પૈસા ‘FD’ માં રોકવા કે ‘SIP’ માં? જાણો તમારા માટે કયો વિકલ્પ વધુ ‘યોગ્ય’ છે
રોકાણને લઈને દરેક વ્યક્તિના મનમાં એક જ સવાલ હોય છે કે, પૈસા ફિક્સ્ડ ડિપોઝિટ (FD) માં લગાવવા જોઈએ કે પછી સિસ્ટેમેટિક ઇન્વેસ્ટમેન્ટ પ્લાન (SIP) માં? એવામાં જણાવી દઈએ કે, રોકાણના બંને વિકલ્પોની પોતાની આગવી વિશેષતાઓ છે.
FD ચોક્કસ વળતર અને મૂડીની સુરક્ષા પૂરી પાડે છે, જ્યારે SIP દ્વારા રોકાણકારો મ્યુચ્યુઅલ ફંડમાં નિયમિત રોકાણ કરીને બજાર આધારિત વળતરનો લાભ ઉઠાવી શકે છે. હકીકતમાં, સાચા વિકલ્પની પસંદગી રોકાણકારના લક્ષ્ય, જોખમ લેવાની ક્ષમતા અને રોકાણના સમયગાળા પર આધાર રાખે છે.
FD એ એવા લોકો માટે રોકાણનો એક લોકપ્રિય વિકલ્પ છે, જેઓ પોતાના પૈસાની સુરક્ષા ઈચ્છે છે. આમાં રોકાણકારને પહેલેથી જ ખબર હોય છે કે, રોકાણનો સમયગાળો પૂરો થયા પછી તેને કેટલું વળતર મળશે. બજારમાં આવતા ઉતાર-ચઢાવની FD પર કોઈ અસર થતી નથી, તેથી જોખમથી બચવા માંગતા રોકાણકારો માટે તે યોગ્ય માનવામાં આવે છે. આ ઉપરાંત, FD દ્વારા નિયમિત આવક મેળવવાનો વિકલ્પ પણ ઉપલબ્ધ હોય છે, જે નિવૃત્ત લોકો અથવા નિશ્ચિત આવક ઈચ્છતા લોકો માટે ફાયદાકારક સાબિત થઈ શકે છે.
બીજી તરફ, SIP એ મ્યુચ્યુઅલ ફંડમાં નિયમિત રોકાણ કરવાની એક રીત છે. આમાં રોકાણકાર દર મહિને એક નિશ્ચિત રકમનું રોકાણ કરે છે. SIPનો સૌથી મોટો ફાયદો એ છે કે, તેમાં નાની રકમથી પણ રોકાણ શરૂ કરી શકાય છે. SIP દ્વારા રોકાણકારોને "રૂપી કોસ્ટ એવરેજિંગ"નો લાભ મળે છે, જેનાથી બજારના ઉતાર-ચઢાવની અસર ઓછી થઈ શકે છે. આ ઉપરાંત, લાંબાગાળા સુધી રોકાણ જાળવી રાખવા પર કમ્પાઉન્ડિંગનો લાભ મળે છે, જેનાથી રોકાણની રકમ સમય જતાં ઝડપથી વધી શકે છે.
જો તમે મધ્યમ ગાળા માટે એટલે કે 7 વર્ષ માટે રોકાણ કરવા માંગતા હોવ, તો FDને બદલે SIP પસંદ કરી શકાય છે. જો કે, SIP એ બજાર સાથે જોડાયેલું રોકાણ છે, જેમાં ઉતાર-ચઢાવનું જોખમ રહેલું હોય છે પરંતુ લાંબાગાળે FDની સરખામણીમાં વધુ વળતર મળવાની શક્યતા પણ હોય છે.
7 વર્ષ જેવા સમયગાળામાં જો તમારો લક્ષ્ય વધુ ફંડ બનાવવાનો હોય અને તમે થોડું જોખમ ઉઠાવી શકતા હોવ, તો SIP વધુ સારો વિકલ્પ સાબિત થઈ શકે છે. SIPની સાથે સ્ટેપ-અપ SIP એટલે કે દર વર્ષે નિશ્ચિત રકમ વધારીને રોકાણ કરો છો, તો FDની સરખામણીમાં ઘણું સારું વળતર મેળવી શકો છો. જો તમે જોખમ લેવા માંગતા ન હોવ, તો નિવૃત્તિ પછી નિશ્ચિત આવક માટે FDમાં પૈસા લગાવી શકો છો.
