Holi Celebration : ગુજરાતના સૌથી મોટા હોળી દહનની તસવીરો આવી સામે, ભક્તોનું ઘોડાપૂર, જુઓ તસવીરો
પાલજ ગામમાં 700 વર્ષથી ઉજવાતી 35 ફૂટ ઉંચી ભવ્ય હોળી ગુજરાતમાં પ્રખ્યાત છે. હજારો ભક્તો હોળીના દર્શન માટે ઉમટી પડે છે. મહાકાળી માતાના પૂજન સાથે હોળી પ્રગટાવાય છે અને ગ્રામજનો અંગારા પર ચાલે છે.
રાજ્યભરમાં હોળી પર્વની ધામધૂમથી ઉજવણી થઈ રહી છે. ગાંધીનગર જિલ્લાના પાલજ ગામે રાજ્યની સૌથી ઉંચી અને ભવ્ય હોળી પ્રગટાવવામાં આવી છે, જે 35 ફૂટની ઊંચાઈ ધરાવે છે. હોળીના દર્શન માટે હજારો લોકોની ભીડ ઉમટી પડી છે અને મહાકાળી માતાના પૂજન સાથે આ પ્રગટ્યનો આરંભ થયો હતો.
પાલજ ગામમાં 700 વર્ષથી આ પરંપરા નિભાવવામાં આવી રહી છે. અહીં 30 x 35 ફૂટની આકૃતિવાળી આ હોળી પ્રગટાવવામાં આવે છે, જેના ધગધગતા જ્વાળાઓ આશરે 100 ફૂટ સુધી ઉંચા ઉઠતા જોવા મળતા હોય છે. આ અનોખો અને અલૌકિક નજારો દર્શનાર્થીઓ માટે આકર્ષણનું કેન્દ્ર છે. સુરક્ષા વ્યવસ્થાને ધ્યાનમાં રાખીને કાયદો વ્યવસ્થા જાળવવા માટે ચુસ્ત પોલીસ બંદોબસ્ત ગોઠવાયો છે.
ગામના મહાકાળી માતાના મંદિર પ્રત્યે શ્રદ્ધા દર્શાવવા, પ્રગટ્ય પછી અહીંના પૂજારી અને ગ્રામજનો ધગધગતા અંગારા પર ચાલે છે. શ્રદ્ધા અને ભક્તિથી ભરેલું આ દૃશ્ય લોકો માટે અદભૂત અનુભવ આપે છે અને ખાસ વાત એ છે કે આ પરંપરામાં આજદિન સુધી કોઈપણ જાતની દુર્ઘટના થઈ નથી.
હોળીના પ્રાગટ્ય માટે દસથી પંદર દિવસ પહેલાં જ તૈયારીઓ શરૂ થઈ જાય છે. ગામના યુવાનો 200 થી 300 ટન લાકડાં ભેગા કરે છે અને 35 ફૂટ ઊંચી હોળી માટે સમાન વ્યવસ્થા ગોઠવે છે. આ સમયે કેરી, મહુડો અને રાયસના ડોડાના હાર બનાવવાની પરંપરા છે અને ભક્તો હોળીની પરિક્રમા કરે છે. માન્યતા છે કે આ તાપ લીધા પછી વર્ષ દરમિયાન શારીરિક તકલીફો રહેતી નથી.
હોળીના દિવસે ગામમાં મેળાનું પણ આયોજન થાય છે, જેમાં આજુબાજુના ગામડાઓમાંથી હજારો શ્રદ્ધાળુઓ ઉમટી પડે છે. આ પર્વની વિશિષ્ટતા એ છે કે હોળીના જ્વાળાની દિશા પરથી આવનાર વર્ષ માટે ભવિષ્યવાણી કરવામાં આવે છે. આ પરંપરાએ પાલજ ગામને ગુજરાતભરમાં આગવી ઓળખ આપી છે.
Published On - 7:18 pm, Thu, 13 March 25
