ICC Rankings : ગુજ્જુ ક્રિકટરોનો વર્લ્ડ રેકિંગમાં દબદબો, ટોપ 5 ઓલરાઉન્ડર્સમાં 3 ભારતીય ખેલાડીઓ
ICC દ્વારા જાહેર કરવામાં આવેલી નવી રેકિંગમાં ભારતીય ટીમ અને ભારતીય ખેલાડીઓનો દબદબો જોવા મળ્યો હતો. ગુજ્જુ ક્રિકેટરોના વર્લ્ડ કલાસ પ્રદર્શનને કારણે તેમણે વર્લ્ડ રેકિંગમાં ટોપ 5માં સ્થાન મેળવ્યું છે.
ICCએ હાલમાં નવી રેકિંગ જાહેર કરી છે. ટેસ્ટ રેકિંગમાં ભારતીય ઓલરાઉન્ડર્સનો દબદબો જોવા મળ્યો છે. ટોપ 5 ઓલરાઉન્ડર્સમાં 3 ભારતીય ખેલાડીઓના નામ સામે આવ્યા છે.
જાહેર કરવામાં આવેલી ટેસ્ટ રેકિંગમાં ભારતીય ઓલરાઉન્ડર રવીન્દ્ર જાડેજા નંબર-1 પર પહોંચી ગયો છે. જ્યારે રવિચંદ્રન અશ્વિન બીજા અને અક્ષર પટેલ પાંચમા નંબરે છે. ટી20 ઓલરાઉન્ડર રેકિંગમાં હાર્દિક પંડયા બીજા નંબર છે. જ્યારે ટી-20 અને વનડે ઓલરાઉન્ડર રેકિંગમાં બાંગ્લાદેશનો શાકિબ અલ હસન નંબર 1 સ્થાન પર છે.
જેમ્સ એન્ડરસન દુનિયાના નંબર-1 બોલર બની ગયો છે. તે બોલિંગ રેકિંગમાં ટોચ પર પહોંચનાર બીજા સૌથી વધુ ઉંમરના બોલર બની ગયો છે. બોલિંગ રેન્કિંગમાં ભારતના સ્ટાર સ્પિનર રવિચંદ્રન અશ્વિન બીજા અને રવીન્દ્ર જાડેજા 7 સ્થાનની છલાંગ સાથે નવમા સ્થાને પહોંચી ગયો છે. વનડે બોલર રેકિંગમાં ભારતીય બોલર મોહમ્મદ સિરાજ નંબર 1 સ્થાન પર છે.
ત્રણેય ફોર્મેટમાં બેટિંગમાં એક માત્ર ભારતીય સૂર્યકુમાર યાદવ ટોપ પર છે, તે ટી20 બેટિંગ રેકિંગમાં નંબર 1 પર છે.
ત્રણેય ફોર્મેટમાં ટીમ રેકિંગની વાત કરવામાં આવે તો તેમાં પણ ભારતનો દબદબો જોવા મળ્યો છે. ભારત ટી20 અને વનડેમાં નંબર 1 છે, જ્યારે ટેસ્ટ રેકિંગમાં બીજા નંબર પર છે.