મોહમ્મદ શમી ફરી થયો ઘાયલ ! દુખાવાના કારણે હાલત થઈ ખરાબ
ટીમ ઈન્ડિયાના ફાસ્ટ બોલર મોહમ્મદ શમીને લઈને એક મોટા સમાચાર સામે આવ્યા છે. તે હાલમાં સૈયદ મુશ્તાક અલી ટ્રોફી 2024માં રમી રહ્યો છે. આ ટૂર્નામેન્ટ દરમિયાન શમી મેદાનની વચ્ચે ઈજાના કારણે દર્દમાં જોવા મળ્યો હતો. હાલમાં જ તે લગભગ એક વર્ષ બાદ મેદાનમાં પરત ફર્યો છે.
મોહમ્મદ શમીને દર્દમાં જોઈને સેન્ટર ઓફ એક્સેલન્સની મેડિકલ ટીમે તેની તપાસ કરી હતી, આ દરમિયાન સેન્ટર ઓફ એક્સેલન્સની મેડિકલ પેનલના વડા નીતિન પટેલ પણ મેદાનમાં હાજર હતા. જોકે, ટૂંકી સારવાર બાદ શમીએ ફરી બોલિંગ કરી અને પોતાની ઓવર પૂરી કરી. મીડિયા રિપોર્ટ્સ અનુસાર, શમીને પડી જતાં તેને થોડો આંચકો લાગ્યો હશે, પરંતુ તેનાથી કોઈ ગંભીર ઈજા થઈ નથી. આવી સ્થિતિમાં તે આગળ પણ ટૂર્નામેન્ટમાં રમતા જોવા મળશે.
ટીમ ઈન્ડિયા હાલ બોર્ડર-ગાવસ્કર ટ્રોફી માટે ઓસ્ટ્રેલિયાના પ્રવાસે છે. ભારતીય પસંદગીકારોએ આ પ્રવાસ માટે ટીમમાં 18 ખેલાડીઓને જગ્યા આપી છે. પરંતુ અનુભવી ઝડપી બોલર મોહમ્મદ શમી આ ટીમનો ભાગ નથી. તે છેલ્લી સિઝનથી ઈજાથી પરેશાન હતો અને ટીમની જાહેરાત થઈ ત્યાં સુધી તે ફિટ નહોતો. મીડિયા રિપોર્ટ્સ અનુસાર, આ સિરીઝ દરમિયાન શમીને ટીમ ઈન્ડિયામાં સામેલ કરવામાં આવી શકે છે. જેના માટે સેન્ટર ઓફ એક્સેલન્સની મેડિકલ ટીમ તેના પર નજર રાખી રહી છે. (All Photo Credit : PTI / Getty)
