પોતાનું ઘર ખરીદવા કે બનાવવા માટે PF ખાતામાંથી કેટલા પૈસા ઉપાડી શકાશે? જાણો EPFO ના નવા અને સરળ નિયમો
દરેક વ્યક્તિનું સપનું હોય છે કે, તેમનું પોતાનું એક સુંદર ઘર હોય પણ હોમ લોન અને મોટો ખર્ચ જોઈને ઘણીવાર લોકો મૂંઝવણમાં મુકાઈ જાય છે. જો તમે પણ નવું ઘર ખરીદવા, મકાન બાંધવા કે જૂના ઘરનું રિપેરિંગ કરાવવાનું વિચારી રહ્યા છો, તો તમારા માટે એક ખૂબ જ મોટા અને રાહતના સમાચાર છે. વાત એમ છે કે, EPFO (એમ્પ્લોઇઝ પ્રોવિડન્ટ ફંડ ઓર્ગેનાઇઝેશન) એ પીએફ (PF) માંથી પૈસા ઉપાડવાના નિયમો ખૂબ જ સરળ બનાવી દીધા છે. હવે તમે તમારા પીએફ ખાતામાંથી પહેલા કરતાં વધુ રકમ ઉપાડીને પોતાના ઘરનું સપનું પૂરું કરી શકો છો.
પોતાનું સપનાનું ઘર ખરીદવું, હોમ લોન ચૂકવવી કે મકાનનું રિપેરિંગ કરાવવું હવે એમ્પ્લોઇઝ પ્રોવિડન્ટ ફંડ (EPF) ના સભ્યો માટે ખૂબ સરળ બની ગયું છે. એમ્પ્લોઇઝ પ્રોવિડન્ટ ફંડ ઓર્ગેનાઇઝેશન (EPFO) ના નિયમોમાં થયેલા સુધારા હેઠળ હવે પીએફ (PF) ખાતામાંથી પહેલા કરતાં વધુ રકમ ઉપાડી શકાય છે. જો તમે પણ નવું મકાન બનાવવાની કે ખરીદવાની યોજના બનાવી રહ્યા છો, તો તમારા PF ફંડનો એક મોટો હિસ્સો આના માટે વાપરી શકો છો.
સરળ બનાવાયેલા PF ઉપાડના નિયમો હેઠળ પાત્ર સભ્યો પોતાના કુલ PF બેલેન્સના 75 ટકા સુધી ઉપાડી શકે છે. સૌથી મહત્વપૂર્ણ ફેરફાર એ છે કે, હવે ઉપાડની ગણતરી માત્ર કર્મચારીના પોતાના યોગદાન સુધી સીમિત નથી. આ 75 ટકાની સીમામાં કર્મચારીનો ફાળો, એમ્પ્લોયર (કંપની)નો ફાળો અને તેના પર મળેલું કુલ વ્યાજ, આ ત્રણેય જોડાયેલ છે.
ઉદાહરણ તરીકે, જો તમારા PF ખાતામાં કુલ 10 લાખ રૂપિયાનું બેલેન્સ છે, તો તમે 7.5 લાખ રૂપિયા સુધી ઉપાડી શકો છો, જ્યારે 2.5 લાખ રૂપિયા તમારા ખાતામાં સુરક્ષિત રહેશે. બસ એ વાતનું ધ્યાન રાખો કે, 75 ટકાની સીમા એ મહત્તમ મર્યાદા છે અને ફાઇનલ રકમ તમારા હેતુ તેમજ નિયમો પર નિર્ભર કરે છે.
આવાસ (ઘર) સંબંધિત આ ઉપાડ સુવિધાનો ઉપયોગ મુખ્યત્વે ચાર કાર્યો (નવું ઘર, ફ્લેટ કે જમીન ખરીદવી, પોતાના મકાનનું નિર્માણ કરાવવા, પહેલાથી ચાલી રહેલી હોમ લોનની ચુકવણી કરવી અથવા હાલના ઘરનું રિપેરિંગ, નવીનીકરણ કે વિસ્તાર કરાવવો) માટે કરી શકાય છે. આ બધી જરૂરિયાતો માટે એક સમાન અને સરળ માળખું તૈયાર કરવામાં આવ્યું છે, જેથી સભ્યોને પ્રક્રિયા સમજવામાં કોઈ મુશ્કેલી ન પડે.
જૂના નિયમોમાં અલગ-અલગ હેતુઓ માટે નોકરીનો સમયગાળો અને ઉપાડની શરતો ખૂબ જ જટિલ હતી. પરંતુ નવા નિયમો અનુસાર, આ સરળ બનાવાયેલી આવાસ ઉપાડ સુવિધાનો લાભ લેવા માટે સભ્યએ માત્ર 12 મહિના (1 વર્ષ)ની ન્યૂનતમ પીએફ મેમ્બરશિપ પૂર્ણ કરવી પડશે. એક વર્ષની નોકરી પૂરી થતાં જ સભ્ય આ ફંડનો ઉપયોગ કરવા માટે પાત્ર બની જાય છે.
EPFO ના નિયમો અનુસાર, કોઈ પણ સભ્ય પોતાની આખી નોકરી દરમિયાન ઘર સંબંધિત કાર્યો માટે મહત્તમ 5 વખત પીએફ એડવાન્સ ઉપાડી શકે છે. જમીન ખરીદવી, લોન ચૂકવવી અને પાછળથી ઘરનું રિપેરિંગ કરાવવું જેવી જરૂરિયાતો આ જ એક કેટેગરી હેઠળ આવે છે. તેથી, સભ્યોએ પોતાના ભવિષ્યની જરૂરિયાતોને ધ્યાનમાં રાખીને જ ઉપાડનું આયોજન કરવું જોઈએ. આ ઉપરાંત, લગ્ન, શિક્ષણ કે સારવાર જેવી અન્ય જરૂરિયાતો માટે પીએફ ઉપાડના નિયમો અને મર્યાદાઓ અલગ છે.
જો કે, ઘર માટે PFમાંથી પૈસા ઉપાડવા એ મોટો નાણાકીય સપોર્ટ આપે છે અને તમને ભારે વ્યાજવાળા વધારાના દેવાથી બચાવે છે પરંતુ તેની સાથે એક મોટું નુકસાન પણ જોડાયેલું છે. PF મુખ્યત્વે તમારા નિવૃત્તિ (રિટાયરમેન્ટ) માટે કરવામાં આવેલી બચત છે. જો તમે કરિયરના શરૂઆતના કે મધ્યના વર્ષોમાં મોટી રકમ ઉપાડી લો છો, તો તેના પર મળતા ચક્રવૃદ્ધિ વ્યાજ (કમ્પાઉન્ડિંગ)નો લાભ ખતમ થઈ જાય છે. આનાથી તમારું રિટાયરમેન્ટ ફંડ ખૂબ ઓછું થઈ શકે છે. તેથી, પીએફમાંથી પૈસા ઉપાડતા પહેલાં પોતાની અન્ય બચતો અને વિકલ્પોનું આંકલન ચોક્કસ કરી લો.
