Lok Sabha Elections : મતદાન માટેનો ઉત્સાહ યથાવત , ગુજરાતના આ મતદાન મથકમાં થયુ 100 ટકા મતદાન, જુઓ ફોટા
આજે લોકસભા ચૂંટણીના ત્રીજા તબક્કાનું મતદાન યોજાઈ રહ્યુ છે. ત્યારે ગુજરાતમાં લોકસભાની 25 બેઠકો માટે મતદાન થઈ રહ્યું છે. ગુજરાતના જુદી - જુદી લોકસભા બેઠક પર ત્રણ વાગ્યા સુધી 47.03 % મતદાન થયુ છે. પરંતુ રાજ્યનું આ એકમાત્ર મતદાન છે જ્યાં 100 ટકા મતદાન થઈ ગયુ છે
લોકશાહીમાં એક મતનું પણ ખૂબ જ મહત્તવ છે. મતદાન કરવુ એ દરેક નાગરીકનો અધિકાર છે. ત્યારે ગુજરાતમાં આજે એક મતદાન મથક પર 100 ટકા મતદાન થયુ છે.
ગીર સોમનાથ જિલ્લાના ઉના વિધાનસભા બેઠકમાં આવેલું અનોખું મતદાન મથક બાણેજમાં સો ટકા મતદાન થયું છે.આ મતદાન મથક પર દરેક ચૂંટણીમાં 100 ટકા મતદાન થાય છે.
ગીર જંગલ મધ્યે ચૂંટણી પંચ દ્વારા આ બુથ તૈયાર કરવામાં આવે છે.અહીં માત્ર એક મત માટે જ મતદાન મથક તૈયાર કરવામાં આવે છે. આ મતદાન મથક મતદાનની પૂર્વ સંધ્યાએ તૈયાર કરવામાં આવે છે.
આ મતદાન મથકમાં સવારથી સાંજ સુધી આ બૂથ પર ફરજ બજાવતા 15 કર્મચારીઓ હાજર રહે છે.ગીર સોમનાથના જિલ્લા કલેકટર તંત્ર દ્વારા બાણેજ મંદિર નજીક ફોરેસ્ટ કવાટરમાં આ પોલિંગ બુથ તૈયાર કરવામાં આવે છે.
બાણેજ બુથમાં મહંત હરીદાસજીએ પોતાના મતાધિકારનો ઉપયોગ કરી મતદાન કરતા જ અહીં સો ટકા મતદાન થયું છે. હરીદાસજીએ જણાવ્યુ કે 'લોકશાહીને જીવંત રાખીને મારા માટે ખાસ વ્યવસ્થા કરવા બદલ હું ચૂંટણી પંચનો આભારી છુ. ( યોગેશ જોષી, ગીર સોમનાથ )