EPFO એલર્ટ: 26થી 28 જૂન સુધી PF ક્લેમ નહીં કરી શકો, UMANGની સેવાઓ પણ થશે પ્રભાવિત
EPFOએ સિસ્ટમ અપગ્રેડેશન માટે 26થી 28 જૂન દરમિયાન PF ક્લેમ સંબંધિત ઓનલાઈન સેવાઓ બંધ રાખવાની જાહેરાત કરી છે. આ દરમિયાન નવા ક્લેમ દાખલ નહીં થઈ શકે અને UMANG એપની કેટલીક સેવાઓ પણ પ્રભાવિત રહેશે.
જો તમે કર્મચારી ભવિષ્ય નિધિ સંગઠન EPFO સાથે જોડાયેલ કોઈ મહત્વનું કામ કરવાની તૈયારીમાં છો, તો આ સમાચાર તમારા માટે ખૂબ જ મહત્વના છે. EPFOએ પોતાની ઓનલાઈન સેવાઓમાં સુધારા અને અપગ્રેડેશન માટે કેટલાક દિવસો માટે PF ક્લેમ સંબંધિત સેવાઓ બંધ રાખવાનો નિર્ણય લીધો છે.
EPFOના જણાવ્યા મુજબ, 26 જૂન 2026ની રાત્રે 12 વાગ્યાથી 28 જૂન 2026ની રાત્રે 11:59 વાગ્યા સુધી સભ્યો નવા PF ક્લેમ સબમિટ કરી શકશે નહીં. આ ઉપરાંત અગાઉથી સબમિટ કરાયેલા ક્લેમની પ્રક્રિયા પણ આ સમયગાળા દરમિયાન અસ્થાયી રીતે રોકી દેવામાં આવશે. તમામ સેવાઓ 29 જૂન 2026ની મધરાતથી ફરી શરૂ કરવામાં આવશે.
સંસ્થાએ જણાવ્યું છે કે ડેટાબેઝ અને સોફ્ટવેર અપગ્રેડેશન દ્વારા સેવાઓને વધુ ઝડપી, સરળ અને કાર્યક્ષમ બનાવવા માટે આ કામગીરી હાથ ધરવામાં આવી રહી છે. તેથી PF સંબંધિત કોઈ તાત્કાલિક કામ હોય તો 26 જૂન પહેલાં પૂર્ણ કરવાની સલાહ આપવામાં આવી છે.
UMANG એપનો ઉપયોગ કરતા લાખો યુઝર્સને પણ અસર થઈ શકે છે. PF બેલેન્સ ચેક કરવું, ક્લેમની સ્થિતિ જોવી, UAN સંબંધિત સેવાઓ મેળવવી, ફરિયાદ નોંધાવવી અને જીવન પ્રમાણપત્ર જેવી EPFO સેવાઓ 2 જુલાઈ 2026 સુધી મેન્ટેનન્સને કારણે પ્રભાવિત રહી શકે છે.
આ દરમિયાન EPFO સભ્યો માટે એક રાહતની વાત એ છે કે તેઓ મિસ્ડ કોલ અથવા SMS દ્વારા PF બેલેન્સની માહિતી મેળવી શકે છે. રજિસ્ટર્ડ મોબાઇલ નંબર પરથી 011-22901406 પર મિસ્ડ કોલ આપીને અથવા 7738299899 નંબર પર EPFOHO UAN ENG લખીને SMS મોકલીને PF બેલેન્સ અને તાજેતરની જમા રકમની વિગતો મેળવી શકાય છે.
ઉલ્લેખનીય છે કે કેન્દ્ર સરકારે નાણાકીય વર્ષ 2025-26 માટે EPF પર 8.25 ટકા વ્યાજદરને મંજૂરી આપી છે, જેનો લાભ પાત્ર ખાતાધારકોને મળશે. જોકે, આગામી થોડા દિવસો માટે ઓનલાઈન સેવાઓ બંધ રહેવાની હોવાથી સભ્યોએ સમયસર પોતાના PF સંબંધિત કામનું આયોજન કરવું જરૂરી બન્યું છે.
