત જિનમંદિરમાં ભગવાન મહાવીરના દર્શન અને પ્રાર્થના કરી હતી.
ગૌતમ અદાણીએ મિશનની માનવતાવાદી શાખા ‘શ્રીમદ રાજચંદ્ર લવ એન્ડ કેર’ (SRLC) સાથે વિવિધ ક્ષેત્રોમાં સંયુક્ત કામગીરી માટે ઉત્સુકતા દર્શાવી હતી. ડૉ. પ્રીતિ અદાણીએ ખાસ કરીને ‘વિઝન કેર’ (દ્રષ્ટિ સુરક્ષા) પહેલ પર અદાણી ફાઉન્ડેશન સાથે મળીને સંભવિત ભાગીદારી અંગે વિસ્તૃત ચર્ચા કરી હતી.
શ્રીમદ રાજચંદ્ર મિશન ધરમપુર વિશે: વલસાડના ધરમપુરમાં 355 એકરમાં ફેલાયેલો શ્રીમદ રાજચંદ્ર આશ્રમ એ SRMD નું આંતરરાષ્ટ્રીય વડું મથક છે. વર્ષ 1994 માં પૂજ્ય ગુરુદેવશ્રી રાકેશજી દ્વારા સ્થપાયેલું આ મિશન મહાત્મા ગાંધીના આધ્યાત્મિક માર્ગદર્શક ગણાતા જૈન સંત શ્રીમદ રાજચંદ્રજીના વિચારોથી પ્રેરિત છે. વિશ્વના 6 ખંડોમાં 142 થી વધુ કેન્દ્રો ધરાવતું આ મિશન આંતરિક આધ્યાત્મિક જાગૃતિ અને નિઃસ્વાર્થ સેવાનો સમન્વય કરે છે. તેની સંસ્થા SRLC આરોગ્ય, શિક્ષણ, માનવતાવાદી સહાય, પશુ કલ્યાણ અને પર્યાવરણ સંરક્ષણ જેવા ક્ષેત્રોમાં સક્રિય છે અને અત્યાર સુધીમાં વિશ્વભરમાં 3.3 કરોડથી વધુ લોકોના જીવનને સ્પર્શી ચૂકી છે.
